娛樂偵訊
小霸王橫行無綫 樂易玲召王晶女照肺
現年 25歲的王晶女王子涵，有高層俾面睇住照顧，去年六月加入無綫後要風得風要雨得雨，更被一班看風駛𢃇的二打六團團簇擁變成小霸王，要他們私下幫自己 friend的食肆免費宣傳，又同班觀音兵愈玩愈埋七國咁亂，睇唔過眼的樂易玲，終於出手，話之你老豆係殼王心腹，都要照肺。
濫用公司資源
老豆是殼王同學，王晶女王子涵在無綫打尖拍劇做主持，機會優先！令不少靠埋堆搏機會的藝人，爭相投靠擦鞋，只要王子涵搞 party，逢請必到。
「大家黐埋去，話就話搏搞好關係可能有嘢關照，但未見其利先見其害，有人私底下叫 Ada（王子涵）做小霸王！因為佢每次吹雞叫大家食飯，食完大家會喺 ig或者微博 po相同寫嘢，仲要寫埋食肆個名，擺明係幫佢朋友宣傳。所以而家有啲人都開始 say no，但 Ada就會笑住咁問對方係咪唔想拍劇！
「公司高層權鬥大混亂，大家真係驚唔埋堆會冇嘢做，有啲人就算唔係好想去，都可能係咁意到一到；不過好多經理人都私底下提醒過大家，話要小心啲唔好踩錯線。」知情者說。
借公司資源幫外人免費宣傳，王子涵身邊一班觀音兵就算唔理計較照做，但身為經理人部門揸弗人嘅樂易玲卻唔同講法，認為要揸正嚟做。
「樂大媽都係忍到最近先出聲，大家都知無綫藝人做軟性宣傳都要收錢，佢成日喺網上見到呢啲 post好唔高興！ Ada變相叫班藝人幫佢啲 friend免費做嘢啫，等同倒公司米。樂大媽早排叫過 Ada返公司傾偈照肺，不過礙於王晶關係，大媽都係好溫和，好輕手！」
小心處理男女關係
據了解，對王子涵留咗手的樂易玲，雖然沒有直斥她搞亂檔，但照肺期間，亦乘機勸對方要處理好男女關係。
「觀音兵之中，何君誠表現最積極，周圍同人講話自己同 Ada拍緊拖，以為已經得米，但其實 Ada同其他男仔好似周志文，都有私下出街玩得好埋，連樂大媽都收到風，勸佢要檢點啲，因為藝人形象好緊要，揀定一個發展，唔好周圍點着晒啲火頭。講到咁明， Ada應該識聽。」知情者說。
家長管治
企業化但家長式管治的無綫，自從有樂大媽樂易玲上場睇經理人部門後，只要旗下藝人自損形象，影響身價令公司收益受損，便會揸正嚟做。
撰文、攝影、攝錄：娛樂組
|
鍾意就快D Share啦！
|
|
|
