李泳漢聞思琦扯火：請佢都唔敢嚟！
藝人李泳漢宣布與拍拖約兩年的女友Conny，於明年拉埋天窗。據悉35歲的他奉子成婚，雙喜臨門。泳漢被問到會否邀請胞弟泳豪昔日女友楊思琦飲喜酒時，嬲爆表示：「佢當年咁傷害泳豪，我請佢都唔敢嚟啦。」
李泳漢與圈外女友嚴佩鈺（Conny）相戀雖短短約兩年，但二人愛得甜蜜，感情一日千里。據知兩人更奉子成婚，並鐵定將於下月八日拉埋天窗，於馬會擺酒宴請親朋。將為人夫的阿漢最近滿心喜悅籌備婚禮，但當被問及會否請胞弟泳豪的前女友楊思琦去飲時，他怒氣未消說：「點解要請佢呢？我請佢都唔敢嚟（依家仲嬲緊佢？）唔好講嬲，只係唔想提佢啫！」
從未道歉再冇瓜葛
提到泳豪與思琦分手恩怨已四年，現在家中有喜事，家人心情是否轉好？他說：「都開心番。其實呢4年我哋全家都唔係好過，因為豪仔發生件事嗰個年頭呢……楊思琦話同豪仔結婚嘛，點知件事變成咁。佢仲話番我哋轉頭，唔單止對細佬，對全家人都好大傷害。呢四年入面唔好話辦喜事，連細佬會唔會拍拖都冇諗過，但依家就好開心啦，因為有份天賜嘅禮物，我就可以結婚喇。我結婚都想開開心心，所以以前唔開心嘅嘢我唔想提喇！」
至於思琦已為人母，會否戥她高興？泳漢嘆氣謂：「唉……佢都做咗媽咪，咁佢依家應該知道我阿媽當初嘅感受。」提到思琦是否應還個公道給泳豪時，他說：「我諗個事實已經畀觀眾知道咗喇。佢還唔還已經係冇分別，只不過我係想『楊思琦』呢三個字、呢個人，唔好再同我屋企有任何牽連。我都知我結婚，傳媒都會問到關於佢，所以我答一次。我今次明媒正娶，希望佢唔好再同我家人有任何瓜葛，唔好影響到我婚禮就得喇！（思琦有冇同豪仔或你家人講對唔住？）絕對冇，邊度有呀，冇再聯絡。」
全家總動員拍婚照
而忙於籌備婚禮的泳漢亦未有因思琦而影響心情，全權負責婚禮費用的他，更於一個月內安排酒席及影婚照，把婚事辦得妥妥當當。日前他更與未婚妻及家人，一日內接連前往香港馬會雙魚河鄉村會所及國際騎術學校拍婚照。問到會否準備豪華婚禮畀太太？他說：「豪華就講唔上喇，因為我冇乜錢，只係將自己最好嘅嘢畀太太，因為結婚係一世人一次，畀個好好嘅回憶佢。（去邊度蜜月？）本來飛關島，但依家取消咗，老人家唔太贊成。」
文、攝：追蹤組
|
鍾意就快D Share啦！
|
|
|