急 call姊妹
又靚又 nice的鍾嘉欣，同好姊妹行街都十指緊扣。
真面目
愛回家 8年情玩完 情傷鍾嘉欣怕抑鬱復發
乖乖女鍾嘉欣入行 11年，緋聞少到冇人有，自從 07年同伍允龍拍拖後更加絕緣。
可惜 8年情始終要完，有傳陳展鵬介入「鍾伍戀」做第三者，又傳嘉欣因受男友拖累而被公司雪藏，甚至指嘉欣嫌棄伍允龍撈極唔起決定分手。早前伍允龍終於公開將嘉欣降呢，由「好朋友」變「朋友」，仲話好耐冇聯絡。
8年感情話完就完，嘉欣近日情緒低落，日日做「阿愁」，隨時令好轉多年的抑鬱復發。好在嘉欣人緣好大把朋友，週日（ 30日）唔使開工，即急 call姊妹陪散心，暫時忘記甩拖痛苦。 31歲嘉欣有錢有樓有樣有身材，仲有好姊妹，冇仔都唔使愁喎！
鍾嘉欣 07年同伍允龍拍拖，本來愈愛愈高調，伍允龍公開入後台撐女友開騷，而嘉欣上年亦唔避嫌現身支持男友主演的電影首映。可惜近日 8年情有變，兩人先後表示好耐冇聯絡，分手分得乾乾淨淨。
全程拖到實
週日（ 30日），嘉欣同一名打扮入時的中女現身中環 ifc，一見記者嚇到傻笑又合十的嘉欣，被問到同伍允龍的感情時，禮拜地封口唔答，仲求記者收工唔好再跟佢。
行去超市濕平時，嘉欣與好姊妹全程十指緊扣拖到實，沿途更不斷講嘢，似乎好多心事不吐不快，而女友人亦相當有耐性，留心聽嘉欣訴苦。極速掃完大袋食物，嘉欣與友人坐七人車返回將軍澳寓所邊食邊傾，臨走前嘉欣再三問記者係咪唔會再跟佢，神情緊張，與以往任影唔嬲的大方態度有明顯分別。
忽傳有新歡
其實嘉欣一直唔擅於處理壓力，曾經因壓力太大狂爆瘡同影響經期，去年更自爆曾患抑鬱，「選完華姐拍《皆大歡喜》，乜都唔識好大壓力，又唔敢同人講，更加唔敢同身邊人傾，所以嗰陣一返到屋企就喊！」
自少受盡家人保護愛錫的嘉欣心靈脆弱，近日忙住拍新劇《警犬巴打》，又要為分手及撻着大陸「新歡」丁野解話，公私兩忙。壓力瀕臨爆煲邊緣，最親的父母兄姊又身在加拿大，未能即時開解愁爆嘉欣。遠水不能救近火，好在仲有好姊妹隨傳隨到做水泡咋！
懶煎 pang累全家
諗開縮數的大台，原本打算搵鍾嘉欣、伍允龍同陳展鵬開新劇《城寨英雄》，明擺呢段三角戀上枱，點知嘉欣唔肯就範，最後胡定欣執二攤頂上。
監製最初安排伍允龍、陳展鵬及袁偉豪齊齊於劇中騷肌，袁偉豪更日夜喪操，希望以最 fit狀態見人。弊在煎 pang根本冇心機做 gym，搞咗一排身形都冇進展。監製為免脹爆煎 pang唔夠配角袁偉豪搶鏡，最後決定改劇本，全世界都唔使露！袁偉豪呢鋪真係俾鵬哥累死喇！
採訪、撰文：娛樂組
攝影：娛樂突發組
|
鍾意就快D Share啦！
|
|
|
