嘈到開拖 火爆堅情侶自拍嗌交片呃 like [FACE - 458] __,MF,

Brandy同Jade拍拖3年，嗌交多過食飯，但佢哋視之為情趣，愈嗌感情愈好咁話。爆Like王嘈到開拖　火爆堅情侶自拍嗌交片呃likeYouTuber睇得多，情侶檔真係比較少，而Madcouple堅係情侶，喺自家channel講吓兩性關係、講吓旅遊，但最多時候係嗌交，嗌到面紅耳赤，嗌到拍cam熄機，但觀眾反而勁like，開檔3個月已有4萬個訂閱。26歲Brandy同19歲Jade拍拖3年，事無大小 ...

Brandy同 Jade拍拖 3年，嗌交多過食飯，但佢哋視之為情趣，愈嗌感情愈好咁話。

爆 Like王

嘈到開拖　火爆堅情侶自拍嗌交片呃 like

YouTuber睇得多，情侶檔真係比較少，而 Madcouple堅係情侶，喺自家 channel講吓兩性關係、講吓旅遊，但最多時候係嗌交，嗌到面紅耳赤，嗌到拍 cam熄機，但觀眾反而勁 like，開檔 3個月已有 4萬個訂閱。

26歲 Brandy同 19歲 Jade拍拖 3年，事無大小都嗌一餐，訪問當日 10條問題嗌咗 8條，火爆過火爆姐！

Jade（ 19歲）

城大學生

美容 Channel： AmourBeauty JM

Brandy（ 26歲）

曾任股票投資工作，現為全職 YouTuber

YouTube： MadCouple

F：《 FACE》　 B： Brandy　 J： Jade

F：點解情侶檔拍片？

喺 YouTube討論兩性關係，不斷嗌大交，但網友勁 like，讚佢哋夠真。（ YouTube畫面）

J：我一直有拍開化妝片，想試多樣， couple主題好少人會公開講，好似我哋咁將生活都擺出嚟畀人睇，呢樣嘢應該好多人有共鳴。

B：睇過外國啲 couple玩 challenge，玩得好激，但佢唔夠膽玩，一整到佢個樣就唔肯玩。

J：佢哋輸咗要倒啲食物落個頭度，好浪費！

B：關咩事！總之整到個樣你就唔肯。

F：點解你哋啲片成日嗌交？

最近去東京順便拍埋旅遊特輯， MadCouple話會繼續拍旅遊，亦會拍一啲挑戰項目。（ YouTube畫面）

J：最多人鍾意睇我哋嗌交，唔係專登嗌㗎！專登係好難。試過嗌得過份咗真係唔出得街，我試過嬲到大力拍部 cam嗌唔拍， Brandy索性 cut咗嗰段。

B：𠵱家啲人鍾意睇真啲嘅嘢，我哋鍾意做番自己。

J：試過有次佢揸緊車，唔知點解我好嬲，我一拳打埋佢度，打爛咗佢副太陽眼鏡。

B：黐線！佢真係次次郁手㗎！有次打牌，我講笑話：好似你咁咩成隻白板咁！佢一隻麻雀飛埋嚟，中咗我隻眼囉！

J：佢掟番我，中咗呢度（指住嘴角）。

F：有冇試過嗌交嗌到分手？

Jade喺 5年前已開始同另一拍檔 Minnie拍美容頻道，都有超過 9萬訂閱，𠵱家依然有繼續拍片。（ YouTube畫面）

B：好多次，直情係分咗手，只係好快好番。

J：即係分咗手一日嗰啲呢。

B：通常係我提出。

J：通常係我呀！你唔好扮，你成日扮係飛我嗰個。呢年嚟叫穩定啲，我哋諗，橫掂都會好番，何必嘥時間嗌交。

B：我冇咁諗。我係話鬧嚟鬧去都係嗰樣嘢，唔好再嘈。

J：你咪扮嘢你同我講㗎！

B：我啲 friend全部都覺得佢好惡，成日問我：你幾時離開佢呀？

J：啲人想嚟溝我咋，哈哈哈！

B：你真係諗多咗！

F：有網友批評 Jade係港女，又有人話你有情趣，你覺得自己係邊樣？

MadCouple亦有請藝人玩挑戰遊戲，何浩文試過被整蠱食超辣杯麵，佢哋話藝人都係經朋友介紹認識。（ YouTube畫面）

J：我寧願認港女，我講嘢比較直，𠵱家好多人睇到少少嘢就話人港女，但冇睇到佢做咗其他好嘢！

B：佢表面上係一個港女，觀眾睇到佢成日蝦我，但呢種係我哋嘅相處方法，即使你哋話佢港女，但我 buy，我就係鍾意直接嘅人，總之有嘢要講，唔好轉彎抹角。

J：如果我嗲聲嗲氣，啲人又話我姣婆㗎

攝影：林迅景

來源 source: http://hk.face.nextmedia.com

鍾意就快D Share啦！

下一篇 》