恐襲陰影下如常外出 鄧達智人在巴黎：冇諗到咁恐怖
法國巴黎市中心於香港時間昨日凌晨，發生連串恐怖襲擊，有多達六處地方受襲，造成逾百人死亡，全球震驚！本地時裝設計師鄧達智身在當地，他昨日在電話中猶有餘悸：「巴黎一向都唔安全，冇諗到今次咁恐怖。」蔡少芬、方健儀、周汶錡、黃長興等則擔心身在當地的親友安全。
採訪：林妙萍、羅慧敏、嵐山、盧妹
鄧達智昨午在facebook「打卡」透露自己身處巴黎，並留言：「To Paris with Love」有朋友問他﹕「Safe？」鄧達智留言：「Who can judge（誰能判斷）？」昨午約5時，鄧達智透過長途電話受訪，表示自己如常外出活動，問可擔心人身安全？他說：「巴黎一向都唔安全，冇諗到今次咁恐怖。我行走江湖咁多年，呢啲都冇得避，防不勝防。」
■鄧達智正身在巴黎，昨日在fb報平安。
不覺增派警察
他又謂當地市面氣氛大致正常，街上不覺有增派警察，他說：「巴黎人見慣世面，啲人都係如常。」他又覺得歐洲國家近年對恐怖主義的警覺性太低：「法國對移民、難民都太過自由，無掩雞籠咁，啲警察連處理小偷問題都手足無措，𠵱家遇到恐襲，應該會alert（警覺）多啲。」他表示會繼續行程，稍後往英國。已移居巴黎的香港首位華籍女騎師江碧蕙，亦在facebook打卡報平安。
■鄧達智在fb貼上多張巴黎恐襲後拍攝的照片，當地市面平靜。
|
鍾意就快D Share啦！
|
|
|
