| next 1/1 pre | |
 | |
| next 1/1 pre | |
股壇近期波譎雲詭，有波幅冇升幅，似乎冇一樣資產有運行，孖妹最近覺得拎鑊鏟炒股賺番嚟嘅錢，好似都唔夠買驚風散食，所以有意埋街食井水，學下點樣搵安樂錢!專家教路，想喺新一年印印腳收錢，原來最緊要係學識自製被動收入，等啲銀紙乖乖流入自己戶口。
市：「散戶Blog王」 市場先生（筆名）
彩兒：你手持嘅滙控（00005）股票價值夠買半層樓！所以我一向係你嘅粉絲。你嘅投資心法喺Blog寫到明，係透過價值投資達致財務自由，即係唔使頻撲就舒服有錢收，真係咁易？
市：自製被動收入好重要，我主力投資一籃子收息股去達標，依家有番工時，就有收入累積持股，股份有息收時，又可將息率再投資，到退休嗰陣，呢啲收息資產就可支持生活開支。
我參加高息股股東會時，識咗啲靠揸高息股過「食息」生活嘅朋友，佢哋唔多理大市升跌，只係會煩惱點樣利用股息再投資，咁先係正確投資態度，當你投資咗間公司，當然就係等佢每年派經營利潤畀你啦。另外，你投資一間公司後，佢
若一路有增長，長揸收息自然可Cover買入成本。
Kitty：要成為你嘅愛股，有乜條件？
市：條件係股息吸引、資產有折讓，同埋淨現金公司！若夠高息，資產折讓冇咁大、現金唔太多都尚算Ok，喺公司類型方面，心水係持有物業出租嘅收租股，貪佢資產實在，現金夠多，有安全邊際，即使美國進入加息期，具有抵抗波動嘅能力，銀行收緊借貸都唔使驚。值得留意的是，工業股資產折讓大，係因存貨及機器，唔及地皮同「磚頭」值錢㗎。
以前我愛慕過金融股，但今時唔同往日，依家行業監管有緊冇鬆，監管機構只在乎你會否執笠影響國家經濟，對資本充足率要求增加，政府為打擊恐怖分子又要凍結相關戶口，銀行為免被罰款，仲要增聘人手Check住戶口，在成本增加
下，金融股盈利自然受衝擊。我手上有3萬股滙控，平均買入價64元，好在有約6厘息，以後打算齋揸唔加碼。（孖妹計落，市場先生淨係滙控持股價值已達192萬元。）
彩兒：點知啲高息股會唔會派派吓息，突然陰濕起嚟唔派？
市：首先要睇佢過去派息紀錄穩唔穩定，以AEON 信貸財務（00900）為例，過去十五年，無論經歷沙士或金融海嘯等風波，每股派息都Keep住增長。另要睇公司生意模式風光是否可以持續，揀持有物業收租嘅公司好處在於，縱使零售商舖減租，商業寫字樓亦唔太受影響，加上現金充裕，可以再收購物業嚟收租。
Kitty：聽聞你心郁郁想買樓？
市：我今年投資回報有20%， 現時主力揸英皇娛樂酒店（00296）、華廈置業（00278）、AEON信貸財務及彩星集團（00635）等，自住物業係租住單位，未來樓市若回調都會想買樓自住，若樓價跌勢持續，會考慮買單位收租。不過，買樓銀碼大，買得幾多間？好難分散風險，一旦租客有乜冬瓜豆腐咪變凶宅；好處就在於買賣唔似股票咁易，冇咁易受一時嘅市場情緒影響，有啲人被迫坐貨，仲因而發達添。
香：御峰理財投資組合經理 香敏華
Kitty：究竟乜嘢係「被動收入」？啲銀紙自然飛落我個袋？
香：呢個詞彙應最初係出自《窮爸爸‧富爸爸》一書，我哋平時番工揼石仔賺人工，呢類就稱之為「主動收入」；我哋唔需要用太多主動勞力去賺取嘅穩定收入，就算係「被動收入」。
想賺「被動收入」要靠自己，一係就要有才華，一係就要買入資產從而賺得回報，呢類收入都分好多種，包括息率收入、債息收入、物權收入及版權收入，頭3款都係要靠買入資產去錢滾錢。
彩兒：我有好多姊妹，最大嘅才華就係副皮囊，點算？
香：咁佢有冇銀彈先？有積蓄就可視乎個人風險承受能力進行投資，力爭做「食息族」。若係要低入場費，不妨考慮高息股，首選派息穩定之餘，派息有增長嘅股份，因歷史數據顯示，若股份派息有增長，就代表公司業務增長得好，而非拎公司現金出嚟派，前景較值得睇好，股價亦表現會好啲。有部分股份派息唔穩定，且高派息或者係因一次過特別息、公司股價大幅下跌，因而令人有高派息嘅錯覺，呢類就唔建議揀喇。
周期性股份，好似非必需消費品股、能源股，易受經濟周期影響，顧及中國經濟持續放緩，商品價格下滑，所以我唔太睇好；相反，非周期性股份，如公用股、必需消費品股受經濟周期影響較輕微，可以考慮。
至於揀收租股，因應零售業寒冬，就應避開主力以商場零售舖位收租嘅企業，寫字樓租金未見因應樓市下滑而受累，所以主力揸寫字樓收租嘅股份亦諗得過。
Kitty：咁中至高入場費，有乜好路數？
香：中入場費嘅話可考慮冷門少少嘅車位投資，若市況步寒冬，無疑造就入市機會，揀車位最緊要睇屋苑同周圍嘅車位供求，物業單位與車位數目比例要高，附近又缺乏停車場。
至於高入場費，當然唔少得買樓做包租公、包租婆，一般而言，美國進入加息期後半年至九個月，本港先會跟住加息，不妨等香港真正加息後，睇埋市場反應再決定都未遲，但係若只係勉強過到壓測，都係等樓市回調再部署啦。
植：耀才證券市場研究部經理 植耀輝
彩兒：我食驚風散食到厭，有乜穩健股份可療癒我嘅弱小心靈？
植：雖中華煤氣（00003）過去幾年股息率唔高，現時都只有兩厘幾，但勝在公司近年全年業績都會有十送一紅股，若作為長線持有，都幾和味，係穩健之選。
Kitty：我經得起風浪㗎，有乜啱我？
植：我有隻冷門少少嘅，信星集團（01170）過去幾年業務發展唔錯，主因公司從事鞋履代工，比較集中喺二線品牌，所以同寶勝國際（03813）等一線品牌代工商冇直接競爭，令公司業績相對穩定，近年派息都唔錯，現時股息率有4.71%。
另由於內地工廠受最低工資因素影響，該公司近年將生產基地遷往東南亞地區，令經營成本壓力得以紓緩，改善營運效率，且若該等東南亞地區入咗跨太平洋夥伴關係（TTP），有利公司生意額，相信對信星都有正面幫助。
─ ─ ─ ─ ─ ─ ─ ─ ─ ─ ─ ─
「東網Money18」fb專頁：有討論、有分析，齊來FUN享，贏盡●你Like
http://www.facebook.com/money18
|
鍾意就快D Share啦！
|
|
|
