苟芸慧不獲大台力捧，如今樂易玲喺邵氏揸旗，第一時間撬走苟姑娘。
真面目
東家唔打 派新咭片 樂易玲撬苟姑娘過邵氏
大台近年經常地震，小生花旦輪住走，一班幕後亦不斷執位，何麗全、戚其義等重臣一個不留，連樂易玲都冇得留低，要轉投舊老闆方逸華旗下的邵氏兄弟。
由大台製作資源部總監（藝員科）變邵氏執行董事及總經理，樂易玲首要任務係挖角。據知樂大媽打盡人情牌周圍搵舊部加盟，無奈內地製作公司愛用銀彈搶人，樂大媽講到牙血出都未有重量級藝人肯落實簽約。
大星請唔郁，惟有轉向小花埋手。下月約滿大台的苟芸慧，將過檔邵氏跟隨大媽搵食，而被余詠珊黨迫到冇位企的王君馨、李亞男等，好大機會齊齊走。邵氏處女黨，好快齊腳喇！
大台近年內部亂七八糟，自從余詠珊空降後用人唯親，愛將黃翠如可以一個星期出現六晚，洪永城、李嘉馨（前名李佳蕊）等又老是常出現，真係睇到厭㗎！
「余黨」強勢插旗，樂易玲變相被奪權，加上 6月時鬧出歐陽震華續約風波，最後要另一死對頭、戲劇製作總監曾勵珍出手擺平。
大台冇碇企，樂易玲惟有避走邵氏兄弟。以前樂大媽在大台呼風喚雨，生日 party例必群星拱照；不過今時唔同往日，剛過去的生日會只得黃宗澤及胡定欣比較大牌，胡杏兒、鄭嘉穎、鍾嘉欣等通通冇影！連一向愛蒲愛玩的佘詩曼、謝天華都唔出席，失權冇朋友好現實。
藝員部新人上場
當年的契仔契女個個養唔熟，樂大媽轉向新寵苟芸慧埋手。兩人不時被影到孖公仔周圍去，樂易玲親身到苟芸慧有份的點心店捧場，更面貼面自拍，關係相當密切。咁啱苟姑娘將於下月約滿大台， timing夾成咁，當然要出手搶人
據知樂易玲離開大台後，位置將由一名陳姓男子頂上，同時亦會躍升人稱「肥 Cin」的藝員經理人 Cindy接手藝員部。 Cindy旗下有鍾嘉欣、高海寧、黃翠如等皇牌，所謂雞死雞鳴，班姐仔又要鬥快埋位
生日見地位
撬得幾多得幾多！
樂大媽在大台藝員部話事多年，人脈一定儲落唔少，加上邵氏每年會開拍多套電影，要挖角其實唔係話冇可能！尤其一班大台又約滿又想改拍電影嘅姐仔，過檔邵氏未嘗不可喎！
採訪、撰文、攝影：娛樂組
|
鍾意就快D Share啦！
|
|
|
