陸詩韻屋企有新成員 微博貼BB超聲波相
2015-05-09 16:40:00
個BB唔係詩韻嘅，係佢細佬嘅。(攝影：沈健程)
陸詩韻、張慧儀、吳日言、何紫綸等今日喺銅鑼灣出席張學潤代理日本嘅美容產品，對於陸詩韻早前喺微博上載一張BB超聲波相，仲留言表示家中多位新成員，佢今日解釋係細佬個BB喺9月會出世，就快成為姑媽嘅佢仲話：「我太心急，係弟婦Send咗啲相畀我，可能我又寫得唔清楚。」仲以為陸詩韻做未婚媽媽，佢話：「唔會，我好傳統，希望過一、兩年二人世界先生BB。」不過佢話正等待真命天子出現，有冇追求者﹖佢話：「可能有，但同我差唔多年紀嗰啲就比較小朋友啲，我想搵成熟啲，工作多啲經驗。」要有經濟基礎同有樓﹖佢話：「樓唔係擺喺第一位，大家要經濟獨立，唔需要你養我我養你，就算結咗婚，女士都應該要出嚟做嘢。」
講到母親節，張慧儀指囝囝畫咗幅畫畀佢，仲寫住「媽媽，我愛你！耶穌愛佢。」搞到張慧儀好開心。講到囝囝今年已經十一歲，佢表示囝囝開始有主見，仲話：「冇主見就驚，我成日同佢講，媽媽搵食唔容易，畀佢知道生活唔係容易，所以我會叫佢煮飯洗碗，洗唔好，唔緊要，一定要畀佢試下做，我唔會縱佢，但我好錫佢，每日我會同佢講『你係阿媽嘅心肝仔。』，但如果佢唔啱，我會話佢，我依家都醒起佢噚日個飯盒未洗，我要打返去叫佢洗。」
陸詩韻話等緊真命天子出現。
張慧儀指囝囝畫咗幅畫畀佢。
|
鍾意就快D Share啦！
|
|
|