溫拿同根生「五碌嘢」拜早年
溫拿樂隊事隔五年再度開騷，在年廿八率先拜個早年，其中譚詠麟（阿倫）祝大家「年年廿五」，五虎又叫葉智強（阿強）試用普通話拜年，普通話麻麻的阿強迫於無奈說了一句極似粗口諧音的「猴年好」，全場爆笑！五個大男人聚首一堂，更趁機大講「有味笑話」，笑言舞台上的五支「幻燈柱」是「五碌嘢」，而且來自同一條根！
溫拿昨晚假紅館舉行一連八場跨年演唱會《溫拿NEVER SAY GOODBYE演唱會2016》，鍾鎮濤太太范姜、陳百祥夫婦、梁家輝一家三口、上山詩鈉、陳芷菁與老公、何麗全、邱子傑夫婦、杜德偉、袁偉豪與女友岑杏賢等到場支持，阿倫的年邁母親亦坐住輪椅捧場，不少粉絲拿着寫上「溫拿精神」的燈牌支持偶像。
演唱會開三面台，準時八點半開騷，台上插住五支「幻燈柱」，甫開場五虎帶住bling bling眼鏡、穿上花花西裝出場，阿倫與鍾鎮濤（阿B）自台的左右兩側升到台上，彭健新（健仔）、阿強及陳友分別在後伴奏、打鼓。五虎率先唱出新歌《溫拿精神》，唱畢後台上更多次爆破，認真揼本！
阿強祝「猴年好」
阿倫在台上說溫拿演唱會是個非一般演唱會，可以說是party，由溫拿帶大家見證香港樂壇。接着五虎一口氣唱出英文歌《Pinball Wizard》、《China Grove》、《I Was Born To Love You》、《Satisfaction》，喚起集體回憶，他們更叫樂迷用熱情燒旺全場：「演唱會好需要大家互動，要好high，但坐喺度high唔到，大家有能力、仲係25歲嘅話就一齊企起身」全場隨即起哄起身和應。
之後，五虎搶先與歌迷拜個早年，阿倫笑說：「前兩日立春，所以已經過咗年，同大家拜年先。祝大家『年年25歲』！」健仔、陳友則祝大家「恭喜發財」、「猴年生生猛猛」。接着大玩普通話最水皮的阿強，叫他用普通話向大家拜年，阿強初時耍手擰頭，最後屈服以「唔鹹唔淡」的口音說了一句「猴年好」，因發音極似廣東話粗口諧音，結果引來全場爆笑！
想遞咪畀阿叻
五虎更將精心打造的舞台擺上枱大講黃色笑話，陳友說：「舞台嘅設計宗旨係『溫拿精神』，所以插咗『五碌嘢』。」阿B即糾正說量詞應該用「支」，阿健「不滿」的說：「五支幼得滯，唔啱我哋，我哋係五張嘢！」阿倫此時加入戰團：「你點止五張嘢啊？陳友你係咪鬼拍後尾枕啊，我就係年年25！」最後由阿強打圓場，笑謂五支柱雖然看似分開，但來自同一條根。阿倫聽完就笑說：「做咩突然咁發人深省啊，欽敬欽敬！」
五虎又講到以前經常在電氣道與陳百祥（阿叻）一齊唱歌，剛剛見到坐在第一排的阿叻，幾乎想遞咪給他唱番幾句。他們又拿另一位觀眾好友杜德偉開玩笑，笑指杜德偉的斑點狗裝好過癮：「好威啊！借嚟聽日着吓。」
文：音樂組
|
鍾意就快D Share啦！
|
|
|