（欲瘋狂重溫第一、二集？即上「蘋果ATM」fb專頁：http://fb.com/appledailyatm）
Tony樓就買咗，點知大禍臨頭。上集講到佢係自僱人士，稅單未有，買樓前諗住做按揭預批，首次睇樓仲話要慢慢嚟，最終衰衝動，落「大定」40萬元買入將軍澳居屋康盛花園一個兩房單位，家陣做唔到按揭，隨時撻定輸半球，呢筆錢其實儲得好辛苦㗎！
佢冇大學畢業，中學畢業後投身社會後，做過Sales、文員、清潔、侍應、廚房、外賣仔、電單車速遞、接待員，對上一份工係賣保險，但同上司不啱咀形，不歡而散。因緣際遇，朋友叫買車，買買下變咗做自僱司機，家陣幫3間公司日日送貨。
社會大學起步並不如意，近幾年轉做司機，收入先稍為穩定，5年前開始儲錢，目標一年儲36萬元。「我覺得人生一定要有車有樓！由細到大，好想要嗰樣嘢，就會定做目標，未必一定得，而且當中好多唔成功。」為達成30歲前置業的夢想，「搵份人工高嘅工，跟住儲錢或者投資，唔好攞去玩，唔好攞去旅行。」
唔係打政府工、又冇大公司大樹遮陰，自己幫自己打工，飯碗隨時不保。佢好清楚這種情況，所以唔敢大花筒，平日死慳死抵，「早餐唔食，一瞓醒就撲出去返工，通常做到晏晝，公司包飯嘅，咁就食公司飯，有陣時喺公司拎埋晚飯返屋企食……拖又唔係點拍，又無乜朋友，又好少應酬食飯，興趣又唔多大。每月消費2,000至3,000蚊……無乜朋友無辦法，掛住做嘢……少啲娛樂咪少啲消費，真係要捱㗎，成個宅男。」
兩年前唔同父母住，同朋友夾錢租西貢好偏僻的村屋，每月交租約3,000元，屋內家具好多二手，甚至免費，好似衣櫃，睇落兩三千蚊貨仔，但原來只係幾百蚊。就連著緊嘅衫都只不過係喺淘寶大量買入，幾十蚊貨色。
無社交、無嗜好、低消費、計到盡，朋友都話佢係孤寒鬼，最終佢真是儲到近百萬蚊首期。慘在當日衰沖動，無稅單，屬自僱人士，銀行唔批按揭，專家叫他搵擔保人，大難臨頭，梗搵親人。點知阿爸阿媽經濟能力有限，做唔到擔保，想家姐出手？「家姐同姐夫，經濟能力好好，（但有無擔保到？）佢哋有自己諗法，咁又唔會怪佢，始終擔保係大事，咁唔擔保都好正常，不過如果調轉係家姐有事，我一定會幫。」
屋企人幫唔到，佢都未絕望，心諗報咗稅，9月尾、10月頭會有稅單，點知10月遲遲收唔到稅單，「上網查又好，打電話去問又好，都話未出到稅單」。距離收樓只剩兩星期，唔通Tony第一次上車，就要撻定蝕錢喊住走？想知佢最後上唔上到車，今日下午6點正！準時登入「蘋果財經即時新聞」或者蘋果財經FB專頁「蘋果ATM」，睇埋「80後上車真人SHOW」最終回！
記者︰陳家雄 吳美茸
攝影︰張柏基 楊柏賢 何柏佳 鍾偉德 黃耀興 朱家駿
剪片：技安
掌握財經生活資訊，即Like「蘋果ATM」fb專頁
http://fb.com/appledailyatm
|
鍾意就快D Share啦！
|
|
|
