真人騷
講彭順 憶亡父 訴自身 Liddy：每個做錯事嘅人都需要人原諒！
負責拍片的同事最近喜歡玩環型燈，說燈打出來，人特別漂亮，堅持每次訪問都要用。
同一盞燈，用了一個多月、遇過好幾個受訪者，唯獨 Liddy說打起燈來感覺像審犯；亦唯獨 Liddy一個燈前燈後兩個人：鏡頭外本來好地地，一坐在燈前一 roll機，就板起臉直起背、擺出一副戰鬥格，潛台詞像在說：「來來來，要打要罵，我都不怕！」
試想像，你是那個浮沉了六年的暗星，全裸做完《四非》女主角，滿心期待靠套戲翻身；誰不知戲未上，先因為插腳彭順和李心潔的婚姻揚名華人世界，連累電影也差點上映無期；名聲臭了事業毀了剛五天，父親又殺人再自轟上埋港聞頭條，家暴、陪酒、父親坐過牢的家事全被翻開來揚到全天下人眼前，被全世界罵小三罵了大半年……換成是你，也可能覺得像審犯，也可能要逼自己在鏡頭前倔強下去。
看到網友比李心潔還火滾、比行為學家還能分析，說 Liddy是因為成長造成性格扭曲故意破壞別人幸福家庭，讓擺明偷食的彭順完全置身度外，我問 Liddy，覺得公平嗎？
「你唔好同我講男女平等，呢個世界不嬲就冇公平。我有錯我一定會承擔，佢（彭順）安然渡過，可能係佢前世做咗好多好事，所以今世俾佢遇到一個咁好嘅女人。」
躲起來好幾個月， 28歲的李悅彤說自己除了幫爸爸處理後事，也去了念經學佛，把所有發生在自己身上的好的壞的，都用業障都用因果合理化：「我諗我前世做嘅好事唔夠多，所以今世要做多啲，希望下世投胎可以做男人。」
佢識掩眼法
新戲終於有得上畫？
《四非》安排喺 3月 12日上，我嘅角色叫婷婷。佢係孤兒，細細個就目睹媽咪被殺，所以佢嘅生活冇愛，只得仇恨、只可以出賣肉體去生存，我覺得佢真係好可憐。
你同男主角柏豪有情慾戲？第一次做電影女主角就咁大膽？
我哋兩個都係第一次咁大膽。我哋都有沖涼戲，我就係背部全裸。我擔心嘅並唔係裸露鏡頭，反而係呢個咁深層嘅角色，到底做唔做到。拍之前一個月，我已經收埋自己，唔見朋友、唔同阿媽同枱食飯，睇好多戲聽好多歌令自己進入狀態，再加上要節食，血糖低就更加個人壓抑住……不過準備好晒一開始對住鏡頭都係會戰戰兢兢，因為真係好多個月冇對鏡頭……我嘅人生就係咁得意，冇工作係接住嚟，經常等到我想轉行喇，新嘅機會又突然出現。
無論對柏豪定對你，呢套戲都會帶起話題，冇人估到結果係同彭順嘅新聞令你一夜成名，仲搞到連套戲都爭啲冇得上？
我喺呢行都七年，有少少心灰意冷，當工作出現，鍾意個角色我就去做，已經學識唔好期待太多。由細到大我亦都唔係喺溫室長大，一向知道人生並唔係咁平坦，但係上年嗰件事……就真係足以改變咗我好多諗法，差唔多成個人扭轉顛覆，連朋友都話我完全變咗兩個人。我以前感情大於一切，𠵱家就真係停一停諗一諗先，所有嘢，唔好咁快相信。
具體改變咗你啲乜嘢？
以前我係一個敢愛敢恨嘅人，我鍾意，就唔會理周遭所有人，只會信自己直覺同我睇到嘅嘢，因為同佢相處嘅人係我。如果佢真係咁好掩眼法……對唔住，咁佢真係太叻。我𠵱家學識要聽下人哋講，旁觀者清係真嘅，理性與感情缺一不可。終於俾我等到咁樣一套戲，又突然發生呢啲嘢打亂陣腳，我諗好多嘢都真係整定，每一個人喺我身邊出現，都有佢嘅原因。我欣然接受生命中所有高處低處，對所有嘢會感恩，唔會埋怨，亦唔會強求。我係嗰種人，為愛付出一切，但係，當好多嘢唔係預期，我願意承受後果，嗰句點講呢？鬧就要受，打就要企定？
佢唔怕，
其實我真係唔明，你有乜理由唔知佢有老婆呢？
我從來冇話過我唔知，我從來都知。
佢嘅表現令你以為佢淨係愛你，唔再愛佢老婆？
呢樣嘢我無謂再講，每個人都返去自己位置做緊自己嘢，我唔想再打擾人生活，有好多嘢淨係兩個人知，我食得鹹魚抵得渴。
出街拍拖，難道你冇諗過會有人睇到？會俾人影到？
