又有香港歌手參加內地歌唱比賽節目！李克勤最近代表香港出戰江蘇衛視嘅「蒙面歌王」歌唱比賽節目，節目以6位歌手戴面具參賽遮樣做噱頭，克勤以「白棱鏡」look出場，演繹陳奕迅嘅廣東歌《富士山下》及張學友國語歌《忘記你我做不到》，跟同場的「黑天鵝」、「羊駝」、「狼牙」等爭勝負，據知其他參賽歌手是孫楠、許茹芸、李泉、歐弟和蔡健雅。
噚晚節目喺內地播出第一集，克勤成為首周冠軍，全港十九區業餘歌唱比賽出身，已30年沒參加比賽嘅克勤話：「公司叫我參加節目，我都諗咗一陣，後來得知比賽係蒙面，覺得好得意，好想知道當大家唔知我係邊個時，會唔會都鍾意我把聲呢？我又想做個榜樣畀個仔，等佢知呢個世界處處充滿競爭，凡事都要盡力做，先會有成果。」節目播出後，克勤同囝囝講：「比賽輸贏唔係問題，問題係你有冇盡力。」
呢個節目唔止歌手要蒙面，連助手、髮型師、化妝師都要蒙面，以防畀人估到邊個歌手參賽，克勤話：「我連自己要同邊啲歌手比賽都唔知道，只知道係五個歌手，第一輪六選三，第二輪三選一，贏咗個個就係本週歌王。」節目仲嚴謹到歌手喺後台都唔可以打招呼同傾偈，克勤話：「連去廁所都要通知，電視台要清場，唔希望歌手上廁所會碰到其他人，哈哈。不過我行出化妝間準備上台，就遇上蒙面歌手，第一眼就估到蒙面中有一個疑似孫楠，女歌手就真係估唔到嘞。」
當節目宣佈佢贏得第一集歌王時，克勤表演非常激動，克勤話因為揭開面罩之後，現場觀眾知道佢係邊個就大唱《紅日》：「我哋喺常州錄影呢個節目，去到咁遠，真係冇諗過全場觀眾都識唱《紅日》，所以突然好感動。」
其實「蒙面歌王」本身係韓國節目，俾一批普通人蒙面參加比賽，大家唔睇樣，純聽聲，就會知道自己平時可能靠視覺錯過好多好聲音，但o依家江蘇衛視呢個，位位仁兄都出道超過十幾年....觀眾有可能認唔到佢哋把聲.....?同埋其實克勤真係只係戴住一個面具，冇斗篷冇帽，要估係佢，好容易囉....
|
鍾意就快D Share啦！
|
|
|