Jesper（左）及阿輝（右）經營眼鏡品牌四年，每天準時到旺角總店坐鎮，阿輝大呼：「以前日日返工等出糧，而家日日諗夠唔夠錢出糧俾人，都幾辛苦！」
壹盤生意
眼鏡鋪兩招抬身價
香港本土潮流品牌，衫褲鞋襪見得多，但太陽眼鏡屈指可數。三十三歲的黃俊輝，家族經營眼鏡店生意逾三十年，就是看中這個缺口，決定與「波友」張煒聰（ Jesper）投資逾四十萬，創立自家太陽眼鏡品牌 Hachill。
開業四年，一副眼鏡賣千幾蚊，依然吸引不少台灣、大陸、馬來西亞等地的買家向他們招手。還未計算海外市場及本地分銷，單以三間門市計，現時月賺十二萬。成功的秘訣全靠兩招：第一招是製造明星效應，先後獲 DJ少爺占賞識，及娛樂新聞主播莫家淦（ Keith）入股，贊助阿 Sa、 Joey試戴，成功打響知名度；第二招是識走位，先租用不同商場快閃店（ Pop-up store），為人流「試水溫」，降低成本之餘，又能避免租錯冷清商場。
今年終於有望回本，阿輝回想開業後試過周轉不靈，為不斷「填氹」，要求行家預先付款，阿輝大嘆：「唔係對眼鏡有興趣，我諗都捱唔到而家！」
阿輝家族經營眼鏡工場，又有三間眼鏡店。畢業後就全職到店鋪幫手，「好多歐美嘅遊客嚟到，都係揀番佢哋國家嘅牌子，好多時都會問香港有無自己嘅牌子，但我搵咗好耐，都係無！」眼見本地品牌有得做，決定用積蓄，阿輝夥拍由細玩到大的「波友」 Jesper，每人夾二十萬元創業。
Hachill由寄賣做起，再做快閃店，到去年中終於進駐銅鑼灣希慎。一步一步由不為人知的本地品牌，到今日月賣四百副太陽眼鏡，成功之道全靠兩招。
第一招 明星效應
Keith成功游說郭富城在演唱會佩戴其太陽眼鏡，可以說是品牌的轉捩點，「之後 Aaron出活動都有 keep住問我哋有無新款，好多人跟住佢戴嘅款嚟問有無貨，佢真係潮流 icon！」阿輝興奮地說。（《蘋果日報》圖片）
阿輝自言對眼鏡都有少少 sense，一一年外國流行水銀鏡片時，他就知道機會來了，「當時水銀鏡片喺外國個個明星、運動員都戴，但喺香港仲未流行，因為啲人覺得好誇張。」阿輝堅信有得做，於是就自己設計，再在大陸找廠生產，用了大半年時間籌備好第一批貨。
就在籌備期間，連貨都未到手之際，剛巧 DJ少爺占在尖沙咀開第二間潮物店，主動聯絡他放在店寄賣，「少爺占係我波友嘅朋友，佢間鋪主力賣本地品牌，咁啱就無眼鏡產品，所以搵我哋。」千二副「處女作」反應比想像中好，一年多便賣光，「潮物店啲客多數買完就走，好少要驗眼，啲貨比傳統眼鏡鋪去得快好多。」少爺占除了賞識他們之外，更主動幫他們宣傳：「佢會將我哋嘅 product拎返去電台介紹俾啲明星，佢真係好唔話得。」
而明星效應這招果然見效，一次少爺占游說阿 Sa及 Joey試戴他們的太陽眼鏡後，開始令品牌廣為人知：「有一次活動，佢哋同場戴埋同一款眼鏡，有傳媒將個焦點放喺副眼鏡度，真係吸引咗好多人留意！」當時 Hachill僅開業半年，二人已深深感受到「明星效應」帶來的影響，但阿輝有感少爺占太忙，不敢太打擾他。這時另一「波友」 Keith的加入，正好填補對外宣傳的角色：「當時想發大嚟搞，咁啱 Keith入咗股，知佢喺娛樂圈識得多人，所以就由佢着手搞推廣工作。」阿輝直言贊助藝人，比賣廣告更易「入屋」，但機會得來不易：「如果係大牌嘅明星，佢哋都有好多外國大牌子爭住俾眼鏡佢哋，要佢哋肯都唔易。好彩好多藝人都想幫番本地品牌做宣傳，我哋要花多啲工夫，眼鏡設計得啱佢哋形象先有機會。」
Keith加入公司後，由於認識郭富城（ Aaron）的經理人小美，第一時間就說服 Aaron在演唱會佩戴他們的眼鏡：「嗰時 Aaron就嚟開演唱會，爭副太陽眼鏡未搵到，我哋嗰陣時就拎咗十幾副俾小美揀，最後 Aaron就揀咗一副，之後場場都戴！」「 Aaron效應」令該款太陽眼鏡銷售激增：「當時出咗三十幾副，新聞出咗無幾耐就賣晒，我哋唔想同一款出咁多副，所以就無加推，但係品牌多咗好多人識！」
