真人騷
真正高山低谷 簽 Paco搏殺 劉浩龍：一時好自大一時好自卑
38歲的劉浩龍，在他入行第 17年，總算迎來了事業第一個高峰：轉投太陽娛樂黃柏高旗下，有新歌有新碟仲話度緊紅館期；新戲《 12金鴨》、《全力扣殺》接住上，又有港視新劇《第二人生》；當然還有越行越順的新戀情，和天后女友容祖兒就在訪問前剛剛去日本渡假回港……係威又係勢！
說到這裡，劉浩龍不太同意：
「好多人話我入行 17年，其實我頭七年都連錄音室都冇入過，第一隻碟係 04年，我當自己入咗行 10年咋！」
10年也好， 17年也好，高高低低經歷了不少、真真假假的新聞也面對過，我始料不及，訪問前夕，對方會要求我預先準備題目讓他過目：耍大牌看來不像他的風格，閱歷豐富如師兄，照道理也不會怕被問倒，我忍不住，坐下來第一條問題就是問他：「預先審閱問題係唔係你要求？其實你有冇嘢唔想我問？」
「梗係唔係我應該係公司要求……我出碟前頭七年都係喺電視台做主持，其實我都鍾意做訪問即場反應。有冇問題唔問得？冇乜！」
既然師兄這麼說，我當然選擇相信，不過從一問一答的即場反應看來，很明顯再霉都肯講，說自己才是師兄的 comfort zone，一說女朋友，答案就變得簡潔又冇彎轉：「我冇自卑！冇傾過結婚！想生仔？佢講笑啫！同佢一齊我唔使證明啲乜，我哋一齊都係傾工作。未來一年係我要搏命嘅一年，先處理好我同新公司嘅呢段婚姻先」
以有備而來來說，這些答案不免欠缺自負又步步為營。我喜歡看劉浩龍的戲多過容祖兒，連歌也是識唱劉浩龍的要比容祖兒還多，個人以為，要是能放得開，劉浩龍能給的，應該遠遠不止於此。
其實我都需要 fully support
有一個階段唔覺自己係歌手？
頭嗰幾隻碟，就真係好專心做呢件事，係轉咗去東亞，佢哋覺得我可以拍多啲戲，我唔係唔鍾意拍戲，但係 Paco話：「唔得，你係歌手嚟，唔可以得閒至做一首歌。」佢嘅計劃係全年音樂，又令到我呢團火撻番着。
但呢行就係咁被動，團火喺邊唔重要，行業推咗你去邊，你惟有去邊？
我覺得簽一間公司，就要信任。我今次兩首 plug歌都係 Paco揀，我要信任佢。
頭幾年你搞到轉行賣表，團火反而冇熄？
我頭七年都冇錄過音，都冇當過自己係歌手。所以啲人成日話我入咗行成 18年，我真係當自己 04年至出道。我係 04年新人，雖然當年已經好老。
咁又係喎，個個當你入行 18年，條數其實計錯。
我覺得我係隻遲熟馬，我參加新秀都係因為梅艷芳、許志安，因為由細就鍾意呢個比賽，幾好笑，由我參加新秀，就已經開始咗自己嘅高山低谷生涯。好多人參加完新秀，順理成章就係歌手，我冇得做；原來年年冠軍都有十萬蚊獎金，得我嗰屆冇。我就係有 20幾個 Prada袋，咪拎去分哂俾啲 Auntie囉……你諗下我由入行已經係咁，諗住等等下就到我，點知等等下，華星都執埋笠。
由入行開始幾次都係好似就嚟得又沉番落底。
今次新公司新計劃，仲話要入紅館添，怕唔怕又係虛火？
唔會，梗係鼓舞 fully support呢件事真係好正！我未試過咁大個廣告牌，未試過簽約嗰日已經準備好兩首歌，更加未試過開完記者會有人同我講：「諗住幫你開紅館！」所以……
其實你入行咁多年，認同經常得到，分別在於今次掉埋錢落去捧你？
梗係啦，好感動，同埋有信心好多，唔怕機會降臨。以前唔係唔珍惜機會，而係我淨係得一首歌，得就得、唔得就唔得，我旨意哂佢。𠵱家範疇多咗，我準備好充足，有歌有電影仲有劇，開心好多。
所以同樣機會， 28歲嗰年俾你，完全唔同？
係呀，男人真係需要經歷。呢排好多人都問我，點解我個樣唔同哂，可能就係因為人大咗，經歷多咗，見嘅多咗，吸收嘅多咗。好多人戥我不值，我真係冇……成日有人問我，冇得唱歌有冇唔開心，我真係冇。我以前冇得唱、冇工開都試過啦。
最霉一千蚊一個月
你認你真係霉過？
梗係霉一開始，唱完新秀得一千蚊一個月人工；去幫阿葛（葛民輝）做 web J，本來一至五有工開，人工又高，點知又執埋。
霉嘅階段，你有咩得着？
