為新劇《致命復活》拍攝嗌交戲，兩人一埋位就嚟料，快靚正。
娛樂偵訊
你一句我一句 黃德斌萬綺雯火紅火綠
52歲黃德斌效忠無綫 26年，頂盡做男二，直到近年小生走剩無幾，才有機會在《刀下留人》和《鐵馬戰車》嘗到男一滋味，劇集口碑收視更加雙贏，幫自己爭番啖氣！
新劇《致命復活》又孭正，黃德斌飾演傷殘人士，同對手萬綺雯在時鐘酒店外拍嗌交戲，兩個一埋位就嘈到火紅火綠，搞掂收貨，老手就係老手！
落場前做足功課
隨住當家小生陸續離巢，「佬味」濃郁的黃德斌，終於等到機會在大台擔正！
在劇集《致命復活》中再做男一的黃德斌，早前孖住防腐萬綺雯為劇集拍外景，二人在佐敦一間時鐘酒店外，拍攝一場嗌交戲，劇中飾演左腳截肢，全程要揸枴杖的他，和萬綺雯事前都做足功課，落到場，輕輕鬆鬆；等埋位，黃德斌不停講爛 gag，氹到萬綺雯係咁喪笑，但一埋位，你一句我一句，嗌到七情上面，一 take收貨！
內地拍劇被走數
被形容是遲了二十六年的男主角，黃德斌也曾灰心過，一度考慮全身北上。
「其實 Kenny（黃德斌）肯搏肯捱，不過性格比較內斂，又唔埋堆應酬，所以 miss咗好多機會！佢都五張二，層樓又仲供緊，返內地拍劇可以搵多啲錢。
「上年戚其義吹雞開《傳奇大亨》，都有預埋佢一份， Kenny連約都未簽好，就幫手埋位，點知阿戚同男主角磨合唔到，連累埋佢俾人叮走，連尾期都未收到！好在公司而家都俾好多機會佢， Kenny都話唔諗太多，只要有機會，就乜都試吓！」一名無綫人說。
撰文、攝影、攝錄：娛樂組
來源 source: http://hk.next.nextmedia.com
|
鍾意就快D Share啦！
|
|
|
