真人騷
擁廿間鋪貼錢做奀星 王友良：俾人激親就真係輸！
「當你見到天上奀星，可會想起我？」
其實唔係又走番出嚟唱咗首中文版小丸子〈幸福的開始〉，請咗因為寫真風波收埋自己一個月嘅 Celine妹妹合拍 MV，我又真係未必醒得起王友良。未必因為佢係最奀一個，而係這些年做經理人、代理動漫產品活動、開鋪搞時裝，轉行也撈得太風生水起，我實在想不通他怎麼還念念不忘那個明星夢，又要貼錢買難受走返嚟做奀星。
約了他拍照，想見識一下事業有成的王友良，拍攝地點他給了我好多選擇：「我金鐘同觀塘都有寫字樓，或者你都可以去鋪頭影，就美麗華商場啦，今次首歌同小丸子作者櫻桃子合作，嗰度有啲大型小丸子公仔！」有鋪有寫字樓，你以為好威？實情來到美麗華，精品店用來拍照不太適合，王友良說帶我看看其他選擇……唔係一個，而係同一間商場內仲有六間鋪囉：「我𠵱家全香港有十幾間鋪，今年年尾啦，預計會開到二十間。」想當年取笑他是「友良神」的那班鍵盤戰士肯定沒想到有這一天吧？王友良明星夢發過、在日本上智大學學過的國際商務亦能學以致用，如今閒閒哋搞個商場龍珠騷幾百萬上落，大把銀彈支持自己又返嚟繼續發明星夢。
都係嗰句，做生意一呼百應養活緊百幾人，為乜貼錢做奀星俾人笑？
「啲人笑我奀星，我係都唔俾人激親，輸嘅咪就係佢哋囉！你叫得我做奀星，即係都有幾個人識、都娛樂過一班人啦？咁負能量搞咁多嘢去笑人，不如化做原動力做啲嘢先啦。我份人就係咁樂天，我信就算落咗幾耐雨都好，只要我行得出去拍嘢就一定會藍天白雲出太陽！」
其實我想做月野兔男朋友
點解仲可以有時間出新歌？
呢幾年做幕後、做製作，離音樂越嚟越遠。雖然工作都係動漫、 Fashion、潮流嘢，都係自己最鍾意，但係……我年年都有啲登台、演唱工作，咁啱舊年聖誕完全掂唔到音樂，突然間覺得好想唱歌。我唔理啲人係唔係淨係覺得我想發明星夢，其實我真係由細到大鍾意唱歌，𠵱家返日本一個星期，都起碼有三日係走咗去唱……
一個人？唱卡拉 ok？
係呀！一個人，唱三個鐘！冇人爭咪不知幾開心。呢排我好鍾意唱〈 Let it go〉、鍾意《 Frozen》啲插曲……我開頭睇佢係為咗做嘢，睇完超 suprise，俾啲小朋友知道，呢個世界無白馬王子，一見王子就中個頭埋去，可能係陷阱嚟㗎！同埋個 true kiss係姐姐唔係王子，最錫你嗰個真係屋企人，未必係個王子囉。
分別喺邊？鍾意唱歌點解要做歌星，唱 K唔夠咩？
雖然我都鍾意 cover人哋嘅歌，但都想有自己歌㗎。
你𠵱家有幾多重身份？
經理人啦，小丸子同好多動漫代理，我有做時裝、年尾會開到第二十間鋪頭，設計服裝，亦都寫緊本新書，都係關動漫事。我嘗試唔用宅男嘅角度睇動漫迷，我做《小丸子》、做《美少女戰士》，係現代同集體回憶去睇。點解我可以做咁多嘢都咁放，我想話，影響我最深遠都係啲動漫。嗰種不屈不拗、遇強越強嘅精神，等於我傾《美少女戰士》啲人話難傾、等於做生意咁忙啲人話我冇可能仲唱到歌，唔係吖，我一樣做到。難安排咪瞓少啲覺囉，我日日七八點起身，傾嘢做嘢做到兩三點，睇你有幾想做、點安排啫！
都係因為瓣數多搵到錢，所以仲支持到你唱歌興趣？
咁唔係蝕，但一樣唔係搵好多，每個生意來往，你當啱啱喺東港城搞個龍珠騷，幾百萬嘅生意，但係我支出都幾百萬，未埋數我最終未知蝕定賺，起碼我做呢個活動做到自己都唔捨得。