呢樣嘢就真係……你諗都諗到啦，我係一個 small potato，對方係一個有名氣嘅人，對方唔怕，我怕乜嘢？
咩感覺呢？一晚之間由 nobody變名人？
係囉……使唔使呀？啲消息去到咁遠，直情見到有英文譯本……中國人講得啱，醜事傳千里。
做完小三，再發生爸爸單嘢，嗰段日子你點走過嚟？
一開始，已經成個人跌落谷底，一個星期唔夠，一波未平一波又起，我嘅世界真係瓦解兼崩潰，我已經低到咁，但每個經過嘅人都仲要踩多你幾腳，踩吖踩……驚死你埋得唔夠深……所謂嘅人情冷暖，照妖鏡一樣現晒形。我又唔係大紅大紫，我真係唔恨再喺呢行做落去，我當其時只可以專心為我老竇做啲嘢，愛情嘅傷害，同買六合彩一樣，唔中就係唔中㗎啦，怨得邊個？
你成日話從此以後唔怕輸、再冇嘢驚，係寫俾人睇定真係做得到？
我諗呢個世界冇乜幾個人，一個禮拜都冇，兩單咁嘅嘢殺埋嚟，人生不外乎都係愛情事業同親情，我愛情親情同一時間消失，連帶埋事業都輸埋，我點會唔化？仲有咩要驚？乜都好，俾命運決定
你信佛，信極樂世界，相信投胎，你覺得爸爸去咗邊？
爸爸生前做咗啲唔係太好嘅事，我希望靠我同媽媽念嘅經，可以帶佢去好啲嘅地方。如果有機會再投胎，我希望同佢再有機會相遇，因為我未有機會盡孝道。爸爸同媽媽分開六年幾不相來往，我一直都好嬲佢，覺得佢衰又唔理我哋……我𠵱家就明，邊個唔會做錯事，每個做錯事嘅人都需要人原諒。我最後悔就係佢喺度嘅時候，我冇及時去原諒佢。
愛佢就要原諒佢
你講起原諒，我諗起李心潔都選擇咗原諒彭順。
我覺得每個人都係，如果你仲愛佢，就應該要原諒。
但係好多網民唔信呢套，到𠵱家都係會日日留言鬧你小三。
冇喇……我已經去到一個位，百毒不侵。每個人性格同領悟能力都唔同，我唔會用我標準去睇別人，我反而多謝佢哋中傷我，因為喺佛學嚟講，佢哋係幫我積緊福。以前嘅我，朋友以為嘅我，係會為咗小三呢個名唔開心，會擔心自己前途，唔係囉，完全相反。
你覺唔覺得好唔公平？
呢樣嘢我又好睇得開，我做錯就一定會承擔，但係佢安然渡過，可能佢（彭順）前世做咗好多好事，所以今世會遇到一個咁好嘅女人。公唔公平……我覺得呢個世界不嬲都冇公平，你千祈唔好同我講男女平等：男人出軌，啲人會話細路仔做錯嘢，要俾機會佢，女人喎……我諗我上世積嘅福唔夠多，所以今世做咗女人，希望今世做多啲好事，下世可以俾我做男人。
愛情路上，今次經歷算最慘痛？
當然，但唔知點解，我好多次拍拖，男朋友都係同前度未搞清楚。我係嗰啲人，一定唔會死蛇爛鱔，寧願華麗轉身，頭也不回。我做呢一行亦都一樣，我寧願做平民都唔想係娛樂圈小強，起碼高貴啲。
大半年過去，有冇再拍拖？
有人追，但係我冇接受，因為我入面未清空，未係一個好健康嘅狀態。我好難相信人，拍拖最重要就係相信，但係經過上一段，你又叫我點相信呢？所以我話我未 ready，對佢對我都公平啲。
遇到幾個男人都係咁，問題出喺邊？係唔係你自己呢？
可能我有債要還啩，千年修得共枕眠，見到佢總有原因嘅。
套戲以後，仲有無其他工作安排？
冇，有幾個經理人公司搵我傾，但係我仲考慮中，好好睇睇做完套戲宣傳工作再諗其他。我係鍾意拍戲，但係唔係為咗做呢一行，就要搬晒成家出嚟呢？我仲諗緊……做一個平凡人，好似開心得多。
勇氣
早排帶媽媽去泰國錄影有線節目， Liddy話踏出勇敢一步，笨豬跳。
「我唔敢㗎，不過應承得人硬住頭皮都要做，無謂阻住大家收工。跳完之後我第一個感覺係好佩服跳樓死嘅人，佢哋真係好有勇氣。」
我問她最糟糕的時候，她為甚麼沒有輕生的念頭。
「條命係阿爸阿媽俾我，我唔覺得應該咁樣攞嚟蹧蹋。凡事有轉機，去到頂點時唔好覺得飄飄然，去到低谷都唔使絕望，循環嚟㗎，緊接住可能係好事呢？」
我想，自殺是因為絕望，和勇氣無關。這個女孩子能靠自己重新站起來，這才叫勇氣，比彭順有氣概得多！
|
鍾意就快D Share啦！
|
|
|