36歲 Niki過生日前已向舊愛徐正曦提出分手，並於一個月前正式搭上新歡，北京居港張姓石油大亨。
封面
徐正曦借糧送 120萬瑪莎拉蒂 周麗淇揸乾前度上石油大亨
兩年戀情突然死亡， 36歲周麗淇同 30歲內地小生徐正曦呢頭分手，嗰頭就爆出徐正曦有 19歲混血新歡喎……姊弟戀觸礁就一定係弟弟貪新忘舊衰花心？信嗰個就真係要贈你一句「少年，你太年輕了！」
實情係小鮮肉嫩口，卻敵不過石油王香口， Niki三個月前結識強國石油大亨即撇徐正曦，最慘係臨俾人撇，徐正曦至向公司借百萬糧買名車向娘娘進貢，小鮮肉人車兩失，陰功囉！
曾幾何時， Niki都係有情飲水飽嗰班，陪賺人仔發蹟前嘅鄭嘉穎度過最霉日子、又因為一套劇《大漢賢后衞子夫》就日久生情，戀上身份、年齡都差大截嘅徐正曦。不過女人青春有限，有嫁得豪家姐做先驅、又同班闊太 friend愈黐愈埋， 36歲先開始講金唔算心，其實算開竅遲！
問公司借百萬
分手原因，外界一致揣測係女方重事業、男方太花心。係就係重事業喇，不過係仔唔係女，拍拖近兩年，徐正曦一口氣拍咗七套內地電視劇，來港時間不足一個月，除了撻着初期美國之旅， Niki同徐正曦見面時間少得可憐。
據悉，女方旁敲側擊、男方又有意用物質彌補，去年重手買入全新名跑瑪莎拉蒂攞嚟氹女友。一炮過 120萬車價，登記車主仲係 Niki名，豪就豪喇，不過原來得個做字，徐正曦實際袋落袋係有限錢，為女竟然問經理人公司寰宇老闆開聲借，借完錢俾人飛。周一，《 FACE》致電寰宇老闆林小明，問到二人分手消息，林老闆好坦白：「你哋寫咗我先至知！」至於係唔係借咗百幾萬俾徐正曦買車，老闆即刻落閘：「呢樣唔方便答！」
石油 Vs五金 35歲超班富豪
由名模變名媛，周汶錡嫁得風光一樣都想妹妹周麗淇有好着落，近年積極在富豪圈為 Niki物色對象。據悉 Niki新歡亦靠家姐搭路，身家比起父母經營五金生意的徐正曦簡直係冇得比。
山頂有 house
Niki係唔係當真事業心重？其實有數得計。之前歌影視劇四棲發展，過去兩年 Niki除了兩套內地劇和大台《流氓皇帝》外，工作唔多。慳返嚟嘅時間用嚟做乜？咪就係識朋友囉！
又係多得家姐 Kathy， Niki朋友圈從蔡卓妍等等同輩明星，晉級至甘比、關之琳、楊小娟等等城中頂級名媛之輩。而就在 Niki耳渲目染得多，品味要求大幅度提升之際，終於在社交場合認識 35歲北京人張姓富商。據悉，新歡雖然又係年幼過 Niki，不過年齡差距輕易被新歡的石油家底蓋過，而且香港和北京都有不少物業，山頂更有一幢 house，一相識就送手袋、帶 Niki出入上流場合，加速 Niki撇仔之心。好在有人算有良心，撇完舊嘅至開始新戀情，拍拖一個月， Niki已經以女友身份火速攻陷男方社交圈。
放慢腳步
外傳女方因為專注事業提出分手，實情同徐正曦拍拖兩年， Niki加埋只拍咗一套大台劇同兩部強國劇，新劇《卧底》剛在內地舉行記召，提起分手 Niki亦不痛不癢談笑風生。
徐正曦：完全被動！
欠債貼錢賠上感情再俾人屈另結 19歲新歡，難得徐正曦接受本刊電話訪問時，仲堅持要攬晒所有責任上身：「（分手）我完全被動，要我做最衰人沒關係，但是我真的沒有第三者！沒有拍到我跟別人接吻、擁抱、卿卿我我，就是因為我沒有第三個這麼簡單。我把時間花在工作上，沒有好好照顧自己喜歡的人、沒有做一個男人應該做的事，不能接受一個這樣的男朋友我能理解。（有冇傾過婚事？）我沒有求過婚，我很努力去做，我對自己沒有信心！」沒做男人應該做的事？即係乜呢？好可疑喎！
愈貼愈愛
愛人獅子大開口，明明冇錢都要借返嚟，娛樂圈傻更更嘅其實又點止一個徐正曦？
撰文：娛樂組
攝影：攝影組
|
鍾意就快D Share啦！
|
|
|
