陳冠希喺內地媒體真人騷中自誇每年有 1千萬美金營業額，又話會將八成身家留畀將來仔女。 網上圖片
真面目
表面風光 自誇潮店年賺千萬美元 陳冠希被入稟欠租欠稅
每年賺 1千萬美金，聽落真係好威威！但竟然欠租又欠稅搞到被入稟追數又點解呢？
35歲陳冠希最近喺內地網媒真人騷，自爆自家品牌每年有成千萬美元營業額，但《 FACE》 check過入稟紀錄，發現佢分別喺 10、 12同 13年欠交租金及稅項總數達 33萬港元，被人追數。
內地媒體 VICE追訪咗陳冠希（ Edison） 3個月，拍咗 3集真人騷《觸手可及》， Edison喺片中講咗好多自己做生意嘅心得，又提及當年淫照事件，又話自己想結婚生仔，好似大個仔咗好多咁！
被追 33萬數
事實上 Edison都幾叻仔，喺做生意方面囉！ 04年創立咗 CLOT，同時亦係潮店 Juice老闆，喺香港、台灣、美國同內地都有公司。而 Edison喺真人騷中自稱當年攞 250萬出嚟搞自家品牌時，根本不當一回事，即使老竇睇死佢蝕晒筆錢， Edison依然堅持要做，結果𠵱家成為知名品牌，自稱每年營業額達 1千萬美金，幾咁意氣風發。
不過翻查 Edsion公司資料，竟發現佢喺 10年 1月曾被香港稅務局追收其公司 19萬稅款； 12至 13年又被一間東標置業有限公司入稟法院，追討鋪租 8萬及辦公室 4個月租金共 5萬 9千元，欠稅欠租總數達 33萬。
當年曾有報道話 Edison自淫照事件後因形象受損，老闆林建岳要佢賠錢畀廣告商，所以連 13年拍彭發套微電影嗰百幾萬片酬都要用嚟還債，但陳冠希就否認有咁嘅事。點都好，欠租欠稅係事實，同淫照案有冇關就 Edison至知喇！
真人騷自爆
一向同記者關係好差嘅陳冠希，最近出奇地接受內地媒體 VICE貼身追訪 3個月，走遍美國、香港、日本、上海和北京等地，拍咗 3集真人騷《觸手可及》，喺節目入面 Edison除咗講身家講生意之外，更罕有地講及淫照事件同埋好想結婚生仔。
【淫照】
Edison稱如果問佢可以回到過去的話，會想改變甚麼？ Edison用英文及普通話答：「我甚麼都不改變，我很開心今天，我知道有一些不開心的事情發生過，不過，那個不是我黑心故意去做的，這個是一個意外，我覺得，我從那個事情，我學到很多東西。」又話：「很多人在出事之後，就跟我撇清關係，他們說不認識我是誰。」
採訪、撰文：娛樂組
|
鍾意就快D Share啦！
|
|
|