譚小環前年在銅鑼灣開了小店渣哥賣魚蛋，開業兩年，去年利潤高達200萬，小環和老公蔡強榮（Eric）前晚與眾股東在銅鑼灣筵開兩席慰勞員工，同場大搞一年一度分錢禮，所有員工和股東都獲派錢，皆大歡喜。
愛狗𢭃利是
Eric甫到場即向員工大派利是，小環則抱着愛犬LaLa在場中四出𢭃利是，LaLa還識做地向「外婆」譚媽媽錫臉，譚媽媽送上大利是，小環全部收下並說：「全部係LaLa教育基金。」
豪飲幾杯後，小環與Eric向員工分紅，high爆的小環更行使頒獎嘉賓「福利」，向小鮮肉員工索吻，譚媽媽都癲埋一份，小環高叫支持：「今晚阿爸冇嚟，益埋阿媽。」小環肉緊地連環做箍頸黨，咀爆兩名小鮮肉員工，老公Eric大方未有制止，小環搞笑說：「不過頒咗大嗰幾個獎，佢就未畀我再頒。」
渣哥去年盈利多前年一倍，高達200萬：「我哋年年都係扣起份本，悉數拎出畀員工同股東分晒佢，大家開心最緊要，希望明年又賺多啲再派多啲。」良心老闆行為大受員工歡迎。頒獎禮壓軸是小環與老公互頒分紅支票，兩人又互咀大晒恩愛，現場全晚笑聲不停。
撐同行革命
對於初一晚旺角發生「魚蛋革命」，魚蛋港姐小環表示當晚一直留意新聞，徹夜難眠，她昨日接受訪問時說：「我覺得港人都係想喺新年感受吓呢個情懷，政府應該放寬幾日，唔通小販嗰幾日出嚟開檔真係會發達，大家都想熱鬧吓，點知發生咗唔開心事。我都賣魚蛋，梗係撐賣魚蛋啦。」
採訪、攝影：陳杰
|
鍾意就快D Share啦！
|
|
|
