毛記Like后盤菜瑩子，之前做訪問點都唔肯講真名同芳齡。點知佢個真名都未起到，就有人大爆佢曾經割雙皮同隆鼻整容。日前《蘋果》讀者爆相爆片兩張盤菜兩年前嘅相，分別係餐廳同港鐵入面同朋友影嘅合照。相中笑容燦爛嘅盤菜，招牌酒凹冇走樣，不過雙眼屬單眼皮矇豬眼，比宜家明顯細一半。《蘋果》今日就問番盤菜本人，出乎意料佢竟然爽快直認雙眼曾經做過吊線手術:「我兩年前做嘅，整得靚唔靚呀？以前靚啲定依家靚啲？其實我覺得依家都仲係好細(眼)。」盤菜話做手術時，雖然醫生有落麻醉藥，但做嗰陣都feel到痛：「做手術嗰陣醫生先喺你眼側面打麻醉藥，然後翻起眼皮，鏠幾針就搞掂，唔係嚇你，成個過程唔使5分鐘就做完，但就有啲痛。吊線只可以keep幾年，總之唔靚就再整。不過我絕對唔會整個鼻，因為以前睇電視，話整過鼻嘅人，大力扭個鼻會歪。」做完手術，盤菜話最方便係化妝嗰陣慳咗唔少時間：「以前化妝要化個幾鐘，依家15分鐘就可以出門口，講真，冇得驚人講乜，自己整得，預咗啦，不過我都係為咗靚之嘛，又冇打家劫舍！」其實盤菜亦被網民起底係樂隊Autumn Cicada嘅成員，唱動漫歌又有玩cosplay，有人搵到佢演唱嘅舊照，當年個look仲好薯嘜，不過肯大方承認自己整容嘅女仔真係冇乜幾個，盤菜其實除咗個樣，佢敢言夠真先係最大賣點！
來源 source: http://hk.apple.nextmedia.com
|
鍾意就快D Share啦！
|
|
|