娛樂偵訊
爭風呷醋搏黃秋生點燈
黃秋生跟同是演藝學院出身的甄詠蓓 13年合作開辦的戲劇班，一直為圈中藝人熱捧，門下的蔡思貝，更被黃秋生力薦在張家輝執導的《陀地驅魔人》中擔正，因而獲提名今屆香港電影金像獎最佳新人。
見同班同學有恩師鋪路入影圈，一班圈中女學生唔執輸，在團拜日施展渾身解數，出招搏黃秋生好感。
送奧斯卡獎
上週五（二月十二日），一班學生跟導師黃秋生及甄詠蓓拜年兼慶祝上課一周年，由下午開始玩到黃昏，有飲有食！趙碩之更特登訂製了一個奧斯卡獎送給黃秋生，氹他開心。
「 Wylie（趙碩之）睇報導知老師（黃秋生）講過攞完視帝仲想攞埋奧斯卡，於是專登整咗個獎送俾佢，話等佢完成心願。」知情者說。
跟去年團拜一樣，大部分學生都有出席，聯誼之餘，又會扮鬼扮馬影相自娛。
「今年啲女同學特別積極，不停圍住秋生。其實自從秋生推薦咗蔡思貝俾張家輝拍戲，第一次就做女主角，搞到有機會提名，佢哋對秋生更加唔同！一有機會，就係咁黐住傾偈。其實蔡思貝喺影圈真係新人，又俾人笑雞仔聲，但佢好識氹秋生，落堂問功課，得閒又約食飯；秋生覺得佢對演戲好有誠意，所以特別關照。」
推蔡思貝做女一
蔡思貝識搵機會！在無綫多年，有樣有身材的沈卓盈，去年亦報讀了「大師班」，今年首次參加團拜活動的她，亦出擊搏好感。
「 Jessie（沈卓盈）全程好似表現得好怕醜，但同秋生傾偈就鬼咁嗲，秋生一向對佢印象唔錯，所以嗰日都特登搭住佢膊頭影合照， Jessie扮不知所措好配合，影完相仲第一時間放上微博，之後 Wylie亦唔執輸跟住擺 fb，大家鬥多相。」知情者說。
影大合照時，趙碩之為求突出，要求擺多幾個甫士，攬完換位跟住又嘴。
「 Wylie之後仲將嘴相標示『 NEW BOYFRIEND』放上網，不過事後驚俾人誤會，又補鑊解釋話自己貪玩，同秋生亦師亦友，所以先會咁大膽。其實，佢夠主動仲啱秋生。」
搵位埋身鍊骨
至於一直視黃秋生為偶像，被指對老師有意的顏子菲，當日反而比較克制；見趙碩之扮嘴，顏子菲未有即時做嘢，但之後卻吼準機會，趁黃秋生冇人圍，攝位幫他鍊骨獻殷勤。
「秋生一向來者不拒，同啲女仔又特別傾得埋，好似 Isabella（梁洛施）每次返香港，都會約佢見面；不過團拜嗰日啲女仔真係好主動，個個爭住搏好感，好明顯，大家都想好似蔡思貝，有機會俾秋生點燈。」知情者說。
受歡迎男
黃秋生有料到，又肯助旺身邊人事業，獲不少女星爭相獻媚。所以，男人的魅力唔一定來自錢多和靚仔，騎呢一樣得！例如來自台灣的金剛。
12年主持無綫遊戲節目《五覺大戰》時，當時人氣爆燈，性格又鬼鬼馬馬的金剛，氹到「神獸天使」 32D蔡慧欣和 34C陳芷尤不知幾開心，二人更不避嫌爭「入宮」，神氣金剛話：「唔知揀邊個好？」
點中你是榮幸
黃秋生點石成金！先有蔡思貝拍到七料影帝張家輝，再被提名金像獎最佳新人；就算陪襯多年的韋家雄，跟黃 sir合作大台劇《梟雄》，亦獲點化，演技大躍進，結果攞埋台慶「男配角」獎。
撰文、攝影、攝錄：娛樂組
|
鍾意就快D Share啦！
|
|
|
