探熱針
何傲兒咬住唔放 周子揚拜神轉運：唔要爛桃花！
去年大爆遭舊愛何傲兒胞姊何傲芝苛索生活費後，周子揚被何氏姊妹咬實唔放，發律師信要求他公開道歉，堅持所講全部真話的周子揚，早前透過律師提出和解，「唔想再糾纏落去，想快啲平息件事，總之問心無愧！」周子揚一臉無奈。
犯官非！趁新正頭，「西貢地王」老豆捉埋周子揚去黃大仙拜神，祈求趕走衰氣，問他有否求姻緣，周子揚唉聲嘆氣：「拍拖嘅嘢！順其自然唔想有太多爛桃花！」
律師信來往
遭何父打壓，「兒子戀」十五個月玩完！事後周子揚大爆曾遭前度家姐何傲芝，苛索每月二十萬生活費，何氏姊妹立即出律師信，要求對方公開道歉，過氣情侶律師信你來我往，隨時要對簿公堂。
「同 Lily（何傲兒）拍拖， Hinson（周子揚）其實好大壓力，因為每次俾記者影到， Lily爹哋就要佢哋分手。有時見 Lily回應話自己單身冇拍拖， Hinson都好唔開心好抑壓。雖然好多人都覺得 Hinson唔應該公開 GiGi（何傲芝）要求生活費嘅事，但佢無後悔講出嚟，仲話自己講真話，點解要道歉！不過因為咁惹官非， Hinson唔想拖落去影響到屋企人，所以想快啲搞掂和解！」
買風車轉運
官司纏身的周子揚，新正頭更被「西貢地王」老豆捉埋去拜黃大仙，祈求盡快轉運，趕走衰氣。
年廿九晚，晚上十點幾，周子揚兩父子去到黃大仙廟，其時已有不少善信等上頭炷香，廟外人頭湧湧，周子揚落車行去買香，再到隔籬檔口揀風車，其間有人認出要求影合照，他亦來者不拒。
買完風車，周子揚會合泊好車的老豆和另外幾個朋友，身為「西貢地王」，周父周業德是 VIP，可以由貴賓通道直接入內。
入到黃大仙祠後，周子揚跟父親分開拜神，周父與友人一齊，他則獨自走到供奉了呂祖、觀音和關帝的三聖堂，誠心上香，又圍住三聖堂拜一圈。
帶鬼妹落船
拜神求轉運！大年初四，周子揚再出動到中環九號碼頭，會合三名年輕鬼妹，坐遊艇出海。臨上船前，三女熱情與他玩自拍，影完相，周子揚一馬當先落船，原來船上早有大班朋友等候。
一船人，女仔在船頭吹住海風飲香檳，周子揚則與其他男性友人攞食物招呼人。被眾女包圍，周子揚表現神氣。
年年都拜黃大仙
至於被何傲兒兩姊妹咬住唔放，事後記者問周子揚會否公開道歉。
「道歉就唔會！交俾律師處理！（點解突然要求和解？）唔想再糾纏落去想快啲平息件事，專心做嘢！（你堅持自己講真話？）只係想快啲平息！總之我問心無愧」周子揚說。
不過，周子揚說跟父親去拜黃大仙，與惹官非無關。
「其實每年都會去拜黃大仙，希望新一年順順利利！（有冇求桃花運？）拍拖嘅嘢，順其自然依家自己都係單身，都唔會刻意搵對象，最緊要唔好有太多爛桃花」
提到日前帶咗幾個鬼妹落船出海，周子揚澄清當日自己只是陪表弟。
「因為表弟喺溫哥華返咗嚟，嗰啲係佢嘅朋友！都係正常社交。（咁有冇睇啱嘅對象？）佢哋啲男朋友都喺晒度，總之我係單身，情人節都係同好朋友 Daniel（薛世恒）過！」周子揚說。
反面收場
暗交明戀接近一年半的周子揚與何傲兒，去年 9月正式分手，但卻爆出在過去十五個月間，如何遭前度父親施壓，導致分手內幕。
12月 24日 苛索生活費
周子揚大爆前度胞姊何傲芝，向他苛索每月 20萬生活費，否則不要再跟其妹何傲兒拍拖。
12月 25日 聲明反擊
兩姊妹發出聯合聲明反擊，指周子揚毫無根據，捏造事實；而周子揚則堅持所講全部屬實。
1月 9日 轉口風
周子揚出席活動時突然轉口風，大讚何氏姊妹，並承認自己過於激動，與何家關係仍然友好。
1月 11日 出律師信
強調自己是虔誠天主教徒的何傲兒，表示緊守教規和有口德，暗示分手另有原因；並聲稱兩姊妹已分別發律師信給周子揚，要求對方公開道歉，將行動升級。
2月 12日 要求和解
周子揚發出律師信要求和解，並表示自己主動讓步，希望可以平息事件，令雙方都有下台階。
撰文、攝影、攝錄：娛樂組
|
鍾意就快D Share啦！
|
|
|
