李文頌（頌仔） 20歲（左）
城市大學專上學院日語研究 Yr.1
林曉彤（曉曉） 19歲（右）
中文大學高級文憑多媒體創意廣告 Yr.1
要扮得神似，首先個 look一定唔可以馬虎，拍攝當日頌仔同曉曉起碼照鏡過百次。
Main Camp
Cosplay迷上癮 中大妹：好享受俾人圍影
動漫節今日玩完，動漫迷𠵱家多數匿喺屋企拎住啲戰利品慢慢歎。讀中大嘅林曉彤（曉曉）和城大嘅李文頌（頌仔）自細已超迷日系賣萌動漫，二人每年必去動漫節，不過唔係去瘋搶限量 figure，而係喪玩 Cosplay滿場飛！人人以為玩 Cosplay好嘥錢，佢哋兩個卻自食其力，冇使過屋企人一蚊之餘，仲竟然有錢搵！
曉曉同頌仔係 Cosplay組合 9RUSH嘅成員，專扮日本動漫《 Love Live!》橫掃本地 Cosplay比賽冠軍，仲代表過香港去日本參加世界 Cosplay大賽。今年動漫節更加變成表演嘉賓，曉曉話：「上年有朋友見我咁迷 Cosplay，就介紹我去參加 9RUSH，結果成功入團。」 Cosplay感覺一向係毒，但曉曉卻好自豪：「時代唔同喇，以前着住啲 Cosplay衫出街，每行一步都可能俾人藐，但𠵱家啲人會爭住圍我哋影相，有時啲家長見到我哋經過，都會問佢哋仔女同唔同姐姐影相，個心真係好爽！」
怕醜妹自信晒
Cosplayer勢力抬頭，但曉曉表示受歡迎也有「幸福嘅煩惱」：「因為我哋扮《 Love Live!》走賣萌路線，所以啲衫唔會太性感，都慶幸未試過俾龍友摸手摸腳。不過俾幾十個龍友圍住影相，自己得嗰 20歲都會好緊張，記得有一次明明背脊標晒冷汗，都要 keep住笑扮輕鬆！但自己好享受，因為我唔似𡃁模樣靚身材正，如果唔係 Cosplay嘅話，根本唔會有人注意我。」
Cosplay化妝起碼要 1、 2個鐘，上妝前佢哋都係好典型嘅「怕醜妹」，講嘢陰聲細氣，到化完妝換好衫一埋位影相， 2個都自信爆棚連 chok十幾個可愛 pose，曉曉話平時訓練有素：「平時一得閒就上網睇自己扮嗰套動漫角色，玩 Cosplay經驗好緊要。好彩我哋條 team有得成日出商場騷或者去其他地方比賽，而且經理人（阿 K）都成日教我哋點去揣摩，連擺隻手喺心口，貶吓對眼都有學問。」
玩到咁 pro， Cosplay可以當做職業都得，頌仔卻大唱反調：「雖然忙起上嚟一個月有成 10幾 20個 job，除咗商場騷，有時會幫啲 Cosplay新手造吓衫收手工費，又或者俾龍友拍吓硬照，但其實大部分收入都會用番落買料整衫，一套隨時 2、 3千蚊，所以一定賺唔得多，自己當興趣算。不過日日都可以對住 Cosplay，又唔使問屋企人攞錢整衫，我覺得好過返 A&F兼職！」
化足兩粒鐘
每次出騷除咗化妝 set頭幾粒鐘唔在講，曉曉話由朝到晚都戴住大眼仔，次次返到屋企隻眼都會紅晒，不過為咗靚，冇計
師傅簽 2隊
9RUSH經理人阿 K玩咗 16年 Cosplay，依家亦係男子 Cosplay team組合 Fruit Punch嘅隊長。阿 K坦言日本人早就視 Cosplay為職業，自己只係步㗎仔後塵，希望嚟緊都可以大力推廣 Cosplay。
動漫節必𥄫Cosplayer
動漫節開鑼對一眾龍友同 Cosplayer來說，十足歌手參與年尾樂壇頒獎禮咁重視，所以個個着到行，希望被野生捕獲！
冰雪大熱
玩咗 Cosplay六年嘅 Candy（左）扮演《冰雪奇緣》中的 Anna，而扮演 Elsa嘅 Aya（右）更加玩咗 11年。不過原來佢哋冇夾埋，嚟到會場見大家咁啱 key，索性企埋一齊任影。
腿唔怕露
仲係學生嘅汪汪君玩咗 Cosplay只有 2年多，但深明「遊戲規則」，着條高叉旗袍扮弱音 V家，又殺死一班龍友，識揀！
|
鍾意就快D Share啦！
|
|
|