掃呢頁CODE去手機

2015年8月26日 星期三

10年冇拍拖 劉心悠:未試過轟轟烈烈愛的一場 [FACE - 431 - 專訪] 心悠,劉心悠,MF,



真人騷

10年冇拍拖 劉心悠:未試過轟轟烈烈愛的一場

呢個暑假,劉心悠好忙。

同一檔期,兩套戲上畫,而《燈塔下的戀人》(另一部是《有客到》)三條感情線,人哋宣傳係一 pair pair打孖上,唯獨心悠要單打獨鬥……原因簡單,同佢扮情侶嘅劉浩龍因為講錯嘢得罪全香港網民,收埋自己幾個月都未敢出嚟見人住。

係囉,點解有啲人成日出事, 34歲的劉心悠出道十年都未出過事?

原因,佢話很簡單:「我份人低調,少機會講嘢,就自然少機會講錯嘢!」

聽埋落去,其實一啲都唔簡單。

原來打從十年前被選中主演《阿嫂》,劉心悠一到港就自動啟動「工作模式」,既然係工作 mode,所以該檢點的地方就要檢點、不能犯的錯就絕對不會錯、工作上遇到的所有異性一概不會有遐想……簡單嚟講,即係香港是她的辦公室,「心悠 BB」就是她在公司裡扮演的角色,從來唔會出事,因為她從來不會放鬆、把香港當成家:

「我喺加拿大、台灣、同美國都有置業,唯獨香港係租屋住;想抖下,我會去旅行,但返到呢度,呢十年我淨係識去影樓同片場;我未試過轟轟烈烈愛一場,冇所謂喎,人冇咗愛情又唔會死;我唔介意當『心悠 BB』係角色扮演,但嗰個一定唔係我,有一日呢個角色我扮到夠,話停就停,我會即刻走……」

說起來冷酷,不過心悠說的時候全程帶着笑。

笑容係真嘅,不過她那一臉的降晒 watt的倦容也是真的。睇得出,做 BB呢件事,真係好攰。

寧願錯過,都唔想後悔

我覺得心悠 BB俾人感覺,有啲似仙女。

我嚟緊飛去北京拍古裝魔幻電影,都係扮仙……自己對住自己唔覺似仙女,我係一個唔似女仔嘅女仔,可能講嘢細聲,所以我呃到好多人。

話你似仙女,因為好少人入行十年似你咁少負面新聞,好叻!

我覺得唔係叻,係 luck。我好感恩,呢一行我入嚟都係誤打誤撞,乜嘢都從零開始,我都係當一門新嘅科目由頭學起。

有人形容你呢十年係行為檢點,係唔係真係咁小心唔想行差踏錯?

越小心越易出事㗎!不過我低調係真嘅,因為講嘢嘅機會少,所以講錯嘢嘅機會亦都少,冇人教我做呢行應該要小心啲,定放開啲,係我性格怕醜又男仔頭,讀書嘅時候已經係咁。

男仔頭?睇你唔出喎!

我唔識打扮,唔留意 fashion,既然唔識分點為之好睇、點為之唔好睇,所以永遠吊帶褲,包保唔會出事。好多人話我唔適合呢行,但係現實就係咁,未來嘅嘢好難計算。我偶像 Robin Williams都有嚴重嘅自閉症,但係佢一上台就變咗第二個人。可以做啲咩,唔需要其他人話我知。

你發脾氣係點㗎?

會唔出聲、全身震晒,上次咁激動係拍《我老婆係明星》,有場戲誤會咗我老公周柏豪……拍完之後,好似發洩咗咁。

自己嘅真實生活呢?難道冇脾氣?

冇,我咁大個人未試過嬲人,淨係試過嬲自己做得唔夠好。我越嚟越鍾意表演,覺得自己把握嘅嘢越嚟越多,但我始終對自己好嚴格。我知道自己演技始終唔係學校訓練出嚟,當我意識自己不足,就不斷調教自己。

做演員,係唔係真係拍戲可以彌補生活經歷不足?

真係㗎!尤其係恐懼,明明就係驚,但係又一定要做,因為嗰個係角色唔係你自己。呢個時候我就要催眠自己、呃自己,做到為止。

比如話你驚啲乜?

裸露……我記得有一部電影(《軍雞》)要我做妓女,當時入行唔係好耐。導演鄭保瑞 sell我時,個故事我好 buy,但係嗰個尺度我去唔到……要 bra top甚至裸露,最後要導演為咗我調適個角色。

嗰下你怪唔怪自己?

非常怪,嗰晚返到屋企大喊一場……我嘅尺度對好多人嚟講唔算得係乜,但由嗰晚開始,我確實係開始逼自己接受更多嘢。之前有套戲我好鍾意好鍾意,但係全裸,最終我都係接唔到。𠵱家十年,我先至開始可以露背……對我嚟講,已經係好大進步,係就係慢咗啲,但要俾啲時間我……

你唔怕到有一日你接受到……

我已經老咗,冇人想睇?冇所謂,如果呢個行業有分年期,錯過咗咪由得佢錯過囉,最緊要做嘅決定唔好令自己後悔。

冇愛過更特別!唔怕拖唔會死!

仲有呢?十年冇拍拖,係唔係可以喺戲入面搵到?

可以搵到愛情感覺,但係好短……

真係十年都冇拍拖?

真係冇,有鍾意過、有感覺過,但係從來冇機會開始。我諗我似 Robin Williams一樣有啲自閉……我真係好鍾意 Robin Williams,佢對我嚟講,係神。

點解你出親街都係同媽咪?爸爸呢?

