2015年3月8日星期日

成龍當李冰冰係范冰冰李嬲豬：你喜歡她，去找她嘛！冰冰,范冰冰,成龍,李冰冰,

【短片】【點指冰冰】成龍當李冰冰係范冰冰李嬲豬：你喜歡她，去找她嘛！

2015-03-08 01:02:00

其他影片：>>

【點指冰冰】成龍當李冰冰係范冰冰李嬲豬：你喜歡她，去找她嘛！

兩個都係冰冰，個樣pure啲化嘅妝冇咁濃較冷艷兼有氣質嗰個叫李冰冰，喺康城影展被怪風掀裙露底底嗰個叫做范冰冰，次次見親佢塊面都係搽到白雪雪好似張白紙咁，男士們喜歡佢夠艷麗。

已屆六十甲子之年嘅成龍，同兩個冰冰合作過好多次，同李冰冰拍電影《辛亥革命》仲有床戲，同范冰冰拍過《新少林寺》又一齊去過康城影展親眼目擊「冰冰UFO」，理應印象深刻，原來唔係。

近日李冰冰同成龍、張國立等人一齊錄影內地綜藝節目《我看你有戲》，齊齊做評審。點知，成龍當眾對住李冰冰嗌咗范冰冰，激到李冰冰嬲豬：「你要是想她或喜歡他，你就去找她嘛！」

件事係咁嘅，當時有位女參賽者表演空中吊環，表演完喇，成龍就話覺得佢好似像范冰冰，就即刻問現場觀眾:「她長得像不像范冰冰？」仲對住坐喺旁邊嘅李冰冰話:「別生氣啊！冰冰姐！」李冰冰一臉茫然，唔知成龍咁講係乜嘢意思，於是對正個咪講:「我生啥氣啊，成龍大哥，你能不能不挑撥離間嗎？」仲話自己同范冰冰都係好朋友。

李冰冰當然冇咁易收手，事關成龍講到佢好似好小器咁，於是就話:「你常常當著我的面，叫我范冰冰啊！」未等成龍解釋，李冰冰又話:「你要是想她或喜歡她，你就去找她嘛！」成龍明明想講嘢，但聽到李冰冰咁講，即刻放低個咪，冇聲出，氣氛好尷尬。

其實呢，兩個冰冰不時傳不和，但兩粒冰都否認。講真，范冰冰都成日被傳同女星不和，好似章子怡、同曾合作《還珠格格》、最近合作做生意先至互相關注微博嘅趙薇等等。咁雙冰係咪真係唔妥呢？唔知，不過聽到李冰冰咁講，似乎已經暗示咗啲嘢……

最衰仲係，當李冰冰兜口兜面寸完成龍之後，張國立都加把口話：「本來一個和平的氣氛被成龍大哥一個『冰冰你別生氣』給攪亂了，人家生什麼氣啊，我都聽著你當她的面叫過好多次范冰冰了，人家都沒生氣！」成龍即氣急敗壞道：「你這是真的挑撥離間!」

唔知下次成龍分到未？

相關新聞:

【感情嘅嘢...】42歲仍單身李冰冰抱怨：為什麼男人都看不見我？

http://bit.ly/1wODtde