歐陽震華撲熄10呎火 慘變粉人
無綫「福將」歐陽震華（Bobby）昨日為劇集《一屋老友記》拍攝廚房火燭戲，沒料到現實中，他年初一在屋企樓下竟預先上演一幕「救火英雄」，Bobby拿起滅火筒英勇為鄰居撲滅十呎大火，但自己卻變成「粉人」！
歐陽震華（Bobby）昨日年初四返將軍澳電視城為新劇《一屋老友記》開工，猴年第一日開工就要拍攝一場廚房救火戲，沒想到原來他年初一已遇上「火燭」！
看更唔識用滅火筒
Bobby昨午甫返公司即急不及待說：「年初一同老婆出街拜年，落到樓見到個看更同菲傭指手畫腳，咁我梗係去八吓，個看更好平靜咁話出面花園火燭，出到去睇啲火燒到十呎八呎高，於是叫看更攞滅火筒，看更慢慢去攞咗個滅火筒嚟，然後問我點開o架，同佢打開咗，咁我膽粗粗行先，點知畀看更噴到我成身都係粉，後來我索性搶咗個滅火筒自己去救火，最後救熄咗個火。」
救火後Bobby變成「粉人」，惟有返屋企沖涼換衫再去拜年，他笑說：「返到屋企工人問我咩事，我話出面落雪呀，不過不幸中之大幸，再沖多次涼好小事，不過個火頭好近座樓，我所知啲鄰居都出晒埠，周圍都冇人，好彩畀我撞到，但真係估唔到有人唔識用滅火筒，其實我都係第一次用。之後聽啲街坊講消防員嚟過，不過搵唔到我哋嗰度，可能我屋企太隱蔽喇。」Bobby隨後還教大家使用滅火筒，十分搞笑。
而經過「真火燭」的Bobby昨拍攝「假火燭」場面，劇組在戶外搭建了一個廚房，講述Bobby衝入廚房發現廚房起火，經過年初一火燭後，Bobby拍攝起來分外入木三分，面對四、五呎的火，Bobby笑說：「啲火仲細過我屋企嗰日喎。」他又自嘲有「假期病」，新年病了的他要在家瞓覺多日。
萬綺雯感冒懵懵哋
在化妝間受訪期間，Bobby巧遇《東坡家事》好拍檔萬綺雯，兩人互派利是，Bobby見到萬綺雯的利是封即笑說：「十三蚊呀？」萬綺雯則說：「十三萬呀！」萬綺雯則為另一新劇《致命復活》開工，早前剛病愈的她年廿九再大感冒，她說：「感冒好似好掛住我咁，喺屋企瞓咗兩日，年初三同老公去拜年，食咗藥懵懵哋，又唔記得帶利是，可能我潛意識仲想收利是。」講到亞視拖糧陷入清盤危機，萬綺雯避談說：「過年唔好講喇。」
文：影視組
|
鍾意就快D Share啦！
|
|
|