你係咪好似古天樂、葛民輝一樣，有個倉攞嚟擺玩具？
我香港有地方、日本有地方，都好多地方擺嘢，我日本間屋主要都係美少女戰士，龍珠就少啲……
一個男仔屋企全部係美少女戰士，你唔覺得乸型咩？你肯定你係鍾意女仔？
我肯定鍾意女仔，我唔同啲人，唔係想做美少女戰士，我係想做美少女戰士嘅男朋友！呢個好唔同你明唔明？
你喺日本留學讀乜嘢？
我喺上智大學讀國際商務，又係 Avex學咗唱歌、跳舞，亦都學咗音樂商務，再讀咗一個 promotion and planning課程。
揀科升學，屋企人有冇俾意見你？
初頭媽咪好反對，佢喺美國讀大學，都想我去歐美升學。點解會揀日本呢？嗰陣時真係唔興，我同佢講我讀得英中，仲點解要去英語國家？點解唔去其他國家學一門新嘅語言返嚟？到時我嘅競爭力一定唔會差得過英美國家嘅大學生……另外我用咗一個好重要嘅理由說服佢，就係我喺日本讀書，佢探我都易啲嘛！
轉咗去讀音樂？佢會唔會更反對？
反而唔係喎，佢不嬲知我鍾意唱歌。
逼自己狠心真係好酸
父母都係呢一行（父親王戎是邵氏武打明星，母親郭敏明是邵氏導演），有冇同你講過應唔應該入呢行？
我同爸爸好多偈傾，但佢對我入呢行反而冇乜意見。我媽媽都係一個新潮媽咪，我𠵱家做緊嘅嘢佢都俾好多意見我，好似今日襯衫嚟做訪問，佢都叫我戴耳環！細佬𠵱家都同我一齊做 fashion，佢對內我對外。入呢行唔同以前，發明星夢，你有冇諗過頭幾年可能冇收入先？
你有冇試過冇收入？
我好彩啲，一入行簽 TVB做《無間音樂》主持，一個星期幾個騷，都有成萬蚊人工。嗰份工係介紹日本音樂，我都唔係就咁有得做，都要 casting㗎！唔係差，但係我都想轉做歌手，轉營簽恒藝亞洲，又好彩有少爺占同阿奴俾我做是《日本人橡膠龜》。算係穩定……當然收入唔夠我啱啱讀完大學多。
大學畢業你係做？
我喺日本做稅務會計， KPMG係全球 big 4會計公司之一，嗰陣人工好高，差唔多三十萬 yen月薪，仲有 bonus，每年出十六個月糧，梗係好使好多，初初返嚟係唔慣，不過都肯定過萬……後尾做歌手，收入都算 ok，恒藝老闆好錫我，但好可惜，我換咗幾個經理人都合作唔到……
點解合作唔到？
我自己好有想法，佢哋做娛樂圈嗰套太傳統：長頭髮香港觀眾唔受、唱歌一定要派台……我嗰陣時已經唔同意呢一套，𠵱家證明的確唔係一定要呢套。啱啱開始，叫我剪短頭髮、白恤衫，我真係好唔明。我嘅 image代表咗自己，你搵人幫我設計一套，我仲點 present自己？最離譜將我同木村乃（大家仲記得？）塑造到情侶檔一樣，後尾仲叫我不如試下真係拍拖……冇可能！絕對冇可能。最後點解要走、點解要搞自己經理人公司，我就係想證明俾佢哋睇，我嗰套其實 work。
有冇拍拖最近？
今年年頭打後無拍拖囉，真係太忙。佢唔係幕前，無謂講太多。同我首新歌一樣，我等緊一個命中注定嘅人，我信㗎，轉角遇到愛嗰套。
拍過三次拖，有冇一個呢？覺得係命中注定？
有！初戀嗰個日本女仔，我哋拍咗拖四年，𠵱家，佢結咗婚有埋小朋友嚕……
命中注定點解會分手？
佢爸爸唔鍾意外國人，佢變咗磨心……同埋嗰一刻我仲喺日本讀緊書，佢就要去美國升學，我唔可以叫佢為咗我放棄學業。
咁分手時傷唔傷？有冇寫「沒有常在心的日子」？
