真人騷
敢講至好聽 側田：玩音樂嘅人係會貪玩一世
我喜歡側田的歌，〈好人〉、〈命硬〉、〈我有今日〉以及其他，但是不代表我認同他這個人：
在脫不脫帽子的事情上，他猶疑了太久；曾經和林苑愛得深，為何夠膽愛唔夠膽認；和曹格的士內發酒癲，亦太暴燥太醜怪；還有愛玩愛蒲，總被拍到帶女回家，到底還顧不顧形象……
直到這一天見面，和回港宣傳六月紅館個唱的他坐下來對話，我一點沒有改觀，但是真心 respect，因為 37歲的側田，可能是我見過最夠膽講的香港藝人。
「我一出道已經講過，接 job可唔可以有錢收，你叫我出嚟，冇理由冇嘢袋㗎！」
「我做音樂又唔係𡃁模，日日上報但係零收入，有咩用先？」
「我唔會拍一隻 MV就叫自己導演，我 product行先，唔係嗰啲人，自己個名至係 label。」
「拍拖你唔好俾名份我，你唔當我係男朋友，我仲專一、對佢仲好！」
「我未遇到嗰個令我唔再搞搞陣嘅人，玩音樂嘅人貪玩已經入咗血，係會貪玩一世！」
點解咁夠膽講？他說：「名同利你可以攞走，但係音樂嘅 talent直到我死嗰日都會跟住我，我去邊都一定可以搵到食！」
綜觀整個娛樂圈，像側田這麼坦白的人也太稀有，所以我說，我真心敬重。
下次出碟攞嚟自 high
講下你嘅演唱會先？
好多都用咗全新班底，打鼓嘅、彈結他嘅、仲有燈光音響公司。因為香港主要都係嗰兩間燈光公司，我想試下俾呢間公司一個機會……做音樂……唔係，係做邊行都好，每個人都需要機會。
好多嘢都係你自己話事？
不嬲都係嘅，我樣樣嘢都要自己理，連 graphic都係，因為我以前讀 graphic。其實我想做演唱會導演，我有諗過自己第時唔做音樂，去做演唱會導演或者監製。我太多諗法，知道幾時令觀眾喊，幾時令佢哋起雞皮。
有冇向歌手朋友提出幫佢哋做演唱會導演？
未……我 ideas多，但係未夠班。我唔可以一步登天，好相信要由低做起，唔會因為導過自己一隻 MV，就叫自己導演。
你唔係嗰啲人，拍一次半次，就大大隻字打喺片頭： XXX作品。
每個人諗嘢唔同，佢哋係當自己嘅名係 lable，但係我深信要作品行先。因為我入行係做音樂，我要好清楚自己做緊乜，入行時都有前輩同我講過：「呢行做幕前有機會帶到你好高，一定要記得唔好離開軌道，唔好唔記得你入行嘅原因。」
你入行嘅原因係咩？
就係做音樂。我做咁多年都會記住佢講嘅嘢。其實我出道嗰年，王菀之、方大同、衞蘭、張繼聰、謝安琪，好多都係我呢種人，係香港樂壇嘅一個轉捩點。
有冇試過俾人捧得太高，爭啲忘記咗初衷？
有，但係捧得我太高真係唔係我控制，做完第一次演唱會，我有問過可唔可以做番幕後，佢哋話唔得，因為公司擺咗太多錢喺我身上。第一年第一次演唱會功勞真係完全歸功 Paco同公司。呢行唔係唱得好就得，係要有個人幫你行到呢一步。你問我想唔想，梗係唔想……其實我出隻碟嘅原因，就係 for我第時做幕後。我要好似 Mark（雷頌德）或者 Eric Kwok一樣，響一響個朵。因為香港作曲好講個名，我開頭出嚟好幾年賣唔到歌，我啲歌其實 OK，我覺得好過好多出名嘅作曲人，我當年係諗住響一響朵，第時自然有人搵我，唔使去敲門咁辛苦。我係想咁咋嘛，但係估唔到條路行到咁……
呢啲就叫洗濕咗個頭。
係啦……其實到𠵱家我都係每年會咁諗，想返番去幕後。
咁就由第一次唱紅館，到今年第五次唱紅館。
好開心！每次開騷前都好開心，我次次都當嗰次係最後一次開騷，我點知自己聽日發生咩事呢？可能喉嚨有事再唱唔到歌呢？
做完演唱會下一步係？
想自資出隻碟， anything but pop，冇人聽唔緊要，我擺喺屋企播俾自己聽，係自 high。
講真話俾全世界轟炸
你驚冇下一次，係擔心喉嚨？呢行好多人會擔心因為唔紅、因為冇人買飛所以冇下次。
我唔怕，咪做幕後囉，名利可以攞得走，但係音樂嘅 talent，到我死嗰日都唔會有人攞得走。我有時會唔想再做，但係音樂係爸爸媽媽、係上天俾我嘅 gift，我一定要用呢個 gift做啲有意義嘅事。
點解唔想再做？
我隔一排就會咁諗，因為真係喺香港做到好灰，啲人 download MP3，佢哋唔知呢首歌咁多個音我哋做咗幾多嘢，唔係歌手入錄音室兩個鐘就搞掂㗎……做音樂，搞到好似做義工一樣。我有諗過去日本走一趟，前一排我都去過東京一個月，同一班世界各地嘅樂手 jam歌。嗰度有日本人，有牙買加人，大家語言不通，但係唔使開口嘅，一做音樂就明哂，我哋叫佢做 pocket，唔同嘅樂手入咗同一個 pocket，嗰件事，真係好正。
你見到嗰啲自由樂手會唔會好羨慕人？
