下月結婚兩周年，早前伊健同蒙嘉慧出發去北海道滑雪慶祝兼過白色聖誕。
娛樂偵訊
結婚兩周年 鄭伊健蒙嘉慧北海道重溫
蒙嘉慧同鄭伊健結婚兩年，堅持不育主義，冇包袱冇牽掛，兩公婆定時定候外遊放電。聖誕前夕，二人現身機場，啟程飛福岡、札幌，展開六日五夜滑雪之旅，過白色聖誕兼提前慶祝結婚周年。
情侶裝出動
出發當日，兩公婆全身黑色情侶裝示人，婚後工作量大減的蒙嘉慧，八月拍完港台劇《火速救兵 3》後一直休息，明顯圓潤不似過往骨杉杉。同老公鄭伊健一人一喼，排隊 check in，見到記者笑晒打招呼。
到埗後，心情興奮的蒙嘉慧急不及待晒滑雪相上網，其中一張坐吊車上雪山相，她留言話：「不怕死的我又來了！」網友回應：「滑雪要小心！」蒙嘉慧即覆：「某人叫我頭盔也不用戴！」
第二日，蒙嘉慧又將自己著住一身鮮紅色滑雪裝，坐在雪地上的相放上微博：「中段休息中……」
提早慶祝
出名大細路的鄭伊健，北海道滑雪幾乎是每年冬季的指定活動。過去半年，忙住做《友情歲月演唱會》內地巡唱，終於有空檔放假，可以撇甩一班「古惑佬」，同老婆二人世界。
「呢三個月伊健做咗十場《友情歲月》巡唱，幾乎日日都要排舞練歌，見班古惑佬多過見老婆。下個月係結婚兩周年紀念，上年佢哋去咗北海道滑雪慶祝，但今年伊健要開工，到時未必就到時間出埠，所以趁有幾日假，陪下老婆兼提早慶祝！返香港後第二日，伊健就要飛去南京，做倒數活動。」鄭伊健身邊人說。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
