平日惜肉如金的蔡少芬，罕有在內地真人騷《偶像來了》大晒滑溜玉背。
探熱針
蔡少芬 2600萬氹女
養一個小朋友要 400萬呢條數早就 outdate！有湯圓（楚兒， 4歲）同包子（信兒， 2歲）兩個女的蔡少芬已經使凸。好媽媽未雨綢繆， 13年分別在油尖和灣仔，包抄港九兩個名校網買下二千多萬磚頭；見兩姊妹開始大，要更多活動空間，加上老公張晉在影圈成功打出頭，愈搵愈多，於是再入市，以 2,633萬購入元朗爾巒 1,694呎洋房。
名校網落定釘，舒服大屋又準備好，蔡少芬安樂晒！
包抄港九名校網
蔡少芬買落不少磚頭，但幾乎每次入市，都離不開為兩個女的將來。
一一年同張晉二人世界變三人行，蔡少芬用七百萬買下錦繡花園迎接大女湯圓。女兒開始入讀幼兒班後，為了日後入到傳統名校，一條龍完成中學課程，一三年底，蔡少芬以千二萬買入屬於三十一校網（女拔萃、聖瑪利）的凱旋門外，再買埋十二校網（瑪利曼、聖保祿、聖方濟各）的灣仔囍匯一房複式單位，九龍港島，兩邊包抄。
「以前 Ada無特別計劃買樓保值，直至湯圓開始讀書，聽身邊朋友講得多，先知小朋友要入到好學校，其實要好早就準備，所以佢先喺好嘅校網區買樓，香港九龍出名嘅女校，佢都搵定料，好保險。」蔡少芬身邊人透露。
富貴逼人再入市
揸住三個物業，蔡少芬已經好滿足！減 job湊女的她，最近和林青霞齊為內地節目《偶像來了》開工，一個星期飛內地兩日，收入和味，其實自從《甄嬛傳》開始，蔡少芬在內地夠人氣，商演密做，早已搵落唔少；加上老公張晉憑《殺破狼 II》名氣身價翻幾番，即使最新叫價四百萬人仔，依然大排長龍，目前至少有五部電影接洽中，其中包括籌備當中的《殺破狼 III》。
富貴逼人！蔡少芬和張晉忍唔住再郁手入市。
「湯圓、包子開始大， Ada都成日提住，覺得錦繡康樂設施唔夠，兩個女無乜嘢玩，又嫌間屋唔夠大，張晉父母嚟探孫或者親戚朋友聚會，人稍為多屋企地方就好逼狹，心思思搵地方搬。」
過去幾個月，兩公婆有時間便睇樓，目標是同區的獨立洋房，但不是嫌太舊、設施不足，便是價錢超出預算，直至元朗新盤爾巒開售，蔡少芬覺得啱晒一對寶貝女，睇了兩次，便拍板以二千六百三十三萬，買入一千六百九十四呎迪維尼亞大道雙號屋。
要定時定候飛內地做《偶像來了》外，蔡少芬亦接了古天樂主演的新片《 Z風暴 2》，湊女重任，暫時交給老公張晉。
上週六（八月二十二日）下午四時，張晉一手抱住細女包子，同外傭姐姐推住湯圓現身圓方。問他老婆去咗邊？「開工拍戲，喺香港。」張晉說。
打得湊女都得
見到商場為暑假而設的糖果迷宮有馬卡龍擺設，湯圓跑上前摸，跟在後面𥄫到實的張晉阻止，眼仔圓圓愈大愈靚的湯圓聽話立即縮手：「我摸吓咋！」
張晉叫兩姊妹坐到公仔旁邊影相，「同家姐一齊，攬住家姐……望住爸爸。」臨走前，又主動叫大女湯圓同記者講再見。
張晉湊女有板有眼，蔡少芬無後顧之憂。
校網區落手
蔡少芬和張晉投資磚頭，目標為本，方便兩個女兒將來入學，手持五個物業，市值超過半億，其中兩個位處名校網。
賺錢夫妻
11年，蔡少芬憑劇集《甄嬛傳》於內地迅速走紅，近年與老公張晉拍住上，愈來愈有！
撰文、攝影、攝錄：娛樂組
插圖：詹震寰
nextplus.nextmedia.com
|
鍾意就快D Share啦！
|
|
|