彈出彈入呀你咬我食呀！噚晚，自詡為台獨剋星嘅黃安，突然於微博宣佈「我累了，我要走了，過去的三個半月反台獨日子如今看來好諷刺。朋友們再見；台獨們，後會有期！」完成「超級催票機」重任之後就走？乜……乜你真係好似黃秋生咁講：係臥底？傻啦，彈出彈入嘅黃安，出Po冇耐已經急急刪Po，當自己冇講過。拿，佢係咪臥底呢？得佢本人先至知，但你估佢唔驚豬嘅咩？由子瑜效應發酵嗰一刻開始，網上傳得鬧哄哄:黃安幫了民進黨一個大忙!大家都懂，大陸網民對呢啲嘢，係幾咁敏感，幾咁……咩0架啦。依家黃安「被臥底」，黃安本人怪罪於「台獨對我的痛恨抹黑」，但佢老人家最心痛是:「沒想到大陸的線民也跟著國內傻逼公知、水軍起舞，不明就裏的對我亂罵一通。我錯了嗎？」嘩，黃安咁勇敢咁樣鬧爆一班「米飯班主」？所以呢，呢個Po連埋宣佈暫別嘅博文好快就刪咗。但係，新浪微博對黃安嘅留言限制，至今未解除。今早，黃安再發微博，又有嘢宣佈:「二月三日，我將回台召開記者見面會，說明『周子瑜事件』始末，還原真相、還我清白！能作為一名『左右台灣大選選情』的歌手，幸福來得太突然了，聽聽看我怎麼說吧。支持安鍋的，轉起來!」嗯嗯，黃安真係……你完全估佢唔到。因為佢屈子瑜舉青天白日滿地紅嘅旗幟，令這位16歲少女慘成政治犧牲品遭JYP擺上祭壇要鞠躬道歉，仲要被迫跟稿說:「我感到非常非常非常抱歉，很愧疚…」明明冇錯卻要認錯，已令台灣人大為憤怒。Yahoo奇摩宣佈唔再發佈黃安嘅新聞，有KTV宣佈將黃安嘅歌落架。民進黨立委陳其邁今早喺fb宣佈，星期一上任第一件事，就係請內政部好好查一查黃安是否擁有台灣戶籍之餘同時有中國身分證……依家黃安卻宣佈要喺台灣開記招交代舉報周子瑜事件？點解黃安風頭火勢要暗中搵人保護仍堅決要返台灣？點解一方面驚大陸網民以為佢真係無間道都唔喺大陸先開記者會澄清？唔明白。但有大陸網民成功突破新浪重圍，喺黃安微博留下驚心動魄三個字:你完了。
|
鍾意就快D Share啦！
|
|
|