佢去咗美國，而提出分手嘅係我，我仲咁做對佢唔公平……其實好辛苦嘅，明明你好關心佢、錫佢……知佢啱啱去美國，各樣都唔習慣，想同我傾……但呢啲嘢我要逼自己全部都唔做得，一定要狠到心落嚟。好酸㗎……嗰一下……
最後呢？
最後我哋仲有聯絡，連佢先生向佢求婚時都有問過我意見，大家一齊度條橋出嚟……我以為我放得低，但到佢結婚嗰日我又唔肯定，最後選擇冇出席個婚禮。出面可能以為我愛蒲又花弗，其實講出嚟冇人信，我唔食煙唔飲酒，一年為應酬都飲唔夠兩啖酒，完全接受唔到一夜情，所有時間都用嚟做嘢，從來唔會搞辦公室戀情。我淨係飲水同烏龍茶，咁大個人連咖啡同汽水都冇飲過，試過㗎，有個人同我分手，因為我唔夠壞……我唔明。
我係日本通 唔係奀星
其實好多能耐，做得好，點解係要做奀星？
我唔介意，做呢行就係咁，入行前都俾人踩過啦……想當年我喺學界活躍，我都知好多人憎我、覺得我發明星夢。我一間男校搵十間女校 join school，人哋梗係討厭我，但我好 proud of我做得最好。結果出到街，有次無嗱嗱人爆粗鬧咗成程地鐵。我入呢行，爹哋媽咪唯一早灌輸我，就係行得出嚟舞台，就預咗有正負兩面，我一早有心理準備。我以前做嘅嘢成就咗𠵱家嘅我……我好記得當年做咗個訪問，《 Yes》記者問我大個想做乜，我講咗好多嘢：歌手啦、記者啦，教書啦、時裝、生意、設計……佢話冇可能。我好開心，𠵱家咁多樣嘢我都做齊……
書你都教過？
我返過中學教兩個月中一至中四英文，我係 Mr Wang嚟㗎，有班學生喺度㗎！做記者都試過，代表 TVB去日本做訪問，幫雜誌寫連載……當年個記者話冇可能做到嘅嘢，我真係樣樣做得到。
唔怕俾人叫奀星咩？
俾嗰啲人激親，輸嘅咪就係自己囉！睇完唔激氣，輸嘅係佢哋。我做嘢唔係叻，係真係勤力，你嗌得我做奀星，係唔係都有啲人識呢？我行出嚟係日本通，喺日本通呢個領域，我唔覺得我奀囉！啲人搞咁多嘢數人係負能量，我唔係，我份人就係咁樂天，我信落咗幾耐雨都好，只要我行得出去拍嘢就一定會出太陽……而事實真係咁喎，三個禮拜前我喺日本，天氣報告明明落足一星期雨，我落火車唔夠五分鐘，就真係藍天白雲出太陽！
你信自己可以帶嚟太陽？咁真係正能量到一個程度！
真係㗎！做娛樂圈就係要娛樂人，以前有人嗌我奀星嗌得咁開心，都叫做真係娛樂咗一部份人吖！𠵱家做動漫更加係，好多人行埋嚟真心多謝我幫佢完咗一個童年夢想，我覺得我成功咗喎。
好多人話你有個有錢老竇在先，你覺得成功首先要有乜嘢？
我好唔覺得係因為老竇囉，首先你要有夢想至有原動力，如果唔係，你爹哋有幾多錢都好、送你去邊度讀都好，一樣唔會做到啲咩出嚟！咁多投訴咁多怨氣有咩用？唔滿意點解唔讀好啲書將來從政做政府？所以我特別欣賞十優港姐就係咁解，佢話佢終極目標係從政，而最快令人聽佢講嘢，無嘢快得過選港姐！
說好的太陽呢？
王友良話只要佢想，就一定會出太陽。三個星期前去日本度假，佢話放假一定要有藍天白雲，唔理天氣報告一意孤行去海邊，結果真係出太陽喎……
你講到咁，出邊又落緊雨，我冇理由唔帶你出街行一轉㗎！結果呢？太陽呢？佢話：「你承唔承認，啲雨真係細過頭先好多先？」
啲雨係唔係因為王友良而細唔重要，重要的是這個人真的以為他可以帶來陽光，這就是能耐。
撰文：朱小博
攝影：范仲良
|
鍾意就快D Share啦！
|
|
|