都要做囉……唔可以坐喺度等運到。唱完新秀我真係喺度等運到喇，諗住公司一定會輪住嚟，陳奕迅之後就到歐倩怡，跟住何韻詩，咁咪輪到我囉……點知等到公司都執埋。
最霉嘅時候有幾窮？
個個月戶口都係零，要靠媽咪幫手。到連網上電台都執埋，就真係要轉行賣表，叻㗎，我嗰時賣表，個個月都可以搵兩三萬。但搵到錢，自己覺得唔對路，我唔想咁樣過一世，積極就係嗰陣時開始有，自己做 demo逐間公司去敲門。
咁鍾意唱歌，可以唱 K可以沖涼唱啫，點解一定要做歌手呢？
我話俾你知我幾時想做歌手，二年班作文堂嘅《我的志願》，我真係寫「我要做歌星」。但係俾我老師鬧我成堂，話呢份工冇出息。我鍾意唱歌，係想睇大家反應。
最霉嘅時候，有冇諗番起老師當年話過冇出息？
冇喎，我做人真係好少會後悔，我係嗰啲向前看嘅人，成日諗：唉，早知就唔參加新秀又有咩用？我獅子座，好相信自己，一時就好自大一時就好自卑，冇中間。好多人話我𠵱家開心咗，其實我一直都咁開心，從來冇怨過。
你渴望掌聲，想要反應，咁唱紅館係唔係終於俾你等到？係唔係你真係好想去到嗰個位，要做天王？
咁又冇喎，我又冇 set一個咩紅館夢呀、男歌手夢俾自己。我唔理你二十個定二百個觀眾，你俾反應我就得㗎喇。我成日都覺得，啲嘢係你嘅就係你嘅，諗咁多做乜？咁多目標咪就係咁多壓力囉。呢行咁被動，我 set個紅館目標俾自己，都要有人幫我實行至得㗎！
冇同祖兒傾結婚！
咁幾時結婚？
暫時未諗過，因為啱啱轉咗新公司，呢一段先至係我暫時嘅新一段婚姻，我要同佢 keep住一段好感覺先。今年係我好搏命嘅一年，我唔係話想攞啲乜，係要追番我慢咗嘅腳步先。
講到咁實唔結婚住？唔係睇感覺、順其自然嘅咩？
Paco放咁多資源俾我，我一定要出二百倍嘅力，唔想做其他嘢分心住。
係唔係想去到一個位先，拉近啲同女朋友距離，證明一啲嘢先？
我唔使證明啲乜，總之我就係要努力工作。我唔知會得到啲乜，但我要盡力做咗先。
觀眾硬係要覺得你同女朋友唔同 level，困擾你嗎？
我好有自信嘅！
但你話你係獅子座，一時自大，一時自卑？
我嘅自卑唔喺呢度。
咁你自卑喺邊？
喺我好耐冇歌唱時，我會有個怪病，覺得出街冇人識我、冇人聽我唱歌，我係自卑喺呢度啫。
咁你自大喺邊？
你頭先講嘅嘢度囉！我成日覺得，一段感情係冇需要擺工作落去，總之最大目的係我夠錫佢、我可以照顧到佢就夠。我成班 friend都喺呢行，大家都有高有低，唔會話邊個邊個去到咩位、所以有啲咩唔可以再講，唔會有階級之分。
我唔算係容祖兒粉絲，但我鍾意佢份人，識做又記性好！
係呀，佢都影響咗我好多，令我比以前更正面，更多正能量。佢又勤力，當你嘅 partner係個咁勤力嘅人，我都唔希望自己懶散。我哋做咩都一齊，減肥呀、做運動呀，食雞胸餐都係一齊。
𠵱家又增肥中？
係，舊年三月拍《全力扣殺》增完肥，年尾拍《 12金鴨》又再減，嚟緊又有套新戲叫我做爸爸，應該又要再增肥。過山車一樣，五月又有 mini concert要再 fit番，所以我𠵱家減肥減到好有心得，但係對個心臟唔好，試過一上跑步機覺得唔舒服，要去醫院照個心。
覺唔覺得唔公平，但係自從同容祖兒拍拖，自己嘅努力好容易被抹殺？
唔會，咪再努力啲囉！我真係冇諗呢啲負面嘢。我𠵱家有工作，做好佢咪得囉！你唔可以要求個世界點睇我，但我可以做好自己工作俾人睇到。
自從同容祖兒一齊之後，邊一單新聞你真係會嬲？
咪話我間日本餐廳唔掂，要問祖兒媽咪借錢單嘢囉。根本間鋪就有錢賺，我最嬲就係我做呢行，你哋點寫我唔介意，呢行就係咁，但間鋪頭係我同朋友夾份，做生意最緊要係咩？誠信吖嘛！我啲朋友個個有頭有面，因為你咁寫出去，冇人信咁點算呢？
我早排撞到祖兒傾閒偈，佢都話佢過多兩年想做媽咪喎！
祖兒囉！佢成日講笑㗎！
我覺得佢好認真喎！
嗱，所以情侶嘅嘢就係咁，你覺得佢真，我覺得佢係講緊笑。
係？你冇同佢傾過大家呢方面嘅步伐係唔係一致咩？
總之今年都係要做嘢先，做好新公司嘅嘢先。
你同佢傾掂數，要結婚都要等你做咗想做嘅嘢先？
真係冇，真係冇傾過。真係未諗住，大家都係講緊工作。
|
鍾意就快D Share啦！
|
|
|