媽媽係我唯一屋企人……爸爸離咗婚好耐,住喺好遠嘅地方,咁多年都係同媽媽一齊住。爸爸媽媽喺我好細個嘅時候離婚,然後復合,然後又分開……我嘅童年就係見證住佢哋兩個分分合合,係陰影。我唔拍拖嘅原因絕對有一個層次,係因為佢哋感情唔成功。

你嘅性格似邊個多啲?

細個似爸爸,𠵱家似媽媽,更加鍾意收埋自己。

個女咁優秀,但係成日黐住自己,媽咪有冇擔心你?

以前會,自從跟過我出 trip做過嘢、見識過呢行開工咁辛苦,佢就開始唔出聲。因為呢行需要付出好多精神同體力,換着佢未必應付到,所以佢會由得我。

工作以外嘅劉心悠係點?

以前唔係開工就一定喺屋企,舊年開始自己開工作室,多咗一站,就係公司。同埋呢幾年,開始識得偷時間去旅行……一個人。

你喺邊度遇過有好感嘅男仔?

佢哋都唔係呢行,感覺好快就走,因為作息唔同,根本冇機會可以開始。

未試過對呢行嘅男藝人有 feel?

冇,從來冇……個個同我合作都靚仔,會吸引到我嘅元素,靚仔肯定唔算其中一個。

入行前呢?拍過幾多次拖?

幾次囉……但全部係 puppy love,我從來未試過對一個人愛到要生要死、嘔心瀝血。人哋問我會唔會覺得少咁啲嘢,我又唔覺得喎,我對我嘅人生好知足,唔覺得係缺乏,反而覺得自己好特別!真愛我都憧憬,但係唔會因為人哋催我去加快腳步,你千祈唔好作作狀狀話介紹朋友俾我識,我覺得咁樣件事唔夠 organic!

當正心悠 BB係角色扮演

Organic咁得意?點解你可以連緋聞都冇?

我諗我將愛情嗰樣嘢 shut down咗,關我對香港嘅歸屬感事……香港太快喇,我精神差小小都怕跟唔到,再拍埋拖?我顧唔到咁多樣!

你一返嚟香港,就係開工模式?

可以咁講,一到香港,我淨係知自己係嚟做嘢,唔係嚟玩。只要離開香港,唔理喺邊度都好,節奏慢番落嚟,我就可以熄咗個工作 mode。呢樣嘢唔可以怪我……講真,喺香港十年,你問我去過邊?除咗影樓、除咗片場,真係邊度都冇去過,我冇機會用心認識香港。所以 people get the message,從來冇人追我。

連追都冇?

我唔 buy「追求」呢兩個字,係你嘅又使乜追呢?

所以人哋叫你女神、當你係心悠 BB,你都冇感覺?

我直情會滴汗……我唔介意當「心悠 BB」係個角色去扮演,但係你問我嗰個係唔係我?一定唔係!有一日呢個角色我扮到夠,話停就停。

因為父母婚姻失敗,你更加覺得工作更實在?愛情靠唔住?

冇錯!愛情好似 accessories,你唔可以話完全唔需要佢,佢會令到你嘅人生更加漂亮,但係冇咗佢亦都唔會死。等於做嘢,妝要化、衫要着,但係唔戴表?唔會死囉!

我真係第一次聽一個女仔咁樣形容愛情。

真㗎,我曾經有個朋友想出家,個個都唔支持佢,但係佢說服咗所有人,呢樣嘢令佢開心同解放,我同自己講,出家對我嚟講可以做 plan b。

你真正響往嘅愛情係邊種?

《燈塔下的戀人》呢種,呢個角色 crazy about印度文化,佢遇着劉浩龍,亦都一樣。我諗我喺爸爸媽媽身上睇到,搵到相愛嘅人容易,但係相愛以後一齊進步、步伐一致真係好難,我覺得好灰,因為一世人未必真係會遇到一個咁嘅人。我睇韓劇、日劇都唔係睇男女主角……

咁你睇咩?

我鍾意睇啲 side cast,上咗年紀嗰啲老夫妻,一齊鬥嘴、一齊搭嗲,做咩都一齊,呢件事我真係覺得好浪漫。我就係想搵呢個人,搵呢一種安全感。

點解喺香港唔買樓?

因為呢度係做嘢嘅地方,我租屋住租咗十年。冇諗過喺呢度,反而台灣、美國我有置業,之前聽人講 LA值得投資,我買咗張機票就飛咗過去睇樓。我好大膽,之前未去過 LA,但呢種大膽係冷靜嘅大膽。我唔會俾自己行差踏錯。

點解你咁清晰?咁小心?

呢樣嘢又係家庭俾我,太細個爸爸媽媽已經分開,冇人得閒教我,所以我自己教自己、自己糾正自己,唔俾自己機會行錯、做錯。

專業

一整天直落七個訪問,排到我已經是最後一家,真心佩服心悠,攰還攰,不過一直保持笑容,每個問題思前想後,一點也不 hea。

嗰個係心悠 BB,每做完一間傳媒,集郵是常識吧。有求必應到天黑,我見到心悠和不知道哪家的攝影師合拍完寶麗來,係親自幫口吹張相,吹到個攝影師紅都面晒囉……呢啖氣,我見到專業。

撰文:朱小博

攝影:范仲良

化妝: Annie G@Annie G Make Up Centre

髮型: Eric Chow@Xenter

服裝: Maryling、 MAGinshop

場地: Fashion Farm Foundation

鍾意就快D Share啦!