父親節打開心扉 梁奕倫爸爸包容出櫃
養兒一百歲，長憂九十九；簡單十個字，卻道盡所有父母心聲。中國人思想遠較西方保守，男丁負責傳宗接代已是傳統，惟普天之下存在不同性傾向人士，結婚生子並非必然。梁奕倫（Roland、現改名梁梓禧）前年大膽宣佈出櫃；但面對老父，從不談論身邊那個「他」，難得他有個不一樣的爸爸，願意打開心扉說亮話，一句：「我不反對同性戀。」令Roland將所有包袱放下！
剛度過43歲生日的梁奕倫，前年宣佈出櫃，又自爆22歲失身給圈中前輩，但原來一直沒膽量向86歲老父「表白」。積壓了兩年的心結，終於在今年父親節前夕得到紓解，本報娛樂版早前悉心安排Roland與爸爸面對面坦誠講出心底話，原來那些難以開口的說話，早已在兩父子的互相關懷中傳遞到彼此心中，一切盡在不言中。Roland更親自操刀幫爸爸洗剪恤，造就了最窩心的父親節禮物。
■身為孻仔的Roland最得爸爸疼錫。互聯網圖片
■兩父子坦誠講出心底話，Roland感動得擁着爸爸親吻。
攝影：仇志德
髮型：Charles Wong of ALCHEMY SALON
服裝：unEnding
■Roland曾與陳志全、黃耀明等參加同志遊行，爸爸看到新聞後已有「心理準備」。資料圖片
一個短訊拉近距離
俗語有云孻仔拉心肝，有三個姐姐的Roland在家中排行最細，梁爸爸更直言：「阿仔喺我心目中一向都係乖乖地，好少話出去玩去踢波，不過都冇乜勞氣嘢，佢真係好聽話。」問梁爸爸如何面對兒子是同性戀者？他毫不忌諱說：「其實我一早就知！」他續謂：「我喺報章上見到佢同陳志全議員（慢必）一齊參加呢類遊行，我已經諗到佢有呢個傾向。」梁爸爸承認最初知道時有點抗拒，因為父母總希望兒子會結婚娶妻，但既成事實雖然有失望亦會尊重，他說：「世界各地好多同性戀者都係知識分子，而且呢啲係先天問題，我會原諒我個仔。」
Roland當年18歲已經搬離屋企學習自立，兩父子很少機會溝通，但一個短訊卻打開了這道門。Roland爆梁爸爸一向愛用文字與子女交流，今年1月學懂用WhatsApp，便向他發了一個短訊：「爸爸第一個發畀我嘅只有七個字，就係『我不反對同性戀』，當時我真係反應唔到過嚟！」梁爸爸坦言兩父子一向沒有坐低傾這些問題，當日若沒有寫那個短訊，也可能會詐作不知兒子的性取向，Roland則說：「我一直擔心你係咪可以接受到，估唔到你會自己察覺到。」梁爸爸即笑笑口說：「我記得你點回覆，你寫咗『多謝支持』！我雖然係30年代嘅長者，但都諗得通。人死如燈滅，仲講乜嘢傳宗接代？」
放下心結原來很容易，但社會上的歧視卻從來沒有消減過，早前，慢必在港鐵被兩女一男侮辱性取向，梁爸爸搖頭說：「得罪講句，呢啲人知識水平低，同佢講乜都唔會聽。我寄語兩位阿姐，你嘅家族、朋友親戚都可能有咁嘅人（指同性戀者），你都未必知，我希望兩個阿姐積吓口德！」喜獲老父接受性向，Roland擁着爸爸親吻，他更特別寫了一篇自白：「如果命運能選擇，我會選擇做異性戀者，呢四十年以嚟，我虧欠爸爸太多，但我一直都希望用自己嘅力量去為平權出力，希望爹哋可以體諒有一個不一樣嘅兒子。」
撰文：小米
■第一次幫爸爸剪髮，Roland全程雞手鴨腳，十分搞笑。
蘋果20年 企硬我敢言
http://20.appledaily.com
|
鍾意就快D Share啦！
|
|
|