掃呢頁CODE去手機

2015年9月2日 星期三

健美先生 怕醜拒入行 街市大隻仔變健美冠軍 [FACE - 432] 大隻仔,溫家偉,MF,



上月 8日,明仔狀態大勇,成功攞到青年組健美先生冠軍。

真面目

健美先生 怕醜拒入行 街市大隻仔變健美冠軍

兩個月前在網上瘋傳嘅元朗小鮮肉,在街市幫親戚打理凍肉檔的莫將明(明仔),冇曝光一排原來又大隻咗!上月初仲參加一國際性健美比賽,贏得青年組健美先生冠軍和古典健美先生亞軍,街市仔變肌肉王。

雖然明仔話好享受在台上嘅感覺,仲打算 2017繼續參加健美選舉,不過早前有電影首映禮邀請他爆肌撐場,怕醜明仔卻自言唔慣面對鏡頭而推掉,嘥啲喎!

21歲元朗大隻仔莫將明(明仔)因街市谷肌推車送貨,被網友影低放上網後,即引起廣大注目,明仔當時更向本刊直認多女埋身!

明仔無論係比緊賽定攞緊獎都成日笑騎騎,唔通笑容都會加分?

喺討論區上,有網友就話明仔瘦咗,明仔話係因為「收咗水」嘅錯覺。

2個月前,明仔已經一身肌肉喺元朗送凍肉,開工肌肉照被網友瘋傳。

連掃兩獎

冇見一排,原來大隻仔密謀「出戰」。上月 8日,明仔就參加了由世界健美及運動體適能總會舉辦的選美大賽,成功獲得青年組健美先生冠軍和古典健美先生亞軍。

明仔週日(上月 30日)仍然好開心話:「第一次參加比賽有獎固然開心,青年組一直諗可以入到三甲,無諗過會攞到冠軍,而參加古典組係志在攞經驗,所以攞到亞軍係意料之外。攞到呢兩個獎,最大功勞都係我師父啦,無佢教我上磅,我未必可以做到咁好。」

青年組健美先生嘅冠、亞、季軍,明仔(中) keep住嘅笑容幫佢搶到唔少分。

電影《猛龍特囧》上月首映,當日主辦單位就邀請咗一班大隻佬,明仔都有被邀請,不過佢推咗,因為怕醜喎!

女友冧錫

拍拖多年嘅女友盈影當日梗有去撐場,男友攞獎,錫啖恭喜就梗㗎網上圖片

唔慣俾人影

辛苦一年多 keep住每日抽時間做 gym,得獎後明仔即與女友四圍食慶功,「呢樣比賽都會繼續玩,因為都幾享受喺台上嗰刻。出年未必, 17年好大機會再參加,用兩年時間睇吓自己有無進步。」不過明仔卻坦言冇諗過考健身教練牌,只會將健身作為興趣,現時他仍每日到凍肉鋪幫手,他更說街市街坊們都不知道他參加了健美比賽。

其實明仔自 6月成為網上紅人後,曾有公開活動邀請他做嘉賓,不過明仔知道在場會有大量攝影師,又會被記者捉住做訪問,天生怕醜的性格令他卻步,連早前《猛龍特囧》首映禮想邀一班大隻男出席首映,明仔係受邀之列,都被他一一婉拒!其實副 body咁得,匿喺街市會唔會嘥咗?

去年 5月仲係肥仔一名,估唔到今年 8月明仔已經係健美先生冠軍,果然係只要有恆心呀!網上圖片

明仔 ig有唔少生活照,但抱住狗仔都要谷胸, chok咗啲喎!網上圖片

比賽完,明仔同女友馬上食嘢慶功,咁又係,忍咗咁耐,獎勵吓都要網上圖片

未必撈得起

娛圈其實不乏大隻男,佢哋大多有樣又有身形,安排做打到飛起嘅角色亦唔算失禮,但就硬係紅唔起!明仔拒入娛圈,唔通咁有先見之明?

安志杰

入行前做調酒師, 02年加入娛圈。直到 09年因為與謝婷婷拍拖而更多人認識,拍打戲較多,近年接拍《激戰》和《救火英雄》先叫較好發展。

溫家偉

同樣由美國回流返港, 09年參加《香港先生》選舉加入大台,雖然最後落選,不過都簽約大台做演員。溫家偉近日開設雪糕店似乎準備轉行。

鄭健樂( Rocky)

入行前做過張學友和李蕙敏私人健身教練, 05年《香港先生》健力組冠軍。 10年曾與大台一度解約, 12年重返大台,不過多被派演閒角。

採訪、撰文:娛樂組

鍾意就快D Share啦!