桃花旺盛嘅林芊妤（Coffee）唔單止同江湖大佬有緣份，啱啱又畀本報影到佢同中佬行街兼睇戲，不過Coffee就堅持依家冇男仔追佢，仲叫記者唔好講到佢咁有吸引力。
咁Coffee又講得啱喎，如果佢同上年六月，同佢孖住喺ifc「廁格gathering」嘅林知譽（Will）相比，佢嘅吸引力就又真係唔夠人好喎，事關Will同Coffee分開咗到依家只係年幾，唔單止已經揾到另一半，仲就嚟結婚；未婚妻來頭都唔少架，就係已故「針織大王」羅定邦孫女、百樂集團主席羅家寶女兒羅穎怡（Wendy），恭喜晒！
今年32歲嘅Will，父親係市值9億上市公司、達利國際集團創辦人林富華，而佢就係集團旗下達利製衣有限公司嘅董事，本來行事低調，連社交圈都唔活躍嘅Will，因為上年同Coffee喺廁格gathering，半個鐘就將命運改寫，一夜爆紅嘅佢，當時仲因為避開記者採訪主動調去杭州返工。
據知，佢同大佢3年，今年35歲嘅Wendy係喺一啲慈善活動上認識嘅，知情者仲話：「雖然Will年紀細個Wendy少少，但兩個人屋企都係做生意，大家背景又差唔多，所以兩個人好夾，好多話題，可以話係一見鍾情，聽聞Will係趁Wendy今年九月生日同佢求婚，估唔到一次就成功咗。」
不過，「雙W」由決定結婚到籌備婚禮，原來都頭痕咗好耐，知情者同《蘋果》講：「Will上年單新聞咁轟動，佢唔想影響到Wendy，本來諗住一切從簡，兩個人去外國結婚，再同屋企人食餐飯就算，Wendy都贊成咗，但雙方屋企都有頭有面，唔想娶新袍同嫁女要搞到咁鬼祟，所以最後都決定喺香港擺酒，婚宴定咗喺明年初舉行，仲揾咗『九巴後人』雷怡暉幫手做公關應付記者。」
前度結婚，《蘋果》今日打過電話畀Coffee：「其實真係好耐冇同佢聯絡過喇，咁如果佢真係結婚就恭喜佢啦，佢有佢嘅新生活，又就嚟結婚，希望佢哋會幸福快樂」咁會唔會好似Will咁閃婚？Coffee就話：「唔會閃婚啦，0依家做嘢最緊要，我自己都唔想成日有啲新聞出現，希望報道都係關於我工作，唔係成日都係緋聞或者唔好嘅新聞」
另外，今次婚禮搞手雷怡暉（Amanda）接受本報話訪問時則表示：「哎吔，唔講得，暫時冇嘢講，遲啲同你講吖，我依家要開會，拜拜！」
| 林知譽（右）閃婚，Coffee亦恭喜對方有新生活。 （資料圖片） |  Coffee經過廁格事件後，人氣不跌反升。 (資料圖片) |  林知譽行事低調，發生廁格事件後，仲調去杭州工作避記者 (資料圖片) |
 林知譽曾經同陳法拉出席活動 (資料圖片) |  「針織大王」羅定邦孫女羅穎怡 (資料圖片) |
|
鍾意就快D Share啦！
|
|
|