胡漢清參政修補形象 江希文：梗係冇復合！ [忽然1周 - 1023] 江希文,胡漢清,MW,

2月 28日決絕表態

「江胡」事擾攘多月，最新發展是胡漢清為參政鋪路加入自由黨，更搬回沙宣道大宅，希望與江希文重修關係，力挽形象。

滾熱辣

胡漢清參政修補形象　江希文：梗係冇復合！

中國人傳統思想「家醜不出外傳」，不過胡漢清江希文呢一對就正正相反，江希文由年前惡鬥胡老太，到年初「江胡」分手大鬥法，上頭條當食生菜。

「江胡」事擾攘多時，避走英國的胡漢清日前返港，更有傳已冧掂江希文復合，不過世事豈有咁簡單。

據知胡漢清今次主動示好，全為參政修補形象，不過江希文啖氣似乎仲未下，唔多合作，日前更向本刊記者斷言：「梗係冇復合！」胡漢清想收拾殘局，就要加多幾錢肉緊喇！

「江胡」事如何了？到依家仍未有定案。今年初胡漢清與江希文公開互挖瘡疤，江希文恃住歲半女 Natalie霸住沙宣道大宅，直言：「有贍養費就離開。」而胡漢清就避走英國，及後雙方更將家事搬上法庭。

襄王有心神女無夢。上周六（ 2月 28日），江希文湊女外出購物回家後，被問及與胡漢清的關係時她保持沉默，不過記者一提到她與胡復合的傳聞，江即表示：「梗係冇復合！」

展示傷勢

年初江胡二人不斷互挖瘡疤，胡漢清避走英國前，曾公開自稱被人用刀柄銼瘀的照片，矛頭直指江希文。

態度 360轉變

早前胡漢清由英國回港，搬返沙宣道大宅，與江希文同一屋簷下，突然停火，不難令人聯想到他為參政鋪路。胡漢清為資深大律師，擔任多項公職，被喻為親中大狀，從政意向早已表露無遺。上周五（ 2月 27日）他更宣布加入自由黨，擔任「憲制及政改小組」召集人。據知情人士指：「胡大狀加入自由黨，擺明車馬參政。不過佢同江希文早前互數，一時疑似家暴，一時又話要趕老婆同個女走，形象受影響。所以佢暫時做住啲冇實權嘅嘢，慢慢建立番形象，聽聞佢會參選下屆立法會。」

記者於沙宣道大宅等候多日，未見胡漢清蹤影，不過江希文卻心情不俗，不時帶女返娘家探外公外婆。日前她帶女外出時，向本刊記者默認胡漢清早已搬返沙宣道大宅：「你哋今朝見唔到佢（胡漢清）咩？佢好早出咗去！會好夜先返。」正當以為兩人關係已緩和時，原來只是假象。

3月 2日心情轉靚

本周一（ 2日），江希文帶囡囡 Natalie到位於中環的 playgroup上堂，逗留近 3小時才離開。之後她到附近的餐廳買果汁，即場將果汁倒入女兒的水樽，對女兒照顧有加。

江希文抱住將近兩歲的 Natalie，又孭住一大袋 BB用品，冇工人幫手，自己一腳踢亦無怨言。這日她心情不俗，發現記者更報以微笑，之後帶囡囡返汀九娘家見公公婆婆。

同屋住扮和好

據知情人士指江希文似乎唔想合作：「其實胡大狀之前申請咗禁制令，可以令 Liz（江希文）兩母女離開大宅，不過胡大狀搬返大宅，仲俾佢兩母女留低，係想搞好形象。胡大狀仲同 Liz講，如果佢成功從政，佢兩母女就會有更好嘅生活。胡大狀費盡唇舌，但 Liz一早已經死心，只應承對外停火，不再互數對方，但就堅決唔會同佢好番。加上 Liz講到明『有錢就走』，只係想得到足夠嘅生活費。間屋咁大，佢哋可以互當透明，關係只係同屋住咁簡單。」

上周六（ 2月 28日）江希文帶女外出購物回家。記者向她追問與胡漢清現時關係。本來十問九唔應的江希文，當聽到「復合」二字，即時反應極大斷然表示：「梗係冇復合！」言畢江希文即黑面抱女入屋。江希文如此決絕，胡大狀修補形象無疑添阻滯。

宣布入黨

上周五（ 2月 27日），胡漢清加入自由黨開記招。有記者問其私事會否影響黨形象，他即表示作為政黨有胸襟，「有失敗之處、有遺憾之處，我接受。」仲話最緊要向前看。

反面唔認人

胡漢清與江希文三年前撻着，不時上載溫馨照上網，胡又經常參加江的家庭聚會。可惜反轉豬肚，二人關係急轉直下，兩家人再無任何聯絡。

親中底蘊深厚

現年 64歲嘅胡漢清，畢業於英國倫敦政治經濟學院法律系，屬香港知名資深大律師。胡多年來擔任多項公職，是現任十屆全國政協委員、基本法研究中心主任、又曾任基本法推廣督導委員會委員，被喻為親中大狀。

上月底胡漢清高調出席自由黨記招，宣布入黨擔任常委並成為「憲制及政改專責小組」召集人，為從政鋪路。

身為資深大律師的胡漢清，與母親莊永楚（左）關係疏離，年前更因為金錢及物業轇轕而出現爭執。

胡漢清擔任不少公職，作為基本法研究中心主任的他，前年參加公民黨湯家驊舉辦「如何落實普選特首」的政制研討會，愛與政壇中人打交道。

鍾意就快D Share啦！

下一篇 》