周星馳自創光豬八爪魚遭小豬搶角色
「喜劇之王」周星馳這八年來沒有演出過電影，給人感覺已退居幕後，只導不演，但他受訪時卻矢口否認，笑言在新片中原本度身訂造「沒衫着」的八爪魚角色來過戲癮，怎料角色最終被羅志祥（小豬）所奪！拍攝期間，周星馳亦遇困難，便是寒天拍水戲，除了小豬沒病過外，全部演員「冧」晒，令周星馳要急謀對策，將大水池的水加熱，額外添器材，令電影超出預算！
周星馳自2008年《長江7號》後，八年未有再演戲，不少觀眾認定他已退出幕前，不再演戲，不過周星馳卻另有解說！
周星馳與羅志祥（小豬）日前接受訪問，提到賀歲片《美人魚》，執導該片的周星馳笑言自己戲癮大發，他說：「其實我想演戲，好似喺《美人魚》度，我已經度身訂造一個『八爪魚』角色畀我自己演，呢個角色好特別，可以全個拍攝過程冇衫冇褲着（因只貼特技膠紙）喺片場行，大家唔會覺得有問題，真係好有挑戰性，點知畀羅志祥知道仲搶埋個角色，我問佢，你真係得？佢好堅定咁話，得！咁我就冇咗呢個角色！」
最想演悲劇人物
提到周星馳早前跟徐克合作《西遊‧降魔篇》續集，問他可有向徐克自薦？他笑言：「好想演，但未傾，徐克就話電影拍完，哈哈！」及後周星馳正經道出，其實一直以來都沒想過不演戲，只要有好角色，他就會再演戲，不過，就算再演，都不會是搞笑，而是一個嚴肅角色，好像「八爪魚」一角，看似是搞笑角色，但其實是一個不折不扣的悲劇人物。
周星馳新戲推出，「星女郎」定必是焦點，今次還新舊星女郎同場，一個是拍過《長江7號》的張雨綺，另一個是在大型選拔賽中選出來的20歲內地新人林允，對於一新一舊，周星馳又有何評價？他表示：「張雨綺畀人嘅感覺係好驚艷，一見到會覺得好靚，林允就係好有氣質嘅女仔，佢哋係兩個好唔同嘅女性，各有各特色。」
新戲以科幻故事為題，當中亦有時空穿越，雖然周星馳身經百戰，但都被難倒，小豬爆周星馳在片場不斷要解決大大小小的問題，比演員辛苦很多，當中最需要盡快解決的，便是冬天拍落水戲，因實在太凍，且演員除了小豬外，全部都病倒！周星馳點頭承認說：「當時很多演員都病了，（小豬都病了？）佢骨格精奇冇事，但都要解決呢個問題，最後特別買咗一啲儀器將水池啲水加熱，呢樣嘢令劇組要有額外支出。（額外畀咗幾多錢？）總之，所費不菲！」
猛片如雲冇有怕
周星馳雖已落力解決問題，但小豬直言器材到的時候，已是電影差不多到尾聲的時候，不過，他明白訂器材需時，覺得「老闆」周星馳已盡了力，所以非常感謝他。
提到今年賀歲檔猛片如雲，當中包括周潤發的《賭城風雲III》、郭富城和鞏俐的《西遊記之孫悟空三打白骨精》，「雙周一城」盛況再現，不過周星馳「冇有怕」，因沒想過勝負問題，只希望觀眾喜歡，他謂：「我拍戲乜嘢都唔會理，我只會想一個問題，就係觀眾想睇乜嘢？觀眾喜歡乜嘢？呢個先係最重要。」
文：影視組
場地：馬可孛羅香港酒店
|
鍾意就快D Share啦！
|
|
|