| 上星期引起iOS保安風波嘅XcodeGhost事件，有連微信同唔少銀行app都中招，而事件令Apple都要作出回應，表示已經將有問題嘅app移除，大家快啲睇下自己有冇中伏。 XcodeGhost呢款惡意程式嘅設計人，深明擒賊先擒王嘅道理，竟然喺程式開發工具Xcode落毒，令Xcode編寫出嚟嘅app會自動收集手機嘅app、系統版本、語言同國家等資料，然後偷偷upload到病毒使用者所擁有嘅網站，你都咪話唔危險。 今次事件係App Store自08年上線以來受到最大規模嘅攻擊，Apple發言人Christine Monaghan表示佢哋已經喺App Store移除受影響嘅app，同時聯絡程式開發商，提醒佢哋要用適合嘅開發工具。有消息指目前App Store最高下載量嘅5,000隻app入面，有76隻受到XcodeGhost感染，當中有唔少都係常見嘅大陸app，就連微信同部份銀行app都喺名單之內。截止9月21日已經有超過1000隻app中招，詳細名單可以click呢度睇。 至於搞開jailbreak嘅中國盤古團隊，就話佢哋已經推出XcodeGhost病毒檢測工具畀大家用，又係大陸app，你仲敢唔敢用呢？雖然有建議係盡快將程式升級至最新版本就冇事，但最好都係del app保平安啦，如果逼不得已一定要用，建議出部平機然後只係用嚟裝大陸app，仲要唔好留咁多個人資料喺入面，咁做就可以減低風險。 |
|
鍾意就快D Share啦！
|
|
|