第二招 打游擊
明星效應不是常有，求人都要靠自己。 Keith入股後，手頭資金鬆動，三人就決定開自己鋪。不過，一開始他們沒有心雄要租商場鋪，反而睇中商場內的快閃店。阿輝解釋，這類流動檔攤，是根據貨品種類來招租，每一款貨品一次都不會給太多品牌，而商場為求新鮮感，都會以短期租約形式來招租，「 Pop-up store唔使點裝修，簽半年租約，計過條數，蝕極有限！」最後他們決定在海港城 LCX開第一間快閃鋪：「嗰邊人流好夠，對方應承咗簽半年約，之後每三個月續一次。」
點入一線商場快閃店？
很多年輕人建立潮流品牌後想進駐一線商場，但往往因貴租而卻步。阿輝建議剛創立品牌後可先到元創方等創意工作室站穩住腳，多找傳媒宣傳，儲夠一定知名度，就可以到各大商場的 Pop-up store「叩門」：「佢哋唔一定要大牌子，唔好一開始就諗住唔得，要有周詳計劃。」以下為他推介租 Pop-up store的地方：
快閃店 present成功秘笈
產品款式夠突出，要有 gimmick。
做足功課，了解行業發展，能說出自己產品獨特之處。
商場最喜歡舉辦活動刺激人流，最好能邀請藝人，不一定要大牌。
雖然經營了九個月，就因為太多眼鏡品牌進駐商場而要撤出，但埋單計數都賺了六位數，令阿輝對這種流動檔攤模式更有信心，「嗰時香港鋪租開始貴，而且我哋賣眼鏡唔使太多地方，呢類型嘅鋪都係三至五萬蚊租，租約期短，蝕晒都有數得計。」每當五月至九月太陽眼鏡旺季，輝就重點出擊開鋪：「要一年前同商場傾定，半年約嘅話租連按金雜費平均要廿幾萬。」
實行游擊戰術多年，阿輝專家般分析：「千祈唔好貪平租啲唔旺嘅鋪，最後只會白做！」而游擊戰最終目的，都是想入鋪：「唔同區人流客源完全唔同，短期約就可以試到商場客源啱唔啱我哋，我哋之後有做出口生意，入鋪對品牌形象會好啲，但係貿貿然放太多錢入鋪好易蝕晒。我哋上年開始喺銅鑼灣希慎開咗 Pop-up Store，做咗半年，商場見我哋做得唔錯，都肯租間鋪俾我哋。」
心雄曾累事
眼鏡生意看似一帆風順，但隨着規模愈做愈大，阿輝三人就需要不斷「加碼」投資，加上心雄想進軍海外，一度將他們「綁死」，「一二年起，海外有唔少買家對我哋牌子有興趣，想試吓發展其他市場。但係我哋生產要俾晒錢先，但係出去賣最少兩個月先收到錢。好多時就要『責』住條數。」
Jesper直言當時大家見有發展機會就不捨得放手，導致經常周轉不靈：「當初無諗過發展咁快，大家都驚個牌子做唔起就唔興，入鋪裝修又要一大嚿錢，唯有厚住面皮，問本地熟客可唔可以俾咗錢先拎貨，我哋三個人又要不斷放錢投資。」
生意漸上軌道，阿輝說今年是賺錢關鍵，「做咗呢個品牌都有四年時間，回唔回到本今年都幾關鍵，因為 Pop-up Store嘅投資都開始穩定，要俾最大嚿錢嘅時間都已經過咗，今年如果生意都 keep到嘅話，就可以回本！」首次創業，阿輝大有感觸：「如果唔係對眼鏡有興趣，我諗都捱唔到而家，因為真係好多嘢煩！但係見到愈嚟愈多明星戴，又做到一個香港牌子出嚟，滿足感都幾大！」
開業資料（ 3/2013）
租金連行政費# $160,000
快閃店設置 $80,000
入貨 $25,000
雜費 $50,000
總投資 $315,000
*海港城 LCX店，之前以寄賣形式營運
#二按一上，每月租金為$45,000或 33%營業額，以較多者為準
營業資料（ 4/2015）
營業額 $390,000
租金 $135,000
人工* $60,000
雜費 $75,000
盈利 $120,000
#三間分店，不包括本地及海外批發
*三個全職、八個兼職
|
鍾意就快D Share啦！
|
|
|