伍公子喺《網絡挑機》大寸 TVB膠劇情節，仲搵咗專業攀山者，試下謝天華喺《神鎗狙擊》嘅單手攀山講電話，他說：「係因為套劇唔好睇，觀眾先要捉佢錯處，冇人會捉《 Iron Man》，因為人哋好睇。」
爆 Like王
入大台「挑機」 YouTuber𤓓敗 伍公子：佢哋收晒皮都唔關我事！
最近大台的《網絡挑機》，搵咗一班 YouTuber表面上可以入大台挑機，可惜內容被大台刪剪晒，搞到班 YouTuber個個變晒儍仔，司徒夾帶被阿叻同肥媽寸到冇得還擊，平時佢哋鬧大台多，今次終於俾大台一鋪玩盡，方丈應該對監製岑應重重有賞。
俾大台玩完，最慘係成班友被巴絲勁寸自己攞嚟衰。在 fb率先叫人唔好睇，又話要俾人睇清大台有幾核突嘅伍公子（原名：伍文岍）就話冇所謂，「就算今次全部 YouTuber收晒皮都唔關我事，好符合我意向，網絡就係要加快速度，淘汰一啲冇用嘅老屎忽喺度，好多人用 YouTuber個名呃飲呃食！」真係好有霸氣喎。
F：《 FACE》伍：伍公子
F：究竟鬧阿姐乜嘢，搞到大台要 cut？
伍：其實係我一個兩個鐘頭嘅訪問，訪問我對 TVB嘅睇法，有一段我批評阿姐嘅，我以《 Sunday靚聲王》為例子，我就對住鏡頭講：「唔係呀？真係汪明荃喎，汪明荃喎……唔係嘛？」我就係咁樣講咗幾次，有人話我應該尊重阿姐，但如果只係阿姐一兩次唱得難聽，咁冇人會鬧佢嘅，但咁多年嚟，網上、報章評論，其實掉番轉頭諗，阿姐你可唔可以尊重番觀眾嘅耳朵呢。我發表完意見，佢哋剪完就俾番啲 focus group（出街前的試播會）睇啦，監製岑應講番俾我聽 feedback係好嘅，話大家睇到嗰段笑爆嘴，我就覺得有話題性啦，香港商業社會就係話題性嘛！但喺我眼中咁功利嘅 TVB，竟然唔出一個咁有話題性嘅環節，我覺得幾有趣囉！ TVB已經唔理觀眾，離地到只在意內部嘅政治喇。
F：你哋今次俾 TVB玩咗鑊，係挑機失敗？
伍：冇所謂㗎，我覺得，香港網絡淘汰速度好慢，如果有個節目俾大家認清 YouTuber嘅真面目同埋能力，有能力或者冇能力都好，今次呢個節目咪好公平咁顯示俾大家睇囉，一班網絡人上電視就係咁嘅面貌喇，好唔好睇觀眾自己判斷，我亦希望觀眾攞住呢個作為依據，決定以後喺網上收睇咩節目。
我唔覺得拍呢個節目有錯，就算今次全部 YouTuber收晒皮都唔關我事，好符合我意向，網絡就係要加快速度，淘汰一啲冇用嘅嘢，香港太多既得利益者喇，網絡唔應該再存在啲老屎忽喺度。喺網絡 5年已經係老屎忽嚟，好多人用 YouTuber個名呃飲呃食（問公子究竟係邊個？佢就冇答），咁今次有好多人做完個節目，又可以出去𢱑撈下喇。我唔理佢有無俾人玩或者鬧，但佢可以周圍同客講。不過我都係老屎忽嚟！ Yeah！
F： TVB有冇得救？
伍：我唔係想 TVB執笠，我係想有個好嘅電視台俾一啲好嘅節目觀眾睇，點為之一個好節目其實好簡單，每晚有個節目令我返去追睇，咁就係成功㗎喇。而 TVB𠵱家係做唔到。至於有冇得救，今次呢個節目顯示 TVB嘅態度，無論係 Promo，甚至係我哋成班網絡人去見佢哋兩位高層余詠珊、杜之克，聽到個旁白都係咁講，「 TVB今次終於打開度門喇，放班𡃁仔入嚟，」佢哋態度係，我哋係皇恩浩盪呀，你班契弟快啲認契弟啦，佢哋係一種高高在上嘅姿態，佢哋睇唔起網絡上發生嘅事，睇唔起網絡人，睇唔起網絡，佢哋想爭取年青人市場，但因為用舊有思維睇網絡，所以唔會成功。
F：你點先會睇 TVB啲劇？
伍：如果 TVB啲劇寫實啲，人性化啲就已經會好睇喇，唔好俾編劇咁多限制，講句仆街都唔得，但其實行出街點會聽唔到粗口，𠵱家啲劇集對白就係好唔人性化，《愛•回家》會講粗口，我就好滿意喇，啲反應真實啲囉，如果麥包會講：「 X你老母。」我就會睇喇！
F：點解𠵱家又唔做 YouTuber？
伍：由細到大都好鍾意睇 YouTube。一直覺得香港點解冇 YouTuber出現呢？以前只得巴士阿叔嗰啲黐線佬，我就覺得香港需要有人做啲嘢，你哋可以當係一個使命召喚啦，就開始做喇，發表一啲我自己嘅睇法。
但𠵱家我就已經冇做 YouTube喇，我𠵱家淨係做 Twitch直播（遊戲影音串流平台），𠵱家香港嘅 YouTube社群係令我失望，香港網絡界成日有啲垃圾出現咗，又唔會淘汰㗎喎， keep住喺網絡好耐分解唔到咁，𠵱家香港嘅 YouTuber就係好多𡃁仔𡃁妹，冇嘢發表純粹想紅，想賺錢，就扮有聲音，扮有意見，然後出嚟自稱 YouTuber（公子又唔講邊個），覺得 YouTuber呢個名好型。如果呢個時候我再自稱為 YouTuber，我會覺得自己好核突。
攝影：林迅景
|
鍾意就快D Share啦！
|
|
|