【太陽報專訊】已故慈善伶王新馬師曾（鄧永祥）遺孀洪金梅（祥嫂），繼上周大爆兆尊及小艾曾登門求見逼簽文件，昨日在寓所由好友黃夏蕙陪同下受訪，祥嫂再度開腔指有人想與稅局打官司，以為不用交遺產稅，她指對子女已心淡，並已立平安紙，「捐咗都唔畀佢哋！」她又稱有證據討回公道：「證據係有，但冇必要攞出嚟，免變成連續不斷嘅鬧劇，唔使證明，母親一定啱，最唔啱係生啲不孝子！（你話子女畀授權文件你簽，授權乜嘢？）我名下已交咗遺產稅，佢哋未交，想同稅局打官司，唔知諗乜，唔使交呀？提過啲紅衞兵咪欠稅局錢，唔聽！佢哋都唔值得我信，我仲簽嘢授權佢哋？（小艾話合作，就係指打遺產稅官司？）你問番佢，但呢啲人冇表達能力，鬼同佢做生意，包蝕嘅！（但兆尊話如果有嚟過搵你，一定撞爛鐵閘？）佢係有嚟過，閉路電視一定拍到，叫咗保安公司整理。」祥嫂坦言不留遺產予子女：「今日答你，一定唔留畀佢哋，紅衞兵虐我到體無完膚，捐咗都唔畀佢哋！平安紙都做咗，等啲冚X拎搞搞震唔想我安樂吖嗱！（有人想謀你身家？）冇得謀，一係殺咗我，謀人唔係辦法，靠自己（子女中有邊個仲有親情在？）冇！都係紅衞兵托世！佢四個未拎過錢返屋企，鄧兆尊自己都養唔掂，仲有3個女朋友，佢問我佢阿爺係咪4個老婆，我話5個呀！你阿爺有個伶王咁叻嘅仔養起全家，你呢？（點睇有人暗指你有男性密友？）我一夫到尾，到今日都係守身如玉！」本報就此事向兆尊查詢，他表示不作回應。
|
鍾意就快D Share啦！
|
|
|