我都自由，係搵唔到錢啫，係灰啫。我一開始返嚟賣到第一首歌俾胡彥斌已經好開心，覺得好夠，冇諗過自己會行到呢一步。
第一首歌賣幾多錢？𠵱家一首歌又賣幾多？
第一首賣五千蚊，𠵱家都係賣五千蚊一首。我無加過價，無論監製、作曲、和音都冇加過價。作曲係搵唔到食㗎，呢度唔係美國。
11年離開香港去北京，你當年話個原因，就係因為喺香港做音樂出賣咗私隱，但係搵唔到成正比嘅錢？
我香港收入根本係零……我唔想講呢個話題，講真，香港有咩騷係有錢收？見報多唔代表有錢囉，我做音樂，唔係𡃁模吖嘛！好好笑，我記得我 05年一出道已講過呢句說話：「可唔可以做啲有錢嘅 show？」一出聲，即刻俾人轟炸。
邊個轟炸你？
全世界囉！你個𡃁仔……其實我嘅想法同當年一樣，但係講得太早。一個人出嚟，點都要有啲酬勞啦，係唔係呀？冇理由冇嘢袋㗎嘛！個個都話要當推廣，有推廣先至會有商演……但係啲商演喺邊度呀？你明唔明呀？香港係冇商演㗎！我第一年日日見報添，但係我都冇錢。有啲雜誌 list哂出嚟我第一年賺咗幾多錢，但係嗰度連十分一我都賺唔到。
咁喺北京住成點？我聽過香港有藝人北上，話嗰度好多高人，每日都有嘢落袋？
我喺北京朝陽區住，同女朋友一齊，周圍 jam嘢……咁又唔係咁高啫，係啲藝人喺香港冇接觸多啫。要講高，香港高人仲多，仲要係世界級。
今次香港演唱會代唔代表回流？
唔係啦梗係，其實我去邊都得，住喺非洲都可以做音樂。我啱啱幫梁漢文作首歌，就係同個 LA嘅音樂人合作，大家未見過添，就係用 email掉嚟掉去咋嘛！
拍拖太耐我會搞搞陣
所以北移真係為咗錢？
其實係為咗女朋友，韓國籍嗰個，一個人喺香港覺得好 lonely。其實我想低低調調咁走，冇理由整個 press con出嚟，係公司決定。因為你咁揚，以為我諗住上去好爆添……邊有咁易爆？
你都幾 sweet，會為咗個女朋友搬去第二個地方發展？
係呀，咪蠢囉……但係返嚟，佢又唔肯同我返，咁佢喺嗰邊工作機會又真係好好多。我唔驚，我去到邊都搵到食，但佢難啲……所以分手。
點會蠢？我覺得好型！
開頭咪型囉……隔咗一段日子，始終唔係自己地方。不過我諗諗下，我個人都係咁，美國、香港、北京，每個地方唔可以留超過十年，我唔鍾意太穩定太規律。四年前我走，因為愛，都因為喺香港做音樂開始唔好玩，我喺 studio錄歌竟然睇鐘！嗰一刻我就知唔得喇！做呢行冇人係因為錢，係團火推動我哋，嗰隻碟我開始冇火，隻碟叫做《愛的習慣》。雖然啲人聽歌都唔使錢，但我都過唔到自己。
𠵱家有冇拍拖？
冇……但係我又唔係太想講。我發覺以前太高調，我發覺講咗對個女仔唔公平，講佢會俾佢睇到，第時分咗手影到我玩，又話我去咗滾……我可以話，我𠵱家好開心，感情方面係 honey moon stage。
做音樂你要周圍走，感情呢？你想唔想安定？
我唔係太相信名份，我都同個女仔講明，你係我女朋友呢啲嘢……大家心知。你一俾咗名份我，我就會俾自己壓力、對自己有期望，食餐飯出個街，我以前都係咁，因為你係我條女、我就要做啲乜……搞到自己嬲。個女仔又會因為我係男朋友所以有期待。所以我話冇名份仲好，我仲專一，對佢仲好！
N個前度
係真唔係呀？以一個女仔嚟講，聽你咁講好明顯係唔想負責喎，係自私！
唔係㗎，我唔係……每個人諗法唔同，唔代表我係啱，但你明我就會明。 it's works for me。有名份係束縛，冇我反而維持到好耐。我好鍾意嗰啲人，一齊好耐，唔使結婚，但係乜都明。結婚係 for生細路，我又冇諗住。
好多人都會有個結婚生仔，買間屋養隻狗嘅幻想畫面，你冇？
每個人都幻想過，我 25歲咁上下都有諗過，諗住自己嘅家喺三藩市，但係一兩年就冇，我發覺自己都係一個細路、我未遇到自己好愛嘅女人、未可以廿四小時俾哂一個人，同埋我發覺我鍾意小朋友，但喜悅未必來自小朋友。我諗我係信唔過自己，我最長拍拖四、五年，都頂唔順，五年都長，何況結婚？我知自己一定會出事，亦都可能係因為我未遇到一個令我唔再搞搞陣嘅人。
所以你認你花心，鍾意搞搞陣？
一排排囉……睇時段，有一排我好專一，要睇我遇着邊個。玩音樂嘅人係貪玩，喺血入面，成世都係貪玩，唔好諗住我會喺屋企陪你。
玩音樂，你玩到睇鐘就係要走嘅警號，咁拍拖呢？警號係咩？
開始鬧佢，開始要求佢，開始計較。
睇戲睇書，邊一種愛情關係你最響往嘅？
我記得 Woody Allen套《情迷巴賽隆拿》，好正好 free，係 free love，冇束縛嘅愛情。一個男人，同兩個 lover一齊喺郊外飲 wine，仲有一個前妻，係誇張咗小小……
|
鍾意就快D Share啦！
|
|
|