Elsa（林希樺） 9月 12日喺九展開騷，送出 60張飛畀《 FACE》讀者，即刻加入 FACE LINE官方帳號等攞飛
爆 Like王
搞棟篤笑扮「孽瘤」 《沒女》惡婆導師：豁出去玩下！
《沒女大翻身》播完至今剛剛 1年，其中曾被觀眾稱為「惡婆」嘅人生教練 Elsa（林希樺）最近突然動作多多，自爆出身演藝世家，阿姨係鮑起靜、舅父係鮑德熹，又搵到 Bob（林盛斌）投資為佢搞楝篤笑《亂世真心膠》。
唔單只親戚朋友搬晒出嚟， Elsa更突然扮嘢王上身，化身「走私煙」、「剩心 BB」同「孽瘤」拍宣傳短片，擺明搞話題、做主角。好！我哋唔提你啲親戚朋友，睇你有咩講！
F：點解突然搞楝篤笑？
E：我一直做教練呢行，開騷梗係想多啲人識我畢竟做完《沒女》都一段時間；喺鏡頭面前我係一個惡婆，想藉住呢個騷去識多啲朋友，原來我真人唔係咁惡喎！個騷會講下我哋啲 7、 80後同 90後點溝通，又會講香港女仔真實嘅一面，𠵱家媒體或網上講太多港女、中女、沒女、盛女，唔好嘅嘢，實際好多女仔都肯付出又唔計較，或者生活上好努力，所以為佢哋平反吓！
F：點解宣傳片入面要扮 3個惡女？
E：導演話𠵱家好少扮鬼扮馬嘅女藝人，同埋我形象不嬲好老正又惡死，不如豁出去玩下政治人物𠵱家紅過明星呀，佢哋性格好出位好鮮明，講真拍戲啲角色都冇咁 drama，又好容易扮。（你扮邊個最似？）我戴咗眼鏡基本上同剩心 BB一樣樣，面長長、眼細細，唔使化妝，我睇晒佢哋啲片架，重複睇佢哋啲特徵，用番佢哋啲金句，一係唔扮，扮就梗係要似
F：你成日教人搵男朋友，你自己愛情觀係點？
E：我拍緊拖，其實最緊要係愛自己、尊重自己、重視自己，例如好多時間會擺我喺第一位，佢會諗我嘅感受，同埋佢有咩決定都會諗起我，至於要唔要高大靚仔，有錢或者做嘢好叻，呢啲我覺得要人夾人緣，譬如有啲人鍾意成熟有啲鍾意大隻，我覺得冇乜所謂；我以為啲男仔介意我太叻，但叻其實冇問題，但性格要好，如果我叻但令對方難受或者好冇面，咁幾叻都冇用，我拍拖唔係鏡頭面前咁樣㗎！好好㗎我！
F：《沒女》俾觀眾話假導師又俾人鬧，有冇嬲大台？
E：如果做假一個月就拍到啦，使乜拍 8個月！有啲訓練係挑戰女主角性格嘅盲點，係為佢哋度身訂造，就算俾觀眾鬧下都唔緊要啦，如果揀鬧佢定鬧我，咁寧願鬧我，我係教練嚟嘛，保護下女主角都好應該。當初以為拍《沒女》好似紀錄片啫，冇諗過咁大 noise，俾人鬧梗係唔開心啦，當然我可以好似好受害咁，覺得 TVB過咗我一楝，做乜剪到咁？但因我係訓練範疇一定唔會咁諗，有人記得我總好過冇人記得我吖！
F：《 FACE》
E： Elsa
攝影：楊學
|
鍾意就快D Share啦！
|
|
|
