探熱針
搵八千孭起頭家 坤哥𢱑撈供妹讀大學
攞獎喪喊，搞到鏡片霧氣變人氣，再加料於商台叱咤頒獎禮「動 L」的「毒男」吳業坤，紅爆！
成為新人王的坤哥其實在破碎家庭成長，父親欠債離婚，靠阿媽做幾份工養大。入行後，每月得八千底薪的他，為分擔經濟重擔，周圍𢱑撈，賺外快供細妹讀大學。最終捱到收六萬騷價，成為屋邨仔成功靠苦幹的活生生例子。
母親打兩份工
憑處男碟中的《原來她不夠愛我》，在商台叱咤頒獎禮鍊贏另一首金曲《羅生門》而橫掃三獎的坤哥吳業坤，一夜間由樂富屋邨仔升呢成為人氣王，騷價更由最初的五千颷升到六萬，勁升十二倍。
一○年參加《超級巨聲 2》入行，出道五年，在無綫月薪只得八千，而且任用無爆騷，長期入不敷支。坤哥在單親家庭長大，父親嗜賭欠債，十多年前跟坤媽離婚後冇照顧頭家，坤媽單打獨鬥，打兩份工捱大坤哥兩兄妹。
曾經攞過綜援
一家攞過綜援，自小在貧窮線掙扎求存的坤哥，中學已經做兼職幫補家計。入行後，搵八千，五千俾家用，餘下三千自己做零用。眼見母親為了兩兄妹早已捱壞身體，坤哥更加慳字行頭，等特價下午茶時段去醫肚，不時兩餐當一餐。為供細妹讀大學，他更加絞盡腦汁，𢱑撈搵銀。
「參加完《巨聲 2》頭幾年，冇歌出又冇乜劇拍，靠份人工養家，仲要供埋個妹讀書，根本頂唔住！後來坤哥自拍唱歌片放上網，一來自娛二來搏機會，久而久之，真係有啲商場騷敲佢門。就算兩、三千蚊一個騷仔做起，佢都照接。初時一個月得一兩場，因為有口碑，做吓做吓愈接愈多，騷價做到爆紅前萬二。啲 job全部係靠佢自己勤力咁搭返嚟。坤哥好錫媽咪，做商場騷賺到外快後，佢將大台份糧俾晒媽咪。而家坤媽一星期會做兩、三日家務助理，輕鬆咗好多。」坤哥好友說。
想重修父子情
逐步脫貧，坤哥目前最渴望的，是與父親重建關係。
「參加《巨聲 2》嗰陣坤哥唱過陳奕迅嘅《單車》，歌詞入面『如孩兒能伏於爸爸的肩膊』係佢心聲，真係唱到想喊。雖然佢都覺得自己老豆不負責任，但另方面又好想感受吓父子親情，雖然兩兄妹會一年見老豆兩、三次，但大家心入面都有條刺，有時坤哥想主動啲，又驚對方反應冷淡，自己會再受傷。」坤哥好友說。
本週一（一月四日），坤媽外出一見到記者即摩打腳走。記者追問她有否想過坤哥可以爆紅，她說：「冇諗過」聽到話坤哥好生性，坤媽腳步稍為放慢：「佢係好生性，好慳家。」
至於坤哥對不負責任的父親仍未釋懷，坤媽眉頭一皺說：「佢唔出聲，唔提㗎！（坤哥有冇主動同老豆聯絡？）佢哋冇見，一路都好少見。」
金蛋大計
真人騷坐正
一夜爆紅的坤哥，過往因「毒男」相不被無綫重用，當其他「巨聲幫」如許廷鏗、胡鴻鈞等先後簽「星夢娛樂」出碟，坤哥都冇份，只被安排台慶扮棋，對白都冇一句，不過，「冇聲棋」反而惹起觀眾留意，加上金曲《原來她不夠愛我》的威力，坤哥由蛋散變人氣王後，大台立即變臉當寶，計劃 3月開拍真人騷，以直播坤哥宅男私生活作頭炮，而「一姐」吳若希則為第二集嘉賓。入行五年，坤哥終於做主角。
處男開騷
所屬的唱片公司 Neway去年已有計劃 16年幫坤哥搞音樂會，如今更加大條道理，正式入紙申請場地開騷吸金，不少主辦商亦主動向 Neway招手邀合作分一杯羮。第一站是伊館先試水溫，有望兩年內企上紅館。此外還有護膚品、食品及時裝廣告排住傾，大部分都七七八八。
撰文、攝影、攝錄：娛樂組
|
鍾意就快D Share啦！
|
|
|
