神隱14年既黃宏舜（娃娃舜）噚晚喺荔園同雨僑合唱《娃娃愛天下》，情況一如當年喺婦女節目既表現一樣，獨特風格兼同怪異唱腔，唱到高音位就走音。 嗰陣喺節目做評判嘅江華，揶揄娃娃舜「過份自信」，呢段片喺網上瘋傳咗好耐，0依家娃娃舜再現人前，又點可以唔搵番江華再評一評佢既表現！
轉咗行做保險既江華，今日接受《蘋果》既電話訪問，佢話：「我睇咗嗰條片， 同十幾年前分別唔係太大，我所指既係嗰個演繹，依然係走音、高音又唔到，唯一唔同嘅係肥咗，我唔係要話佢啲乜嘢，如果佢真係要唱歌，其實應該要搵個人學唱歌，基本既音準都唔到。」講番當年既批評，江華話：「10幾年前我話佢太有自信嘅意思，係有自信到地步到好似唔駛去練，唔駛求證自己問題喺邊，走音到咁都夠膽企出嚟唱，仲要上電視喎，唔係喺屋企個沖涼房，所以我咪強調係咪自己唔知？我唔係批評佢，係鼓勵佢，做人應該有啲自信係枱起頭，喺片見佢成熟咗，信心嚟得強烈啲，自然啲，建議搵導師去指導吓。」
娃娃舜一出，坊間有唔少有人覺得佢既堅持好有意義，江華就話：「呢個勇氣係嚟自好多人俾，假設今年如果冇人提呢個人，冇人再去講呢一事，咁你就消失咗，但係今年有人去提佢，有人去講佢，話好想聽你唱，想見到你呢個表演，呢個咪無形之中俾咗勇氣對方，所以點解話人係要互相鼓勵、關心同關懷，呢個係一個無形嘅力量，係一個好強大嘅催化劑。」
唔知江華又有冇佩服佢呢?佢話：「咁睇吓你從邊個角度去睇，你真係唱歌，搵個人學吓，起碼知道乜嘢叫走音，宜家個問題係咪叫唔知，唔知高音唔到，唔知自己走咗音，呢一樣係好緊要，即係同做人一樣，係咪知道自己不足，抑或覺得自己好好，如果你覺得自己好好，咁咪唔駛進步囉，但係你覺得自己都唔夠，咪去學習繼續提升自己，呢啲係兩樣嘢嚟。」但係佢都覺得成件事係好事：「大家都好關心某啲人，或者互相關心，呢件事一定係好，但係最緊要知道自己問題喺邊，然後對症下藥。」
|
鍾意就快D Share啦！
|
|
|