今年34歲嘅「咪神」梁政珏，1月喺香港擺酒，秘嫁大佢10年嘅生意人何思源（John）後，早前公佈有喜兼一索得男陀B仔，依家已經懷孕27週。而梁政珏前幾日就好開心喺網晒肚內B仔掃描相，又話醫生讚囝囝鼻高下巴尖，絕對係靚仔一名，令佢好開心。
不過，本報收到消息，梁政珏噚日喺屋企突然有出血問題，最後要打999急送醫院，好彩當時老公何思源喺屋企，有人陪佢入醫院。本報啱啱揾過梁政珏問佢係咪入咗醫院，佢用短訊回覆話：「多謝關心！依家喺醫院休息緊，因為醫生話BB隨時會出世。」
其實梁政珏之前已經講過，佢除咗遺傳媽咪子宮出現後屈，仲有胎盤前置，以及好似台灣藝人徐若瑄咁有胎盤位置過低嘅問題，為免分娩可能會導致出血過多，佢一早已經計劃會開刀生，之前亦聽醫生話成日喺屋企瞓，只係瞓都條腰都腫咗，佢先至去曬下太陽，諗住畀自己申展一下。問梁政珏知唔知今次點解會突然有出血問題？佢就話唔知道，但承認近日睡眠質數好差，可能因為就嚟生，所以好多嘢都好擔心，一擔心就會喊到收唔到聲。
梁政珏透露：「醫生依家要同我打針，話要令BB個肺健康啲，因為阿囝隨時會出世。」講番噚日入醫院嘅情形，梁政珏話嚇到老公鼻哥窿都冇肉：「我依家好早就起身，噚日一早我喺屋企食食吓早餐，菲傭姐姐見到我條裙好多血，原來我流緊血自己唔知，諗住扶我起身換衫去醫院，點知一起身仲流得勁，最後惟有即刻瞓番喺梳化，老公本來未起身，菲傭姐姐即刻叫醒佢同打999叫白車送我入醫院。」
梁政珏話佢噚日仲先後去咗兩間醫院，因為第一間醫院嘅醫生話佢好可能隨時會生，但冇晒BB床，所以再送咗佢去另外一間，梁政珏話：「依家唔會有私家醫院肯收我，因為我胎盤前置嘅程度係type 4，即係話最嚴重嗰隻，一定要政府醫院先有最好嘅儀器，本來諗住去外國生，依家都要打消呢個念頭。」
|
鍾意就快D Share啦！
|
|
|