元旦日在律師樓註冊，二人大騷在土耳其買的情侶婚戒，之後再到酒店切蛋糕慶祝。
探熱針
JJ元旦秘婚擺兩圍
34歲賈曉晨（ JJ）跟樊少皇拍拖三年多，其間分手又復合，去年 10月，二人入紙登記註冊結婚。講過婚禮不會大搞的力王嫂，原來已戴上三卡半結婚鑽戒，並於元旦當日，在律師樓正式簽字，一對新人在註冊當日在酒店擺兩圍宴請觀禮親友， JJ簡簡單單做樊太。
外母新郎眼濕濕
過去幾年，大部分時間都在內地開工的樊少皇和 JJ（賈曉晨），原本打算在平安夜註冊，但礙於當日大部分律師行都提早收工不接 job，二人才將婚期順延至元旦日。
「佢哋一月一日喺律師樓做簽字儀式， JJ父母仲有內地幾個親戚都飛咗嚟香港做見證，新娘喺現場無喊，反而 JJ媽同新郎就眼濕濕， JJ都話自己媽咪同老公喺同一類人，好易喊。」知情者說。
收三卡半鑽戒
正式成為夫妻， JJ亦早已收下老公送贈的三卡半、價值近四十萬鑽戒，但簽字當日，一對新人用來交換戒指的，是一對二人去年到土耳其旅遊時買的情侶戒指。
收埋三卡半婚戒唔戴，主張一切從簡的 JJ，儀式後到酒店中菜廳擺兩圍，和觀禮親友吃飯慶祝。
「佢兩個都唔鍾意鋪張，但簽字嗰日少皇都有執到正著禮服， JJ就著咗條白色短裙同紮咗個髻，不過唔想張揚，兩個都著住大褸包到冚行入酒店。不過 JJ的內地親戚就靜靜訂咗個兩層高結婚蛋糕送去酒店俾佢哋， JJ諗住一家人食餐飯，冇諗過嗰日要切結婚蛋糕，所以都好驚喜！」
年底小島旅行
樊少皇和 JJ共過患難，步入人生另一階段，對於會否補擺喜酒，二人仍在考慮中。
「係咪要再補擺酒仲諗緊，佢哋有考慮過請一班好朋友去小島旅行慶祝，但就算成行，都要等到今年底，因為兩個都要開工， JJ六月亦接咗部電影要拍，暫時抽唔到時間準備。」知情者說。
無聲婚禮
結婚雖然是兩個人的事，但有人喜歡熱鬧大搞，亦有人選擇靜靜地進行，尤其娛圈情侶，成事後才向外宣布喜訊，多的是！
汪明荃 羅家英
09年，當時已 61歲的汪明荃跟拍拖 20年的羅家英因先後經歷生死關頭，二人決定以對方作為終生伴侶，又心血來潮到拉斯維加斯註冊結婚。未有穿上婚紗的阿姐用 LV玫瑰大絲巾改成的旗袍做禮服，一樣靚。
劉德華 朱麗倩
一直是劉華背後隱形女友的朱麗倩，拍拖 19年，直至 09年才被揭發二人於 08年 6月在拉斯維加斯結婚，事後劉華解釋結婚是因為要進行合法人工受孕，三年後，劉華終圓心願做爸爸，誕下女兒劉向蕙。
撰文、攝影、攝錄：娛樂組
|
鍾意就快D Share啦！
|
|
|
