豪語錄
溜走的激情 黃真真
黃真真數月前戒了煙，甚至並非為綠色、 new life等比較新漸理由，而是為患肺癌的朋友丈夫祈福，當許個心願。
雖然一頭金毛依然很爆，但滿口講性的《女人那話兒》辣妹導演畢竟是十五年前的事，她說：「人大了，關心的事自然不同。」還有《女人本色》早在○七年登上回歸紀念獻禮，人民大會堂行紅地氈，她是北上適應得最成功的年輕導演，有點意想不到。
黃真真說不只適應：「係直頭擁抱大陸。」時逢她遭愛國陳淨心檢舉 post過黃絲帶，呼籲罷睇其新作，票房要緊，擁抱兩字，真覺悟得太快。
新作《消失的愛人》，浪漫淒迷，理應不會「被消失」，那含有悼念亡父之意，講靈魂歸來——且慢，靈魂就是鬼，唯物共產主義不容談鬼，你以為自己已經夠和諧，人家永遠要求更和諧。
開竅
內地至今禁拍鬼片，傳媒避重就輕冠以黃真真「靈魂導演」之名。「都有朋友問靈魂和鬼魂的分別，我話靈魂歸來是愛你，鬼就兇神惡煞來嚇你。
「 Daddy離世，半夜醒來，我諗如果見到他會不會驚呢？觸發我拍一部靈魂歸來的電影，沒有仇恨，只有懸疑，劇本亦通過了審批。」
上有政策下有對策。「聰明」的導演懂在結局訴諸幻覺、精神病和噩夢；「包容」的觀眾懂在臨尾一兩分鐘扮睇唔到——是否如此？
「這我就不能預先劇透了。我覺得是技巧、舒服地扭轉局面， why not？雙方 understood是一個 level，為通過審批而要觀眾瞌埋眼，作者失敗，一般很 cheap；但技巧可以更高層次，本身就是劇情的重要部分，作者天衣無縫地令到件事更加靚。我不敢講自己天衣無縫，我 OK啦。
「正如你老公不准你性感，你覺得對方管你，一係執包袱，一係搵過第二個；但如果我不死鬥、拉高（領口）少少，不穿黑，穿白似天使得唔得？他反而會改變，那種滿足感仲大於一早乜都俾晒我。這是我作為女人的諗法。
「我以前喜歡爭議性題材，年輕狂野幫到我奮鬥，人大了，其實唔需要， soft好過 hard。」
拍套內地版《女人那話兒》又如何？
「現在已過時， over十年前，在女性不敢把性放在口邊時拍才過癮。網上播吓，在大陸落 K、飲酒都是那話題，有乜巴閉？」
但內地觀眾就是未正式睇過，正如真正的鬼片原該令人不寒而慄，真正的色情片原該令人興起衝動。
「極端追求，我不在大陸啦，點會咁辛苦自己？在香港拍， budget低啲，唔夠資金，同泰國同韓國合拍吖。我冇闖關的虛榮感， energy集中在創作，不是去挑戰極限。
「我未必是你心目中的辣，真不是，從頭到尾，我想強調，並非 compromise。用咁多力，不如搵第二個地方，我拍電影啫，何必本末倒置？」
勝負
黃真真是個異數，以年輕女導演北上比在香港更吃得開，連 TVB財經節目也訪問她，卻解不出所以然來。
「我黃毛丫頭，哪裡有機會已經很正，冇話睇到什麼先機嘅。
「夠膽啫，而且並非我自己拍門，通過朋友介紹，飛去北京見面。有些行家男導演問：『吓，你一個去，冇 check過真定假咩？』我冇，我冇憂慮，呃，不會是男女之間的呃，根本冇咩好呃。講直啲，他們（男導演們）不是擔心我，他們是擔心自己啫，一條𡃁妹矮矮細細，咁都得？
「我的《六樓后座》、《分手說愛你》，有女性特有的視角，國內不多愛情片嘛，就找我拍《傾城之淚》。」
即係，多年來大陸從香港已學夠如何拍大片動作片，倒是另方面尚具價值？
「學晒，然後 next？ To be honest，你太 mean了，你覺得係利用， I think it is a chance。
「 Negative energy在香港夠了， old fashion冇意思，一陣愁雲慘霧，點解唔開心搵番自己強項？
「覺得利用，你可以不上去囉， enough is enough，係時候正面啲。我擔心你點寫我，我都好怕《豪語錄》，我 emotional。」
比起從前唔怕呃、冇得輸；既得患失了，一個專訪都怕？
初衷
其實沒什麼好「寫」黃真真。去完佔中，去完篤魚蛋，不少打工仔仍得北上謀生。北上的圈中人分兩種：一種是一做完，哪怕只兩三天假期也急急返港抖抖氣；黃真真大概屬於後者，「會坐定定，有 apartment，一年起碼住北京半年以上，我在那裡有真正生活，落三里屯，並非為了識人才或碰機會，是飲酒談心、講吓點解結婚點解唔結婚的朋友，包括同內地人拍拖。
「在當地賺錢在當地消費是道義，我更加想到係投入，融入，很多事情可以改變的。我絕對擁抱，不擁抱那地方，不會在那裡工作。」
如此說來，她至少比我們幸運。
黃真真的幸運，包括作為學院派（紐約留學生），一入行即做導演，羨煞幾許從電影小工捱上去的同業。
「紅褲子和學院派都不簡單，由低做起要目標清晰，因為 keep住有工開，有晉升，人有惰性，應付了工作已夠忙，收入穩定唔使擔心，可能忘記做導演的理想。
「我開始得辛苦，入行無路，一邊寫 proposal一邊炒孖展來籌資金，衰咗，孭過成身債。
「但即使俾我贏錢，都未 reach快樂，都係拿資金來拍電影，因為那才是我的目的。」
紅酒
笑黃真真從良了，她嬌嗔：「我以為自己仲有飛女感覺。我懶叻形容似紅酒，一開始梗係重口味，十年八年後醇啲，嗒落有味了。」
怎說呢，回顧她早年舊照，題材最辣時期，黃真真反而打扮樸素，正如買得起超級跑車總是成功人士，有悶心閒錢塑造反叛形象的，其實一早過晒反叛年齡。
撰文：余家強
攝影：胡春輝
攝錄：羅錦波
協力：陳愷琳
化妝： Moon Ip
髮型： Base Luk@i_hair.nail
服裝： agnès b.
|
鍾意就快D Share啦！
|
|
|
