探熱針
告別作爆出 離巢康華：公司唔夠膽俾獎我！
去年底無聲無息約滿無綫的康華，卻憑告別作《刀下留人》萬貴妃一角忽然爆出，贏盡網民歡心，盛讚 44歲的她 keep得好女人味濃，被賜封「最正奸妃」。
入行 21年未拎過任何獎項，拒留低無綫的康華，接受訪問時坦言自己唔識同人爭又唔夠人靚，更暗寸無綫唔夠膽俾獎佢。事實上，早在 07年中已北上，留守內地打拼了 5年的她，早已賺到笑！大台份約，可有可無。
成身生晒凍瘡
長期提供膠劇的無綫，終於憑新劇《刀下留人》打開裂口！雖然冇一線阿哥阿姐撐場，但勝在題材夠新鮮，結果爆冷炒起話題，特別是在劇中飾演萬貴妃的康華，超搶戲！
「係意外驚喜，估唔到評價咁好。其實接《刀下留人》嗰段時間都撞咗一套大陸戲，嗰套戲要去哈爾濱拍，我試過零下四十度開工，成身生晒凍瘡好辛苦，加上考慮到自己喺香港好少機會接到咁好嘅劇本，所以就接咗《刀下留人》，推咗大陸戲。」剛由內地拍劇返港的康華說。
有場戲被剪走
九四年入行的康華，拍過唔少劇集，講到最代表到自己的作品，她說：「我又冇數過拍咗幾多部，自己比較鍾意《刀下留人》個角色，因為多啲感情戲有機會發揮；另外仲有好耐之前嘅《陀槍師姐》大家姐角色，雖然同我個人太唔相似，反而係種挑戰。」
據了解，《刀》劇有不少場口最後被剪走，令出街的劇情出現不太流暢的情況。
「係呀！監製有提過，我死咗皇兒場戲都剪走咗，拍嘅時候拍多咗，有廿七、八集，要劇情緊湊啲就要取捨，本來播廿五集，而家有廿六集都多咗一集。有時就係咁，唔會樣樣嘢都完美。喺香港做電視有時間限制，大陸自由度高好多，我試過拍套廿五集嘅劇，最後可以剪到五十集；大陸市場太大，有好多唔同嘅平台，香港得一個。」康華說。
自嘲唔夠靚
入行後一直留守無綫十四年的康華，○七年離巢北上發展，五年後重返娘家，去年底滿約後決定不再留低。
「公司係有搵我傾長約，但我做咗咁耐，好多嘢唔會再太介意，自己喺內地又發展得幾好，我鍾意自由啲，要合作都唔一定要被綁死。」
康華演技早被肯定，卻一直不曾得獎。
「有咁嘅（攞獎）機會當然想我相信只要佢哋（無綫）大膽啲，俾個咁嘅機會我，只要有個好劇本有發揮嘅角色，我會可以去爭取到一個獎，但呢啲嘢要睇好多環境因素。
「我肯定唔到自己仲欠啲乜，只係你俾我，我就會盡一切能力去做好，你唔俾我亦一定有你嘅原因，可能我唔夠積極、唔夠靚！不嬲都覺得自己係差一啲嘢，有時都幾自卑。」
後生出位過
康華不願意有為而為，棄權唔同人爭！
「冇太刻意去爭，係我嘅缺點，會蝕底嘅！但刻意去改變做啲自己唔鍾意嘅事，反而會令人唔舒服，又驚嚇親人。惟有盡量做到最好，做到人哋都覺得好，然後再俾機會我，當然，現今社會我呢個做法係龜速。」
康華說，自己也曾為爭取見報，做過一些越線行為。
「啱啱入行時後生，都做咗啲唔係自己鍾意做嘅事！有段時間身邊好多人叫我積極啲，或者起碼著得性感啲去影相做宣傳，咁做最後可能啲相有機會登出嚟，但唔係自己好想做嘅嘢。而家年紀大咗，見報率呢樣嘢好閒，自己唔係行嗰條路，踏實咁做好啲戲好過。」康華說。
最佳綠葉
出生於天津的康華，七歲隨家人移居香港， 93年畢業於香港演藝學院舞蹈系， 94年參選港姐三甲不入，加入無綫成為藝員。入行廿一年，演過近百套劇集，當中最令人印象深刻有《鑑證實錄》系列的溫若嫻、《陀槍師姐》中的大家姐心姐及《掃黃先鋒》的淫媒 Anita等。多年來從未做過女主角，而且多演反派，是無綫綠葉中堅分子。
06年，康華曾經憑《男人之苦》入圍《萬千星輝頒獎典禮》的「最佳女配角」，但卻敗在《隨時候命》的楊思琦手上， 07年中滿約離開無綫，北上賺人仔五年。 12年回巢，短短三年拍超過十套劇，去年滿約決定唔玩，卻憑告別作《刀下留人》中的霸氣萬貴妃爆出，被網民熱捧。
撰文、攝影、攝錄：娛樂組
|
鍾意就快D Share啦！
|
|
|
