2015年9月2日星期三

劍橋港姐麥明詩有個牛津高材生男友麥明詩,港姐,

【港姐變小學雞‧大台照肺】劍橋港姐麥明詩有個牛津高材生男友

2015-09-02 11:44:00

龐卓欣與富三代男友Solomon

噚日麥明詩同佢個女拔舊同學(但唔熟)兼亞軍龐卓欣各自晒朋友多，咁麥明詩都係因應報道話佢係「獨家村」先至要出po回應「激晒」朋友；龐卓欣呢？貼圖晒冷話俾大家知，佢同成班港姐都好fd、仲拉隊去食雞蛋仔——Ｚ而且出po時間只係遲麥明詩少少……係有心定咁啱？自己諗喇。

兩位女拔舊生由中學開始鬥到選港姐，依家一個摘冠一個屈居亞軍，呢round暫時勝負已分。咁鬥男友吖，點鬥？龐卓欣有個富三代男友，得閒出下海曬太陽夜蒲識下新朋友，周遊列國享受人生咁，都係另一種「人生勝利組」生活，不過完全唔係麥艮詩嗰type。好勝心強嘅麥明詩，由細細個做小太空人開始，目標已經相當清晰，就連揀男友，亦都「門當戶對」旗鼓相當，家底仲相當唔錯。

今日有周刊爆料，指劍橋法律系畢業嘅麥明詩，有個牛津法律系畢業嘅男友林作(Joe)，清洪徒弟，畢業未幾已考到牌；同麥明詩拍拖兩年，見埋家長。麥明詩參選港姐，男友一直背後默默支持。

報道指，Joe喺英國貴族學校哈羅公校讀書時考獲獎學金，入牛津讀數學，再轉讀law，副修哲學；舊年又得到香港大律師公會獎學金，今年已經考到牌執業。麥明詩愛材，兩人走埋一齊，都似係好正常嘅事。

除咗麥明詩，原來陶傑都好欣賞Joe，曾邀對方出席其網上節目《青英會》。今年四月，Joe舉行派對慶祝正式成為執業大律師，麥明詩以女友身份出席，周嘉儀亦有應邀到場。麥明詩ig上同周嘉儀那張合照，就係攝於當日派對上。

冇港姐同自己做朋友，唔緊要；就算封后之後場面如紅海分開兩邊，亞軍季軍各自同其他落選佳麗「圍爐」都好。總之，識朋友，有時都係要啱嘴形同背景嘅。港姐需要美貌與智慧並重，識大體，但依家出嚟予人感覺就好似「小學雞」玩杯葛咁。報道指無綫對此大為不滿，已經搵咗龐卓欣同季軍郭嘉文「訓話」。

一句都尾，識朋友、或者揀男友，都要講求啱嘴形同背景嘅……