日前，何雁詩陪男友 Wataru在餐廳開工，逗留至深夜，她開始吸食中東水煙，男友同佢兩份吹。
娛樂偵訊
無煙大使破滅 何雁詩私竇吹水煙
年僅 22歲、運動員出身，靠《巨聲》入娛圈的何雁詩，一直賣乖巧、健康形象入屋。年初得大台力捧拍青春劇《四個女仔三個 Bar》，又與六呎高日韓混血男友 Wataru愛得高調，事業愛情起雙飛。
不過乖巧只係表面包裝，日前何雁詩被發現孖男友在私竇「開餐」，齊齊吸食中東水煙。曾任「無煙大使」的她，今日已變成煙鏟！
日日瘟仔
桃花旺盛的何雁詩，○九年參加《超級巨聲》入行，擁有甜美外形的她先後與「巨聲幫」林師傑、謝東閔拍拖，男友一個接一個。到去年十一月與謝東閔甩拖後，事隔兩個月，火速搭上日韓混血韓國餐廳老闆 Wataru，並不時高調晒愛。
冇工開，何雁詩享受瘟仔樂，經常到男友餐廳打躉黐到實，甚至「老闆娘」上身，幫忙招呼客人。日前晚上七時，記者發現何雁詩和男友在餐廳戶外位置一角糖黐豆，當晚生意不算繁忙，二人可在店內偷閒煲劇，其間枱上放着一壺中東水煙，但二人未有吸食。
男友帶壞
到凌晨時分，客人逐漸減少，何雁詩開始放下戒心，與男友「開餐」。記者所見，她挨在男友肩膊開始吸食水煙，技巧亦相當純熟，吹了幾下何雁詩開始捽鼻兼口擘擘，之後她將水煙遞給男友，二人你吹一啖我吹一啖，旁若無人，有幾分似電影《胭脂扣》裡如花與十二少吞雲吐霧的畫面。
據知何雁詩忽然成為煙民，多得男友好帶挈。「同 Wataru拍拖後，佢幾乎晚晚喺餐廳打躉，仲會落手落腳做樓面，有時陪到三、四點打烊先走。又成日帶啲 friend嚟幫襯，陳瀅、劉佩玥都係熟客。以前 Stephaine（何雁詩）唔食煙㗎，但跟得男友多，依家係水煙專家，連炭都識換。
「 Stephaine不嬲拍拖大過天，以前同師傑、謝東閔一齊嗰陣都要黐到實。佢好識氹人，同師傑拍拖嗰排，逢 weekend就帶埋男友父母去西九，教佢哋打 golf。 Stephaine對男友，永遠冇 say no。」知情者說。
門當戶對
何雁詩與男友唔單只喜好啱晒 key，兩個仲門當戶對， Wataru家住西九千萬豪宅，家境不俗，由他打骰的韓國餐廳價錢走高檔路線。至於同樣家境富裕，父親從商的何雁詩，六歲開始被家人培訓打 golf，十歲被選中入港隊，得過不少獎項，並曾出戰東亞運動會。去年二月，何雁詩斥資八百五十萬購入奧海城浪澄灣單位，並以個人名義持有，工作量不多，一樣有本事做小富婆。
水煙有風險
近年本港愈來愈多中東餐廳及酒吧，售賣加入不同水果味的中東水煙。不過有呼吸道專科醫生提醒，水煙跟香煙一樣，通過加熱令煙草釋放出含數十種致癌物及致癮性質的尼古丁煙霧外，吸食水煙時環境中的一氧化碳含量亦較吸食香煙高出廿倍，因此在室內進食水煙有機會招致一氧化碳中毒。而不少名人也迷上水煙，包括霍啟山、「黑仔」姜皓文，至於曾吸毒被捕的孫興，早年便在台灣開水煙館。
無煙大使食水煙
何雁詩早前夥拍陳凱琳、陳瀅、劉佩玥，拍大台劇《四個女仔三個 Bar》，因為形象可愛又打耳，成功以乖乖女形象入屋，加上是運動員出身，去年便曾擔任「國際自我保健日大使」， 11及 12年亦先後成為「無煙大使」及「禁毒大使」，今次食水煙斷正，乖女何雁詩相信有排煩。
撰文、攝影、攝錄：娛樂組
|
鍾意就快D Share啦！
|
|
|