難得一齊放假，兩公婆大年初二合體到大埔安仔屋企拜年。
探熱針
Sammi陪安仔 返男家拜年派利是
結婚兩年，依然唔認註咗冊的 Sammi和許安，農曆新年孖咇四出派利是；大年初二，兩公婆帶埋賀年禮品，專誠揸車入大埔，向男家親戚拜年。
初一女家初二男家
早排忙住出戰內地歌唱比賽《中國之星》的許志安，曾大呻定時定候要飛內地做錄影，冇時間陪老婆。農曆新年放假一星期，安仔專心做住家男，陪老婆四出辦年貨補番數。
屋企大家族，兄弟姊妹中排行第十最細的安仔，過年慣性逐家逐戶同阿哥家姐拜年；但婚後就老婆行先，大時大節，例必先陪 Sammi返外家。
「今個新年安仔放一個星期假，但初四就要飛去新加坡開工，仲要去足一個星期。佢同 Sammi兩邊屋企都係大家族，安仔有十兄弟姊妹， Sammi嗰邊都五個，所以初一到初三都四圍去拜年。年廿九佢哋返咗 Sammi屋企食團年飯，初一亦係先去同外父外母拜年，初二才輪到安仔嗰邊。」知情者說。
唔願素顏入鏡
大年初二當晚， Sammi同安仔揸車由港島區愛巢直駛大埔新峰花園屋企。泊低車後，安仔攞住三袋拜年禮物落車， Sammi亦幫手拎住一袋。
冇化妝的「十嫂」 Sammi聽到記者講「恭喜發財」，照樣唔理三七廿一，耷低頭 turbo腳衝入屋苑，避免素顏入鏡。
相反，天后夫安仔就笑到四萬咁口，護送老婆入內後，醒起自己做咗「老襯」要派利是，即刻行返轉頭，笑晒口向記者派利是，記者問他習慣派利是未？安仔即刻耍手擰頭：「開工利是啫！」
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
