麥明詩學歷屈機，才藝表演無敵，人氣又高，唯一弱點係事業線，瘦到連胸骨都現埋。
封面
贏到盡 姊妹杯葛 麥明詩追擊陳凱琳
十優港姐麥明詩週日以大熱姿態成為港姐冠軍，天生擅長考試，由面試到決賽當晚，麥明詩繼續發揮其優良 DNA，其他佳麗都只係陪跑，就算宿敵龐卓欣亦只能屈居亞軍。人生勝利組麥明詩，戰績繼續亮麗。
麥明詩以 166,654票當選，贏得觀眾投票，唔等於贏得佳麗歡心，直播所見麥明詩當選冠軍後，竟然冇其他佳麗祝賀，只有 Do姐、志偉哥識做上前握手。同期冇個 friend，但大台又急於想推佢做第二個陳凱琳，據知下月的節目巡禮已預佢一份，想用佢人氣幫手吸客。冠軍未坐穩，就想挑嘉穎嫂機，人哋當年 171,478票多過你㗎。
23歲麥明詩以無敵姿態成為今屆港姐冠軍，其實由面試當日爆出麥明詩為女拔十優狀元，父親為林護紀念中學副校長，加上校董十哥林棣權為殼王陳國強老死，內外兼備加上屈機條件，未正式選，麥明詩是冠軍已經呼之欲出。
跳舞搶鏡
結果大台亦冇令觀眾失望，成個騷幾乎係麥明詩個人表演，以前甚少出現，或者喺選旅遊大使先出現嘅「天才表演」，決賽當晚竟成重點。一生贏盡考試嘅麥明詩當然發揮所長，表演現代舞技驚四座，觀眾亦樂於睇佢表演，平均收視 27點，最高 31點；而麥明詩亦得到 166,654票支持，成為首位「真正」民選港姐。
不過參選冇人想做陪襯，一眾佳麗自知是「茄哩啡」亦不是味兒，所以當麥明詩成為冠軍後，成班絲打並冇上前祝福，反而亞軍、季軍龐卓欣、郭嘉文有成班佳麗圍住，有冇人緣一睇就知。
鋪路吸客
麥明詩做冠軍冇 friend，但大台見佢有 16萬幾選票，僅少過 13年冠軍陳凱琳少少，即刻急急揾佢幫手。據知 10月底拍攝嘅節目巡禮，大台已經預咗麥明詩一份，希望以佢人氣幫手吸客，更加想佢複製陳凱琳上位方程式，準備狂谷佢拍劇，以挽救劇集收視。據知麥明詩參選只為自己人生成績貼金，有大志根本不只想成為大台姐仔，不過大台鋪好晒路又真係機會難逢，麥明詩挑戰完大台選美，再挑陳凱琳，唔知佢下一步想挑戰乜嘢呢？
週一（ 31日）麥明詩同一眾得獎港姐到灣仔食飯，問到冇佳麗上前祝賀，她說：「係咩？我哋在心中！（大台想你即拍節目巡禮吸客喎？）唔知呀！哈哈！」
亞軍龐卓欣全家蒲老蘭
亞軍龐卓欣同麥明詩由細鬥到大，雖然當晚表現出色，同佳麗關係又好，可惜選美期間，不斷有夜蒲攬仔相流出，大台咁鍾意入屋，當然好難俾冠軍佢啦，不過其金融才俊父親龐寶林就力撐話：「好滿意，超出我哋預期，係差少少，但我哋都一路支持佢，冇失望。」之後成家連埋男友一齊夜蒲慶祝，有家人、愛人支持，輸冠軍都唔會唔開心啦。
大熱勝出未必贏到尾
麥明詩以屈機姿態封冠，完美履歷表唔等於喺娛樂圈發展一樣玩晒，歷屆唔少人氣冠軍，喺圈中發展都麻麻，淨係睇上年冠軍邵珮詩就知啦，網民都唔記得咗佢係冠軍，你估嗰個係李嘉欣咩？
譚小環當年大熱勝出，更被力捧做女一及同鄭伊健合唱〈如果天空要下雨〉，可惜最後同排舞師 Sunny Wong拍拖兼離開大台，及後分手。回巢後就多做二、三線角色， 11年結束同大台合作關係， 07年同任職保險嘅蔡強榮結婚，現在喺銅鑼灣開設渣哥一九九六賣魚蛋。
葉翠翠當年見報率超高，幾乎日日都有佢新聞流出，可惜做戲麻麻，多年來都冇代表作，但新聞依然多，同過哭腔李逸朗、又同過趙薇老公黃有龍拍拖，終於在今年同建築師周曉東結婚，不過周前妻 Grace Lam就生活費問題鬧上法庭，更喺葉翠翠婚後 5日上庭打官司，仲禁止葉翠翠喺庭上出現。
最成功嘅港姐之一，當年由頭帶到尾，緋聞暢旺，大劉、黎明，最後 08年與許晉亨結婚。事業拍過唔少劇集，電影拍過星爺嘅《鹿鼎記 II神龍教》，又拍過王家衞嘅《墮落天使》，商業同藝術都有，恨死一眾港姐！當然嫁個有錢人又家庭美滿，最令人羨慕
採訪、撰文：娛樂組
攝影：娛樂突發組
|
鍾意就快D Share啦！
|
|
|
