關心妍被激走暗寸捧欣宜嘥錢
正所謂三個女人一個墟，五個女人直頭是非一大堆！同唱片公司的鄭欣宜、雨僑、Crystal與Regen獲公司豪擲120萬力谷合輯，四朵小花未出碟前已爆出爭寵及搶資源，殊不知戰火已進一步蔓延！近年被投閒置散的「掛名一姐」關心妍不滿公司大細超，明年約滿的她打算拍枱走人，臨走前暗寸四位師妹：「首歌唔得嘅話，揼幾錢都冇用。」
職場如戰場，尤其在娛樂圈爭個你死我活絕非閒事！同屬Neway Star唱片公司的鄭欣宜、雨僑、張紋嘉（Crystal）與張惠雅（Regen）早前被本報踢爆爭寵爭出面，有傳四人推出合輯《全女打》因資源分配不均，令三女不滿有人受盡萬千寵愛而有所微言，其中即將約滿的雨僑更萌生去意。不過，這場爭寵戰隨着《全》碟上周推出後，戰火蔓延至「一姐」關心妍身上。
據知，今次辣着關心妍有傳主要有三大原因，首先是四位小師妹在唱片市道低迷下，仍獲公司落重本出合輯。欣宜、雨僑、Crystal與Regen獲安排身穿貼身裙，化身成啤牌女王拍攝封面及相集，並以啤牌盒形式包裝，加上全碟八首歌均有拍攝MV，整張碟製作、包裝連宣傳費埋單逾120萬港元。反觀已簽約兩年的關心妍去年推出的《C-12》EP，因只屬實驗碟性質，投資「豐儉由人」，似有大細超之嫌！而她今年推出的歌曲《關家姐》與《人生銀行》反應不俗，但新碟大計仍然冇厘聲氣，令她進一步心灰意冷。
宣傳遭冷待 攞獎冇人知
另一勞氣是「親女不及養女大」，關心妍的唱片與經理人合約已「賣身」給Neway Star，卻遭公司冷待，兼且被「外援小師妹」欣宜爬頭，令「一姐」之名早已名存實亡。最後的是公司今年明顯對關心妍的宣傳放輕，除了在澳門舉行了一場演唱會外，未有其他音樂大計，即使早前在廣州先鋒榜奪獎，公司亦沒幫手宣傳，攞獎攞到冇人知！
據知，滿腹怨氣的關心妍已對公司死心，明年約滿的她一早放風嗌離巢！她昨日接受本報電話訪問，對於有指公司豪擲120萬力谷四位師妹，她話中有話：「依家歌迷眼睛係雪亮，首歌唔得嘅話，揼幾錢都冇用（你先係一姐？）我年紀就係一姐，年紀細嘅當然要多啲宣傳」而唱片公司總經理朱先生則承認關心妍於明年約滿，但仍對合作機會抱樂觀態度，但強調現時市場風氣不同，不一定要推出唱片。
Crystal反擊：分配得好
至於有份加入戰團的Crystal明顯因有合約在身，惟有力撐公司資源分配妥當，認為有能者居之：「分配得好喎！明白市道唔好，公司會視乎搵唔搵到錢而去投放幾多資源。（偏心欣宜？）我知道佢係個好努力嘅歌手。」對於出道八年仍未曾推出個人碟，她慨嘆：「可能我唔夠努力，我會再努力啲。」
文：音樂組
|
鍾意就快D Share啦！
|
|
|